Read Sangir AYUB 20 Bible Online

AYUB 20 - Sangir bible

AYUB 20

¹Mase i Zofar simimbang, ”Ei Ayub, iạ e kai simurị u waweranu, kụ iạ e lighạ měhabaru sasimbangku.

³Baweranu ene e kahěnga-hěngang mělẹ̌hinakang, arawe iạ e masingkạ u kai kereapa sasimbange.

⁴I kau e kai wěga, u kai nạung bọu tempo kal᷊amona-mona, su panětakengu taumata e nipěllọ su dunia,

⁵ral᷊uasu taumata ral᷊akisẹ̌ e kětạeng kadodọ tempo, ringangu kapapian taumata duruhaka e kětạeng sěngkakondạ?

⁶Manilaing kasěllahe sarang langị, hakịu těmbọ e měngamẹ binawa,

⁷kaiso i sie sarung mailang sarang marěngụ-děngụ, mailang bọu dunia ringangu kakakoạ e mahina. Taumata apang masingkạ i sie, sarung makiwal᷊o, ”Ei, kai sol᷊ong apa raral᷊enge?”

⁸I sie sarung mailang kere kěngkaung ipi, mailang kere papasilo su tempong hěbi.

⁹I sie selain tawe ikasilom mata; i sie selain tawẹ dise su tampạ kẹ̌katanakenge.

¹⁰Nạung kangerẹ e nitakone wọu anun taumata tạ darotonge, kụ harusẹ̌ pakiawenge su manga anạ e.

¹¹Manilaing i sie e mangudạ dingangu mal᷊intoị, kaiso měntěhang lai i sie sarung makoạ awul᷊ẹ̌ marihutu.

¹²Apạ e marěngang karal᷊akisẹ̌ e su ral᷊ungu mohonge! Apạe sụsal᷊uewehẹ̌ lighạ ěllukange; ual᷊ingu ene walako karal᷊aehe su al᷊ungu lilane, tadeạu reng mararěnna makatemang.

¹⁴Kaiso kaěng ene e mẹ̌bal᷊ui su ral᷊ungu tiang, makoạ doti mapaị mẹ̌bawa papate.

¹⁵Darotong tako e niěllụ e, kate nasihasa e nipěmutane; Mawu Ruata e napasěbangu ene e wọu ral᷊ungu tiange.

¹⁶I ral᷊akisẹ̌ e sarung manginung lailu mẹ̌bawa silakạ, i sie sarung mateng lailu ene mẹ̌sul᷊ungu nikiking těmpe mawisa.

¹⁷I sie tawe sarung makatemang lanang zaitun mạhěmpal᷊iu,[32] arau lai susu ringangu madu kụ nẹ̌boang timompẹ.

¹⁸Kal᷊awọu untune harusẹ̌be pakiwal᷊ị e; kụ ual᷊ing munarane e tawe ikatemange.

¹⁹U i sie mạnědạ dingangu mapakạl᷊antingu taumata tala e; kụ i sie němul᷊aho manga wal᷊e apan tawe nịpapětị e.

²⁰Ual᷊ingu kal᷊aanggange sem běgang kẹ̌takenge; tangú i sie wěgaweng masahe kapulune.

²¹Mạengu kanengange kěbị pakasue, ute ual᷊ingu ene kasasukụ u wiahe měllo-měllo e tawe mẹ̌daragẹ̌.

²²Su tempong kasasukụ u wiahe měllo-měllo e seng supusigẹ̌, ute sigěsạ dingangu susa naunge nihombangke.

²³Kụ piạ e i sie mẹ̌tẹ̌tasibung měloho tiange, Duata e apạ e limangehẹ̌ dingangu měhukung i sie.

²⁴Kereu i sie tumal᷊ang mělingkạ bọu peda uada e, i sie sarung pakal᷊esẹ u papitị tambaga.

²⁵I sie kinahinoěngu papitị, hakịu nal᷊esẹ; kotọ u horom papitị kụkerong ene e timěpasẹ̌ bọu wadange, tangu katatakụ e nělakube ral᷊ungu naunge.

²⁶Naghoghahe kal᷊awọu arětạ siněnsěllẹ e; i sie ringangu kal᷊awọu anạ u sěngkataune nikaěngu putung kụ tawe niaparěllị u taumata.

²⁷Langị e namingkaheng karal᷊akisẹ̌; runia e nẹ̌pětị e rimokạ si sie.

²⁸Kal᷊awọu kakakalạ e sarung masue maupu ual᷊ingu sasongkangu ral᷊angehu Mawu Ruata.

²⁹Seng ene e pal᷊edu taumata ral᷊akisẹ̌, pal᷊ede nitilakehu Mawu Ruata e si sie.”