Read Sangir AYUB 21 Bible Online

AYUB 21 - Sangir bible

AYUB 21

¹I Ayub simimbang, ”Daringihẹ̌ko apan takụ iwera; kětạeng ene takụ dẹ̌dorongang kere lahiborẹ̌.

³Mẹ̌dorongko l᷊oahe iạ e rumol᷊osẹ̌ mẹ̌bisara, bọu ene wotonge lai saụ i kamene měhinakang!

⁴Bal᷊inewe ringangu taumata iạ e nẹ̌darendehẹ̌, kụ tawe mẹ̌kapura kereu iạ e tawẹ sabare.

⁵Kakěllạ e si siạ, kụ i kamene sarung mẹ̌gilabẹ̌, kụ i kamene napaku, mase mohongu e nipẹ̌kěmminge.

⁶Kereu takụ tiněnnaěng kakakoạku ini e tangú sumal᷊ungkendẹ e iạ e kahiang takụku.

⁷Unụe taumata ral᷊akisẹ̌ e nighěllirangu umburẹ̌ manandụ kahian Duata, dingangu rarotong i sire měngkate hanesẹ̌ mạtamba?

⁸I sire nẹ̌biahẹ̌ diọ marěngụ hakịu nakasilo anạ pulung i sire něngkasěllahẹ̌.

⁹Dal᷊ohom Bal᷊en sire e tawẹ konsange apa; Duata e tawe naparěntang silakạ baugʼi sire.

¹⁰Binatang i sire e něhite mapia, ringangu tawẹ apa susane, němpěhanạ.

¹¹Manga anạu taumata ral᷊akisẹ̌ e měmpạhul᷊insọ dingangu ral᷊uasẹ̌, kere domba kawuhuange měmpahul᷊iagẹ̌.

¹²Tẹ̌takinangkol᷊ain tingihu arabanạ, suling dingangu kěcapi, i sire enẹ e karamene měmpẹ̌kẹ̌kantarị dingangu měmpẹ̌sẹ̌sal᷊ai.

¹³Manga ěllone e nipakasuen sire su ral᷊ungu ral᷊uasẹ̌, dingangu i sire měngkairịbe su pẹ̌darame nasukụ.

¹⁴Sěmbal᷊iau i sire seng nẹ̌bera su Mawu Ruata, ”Pakaraungkong kami e ringangu rakọ e! I kami e tawe mẹ̌pandung dingangu tawe mapulu makaěnna timona ringangu kapulu-Nu e waugu pẹ̌bawiahʼi kami e.”

¹⁵Tiněnnan sire, ”Mẹ̌tangkiang Duata e tawẹ gunane, kụ mẹ̌kal᷊iomaneng si Sie e tawẹ kěhase.

¹⁶Bal᷊inewe samatang ual᷊ingu katoghasʼi kitẹ e, kụ makaual᷊i kal᷊awọu karaki ringangu timonang kitẹ e tangú?” Kaiso iạ e mamben tawe sěndal᷊eng u tiněnna ringangu timonane kerene.

¹⁷Apa wọu nariadi sol᷊on taumata ral᷊akisẹ̌ e nipate, kụ i sire nihombangengu silakạ dingangu soe? Apa wọu nariadi kụ Mawu Ruata e limangehẹ̌ si sire, kụ i sire nịlahukungʼE?

¹⁸Apa i sire wọu nihombangeng ngae, mẹ̌sul᷊ungu rahami ringangu awul᷊ẹ̌ kụ nitiụ u rěllang dingangu anging simahe?

¹⁹I kamene e mẹ̌bera u, ”Anạ nẹ̌dosa ene e harusẹ̌ ihukungu Mawu Ruata, ual᷊ingu rosang papạ e.” Arawe iạ e mẹ̌bera u: Tau nẹ̌dosa ene e harusẹ̌ ihukungu Mawu Ruata, mědeạu i sire makahěngang u kai ual᷊ingu rosan sire, tangú Ruata e něndingọ u hukumangʼE.

²⁰Balạekere taumata marosa e pěnanggung dosane sẹ̌sane, balako pakipěndange ral᷊angehu Ruata Karangetange.

²¹Kereu taumata masue tempone su dunia e, bědangbeng piạ pandungange i sie měnsang dal᷊ohom bal᷊ene e, mal᷊unsemahẹ̌ bue?

²²Botonge taumata maněntiro Mawu Ruata, arawe Mawu Ruata sẹ̌sane e kawe mẹ̌hukung diadikang masorga e tangú?

²³Piạ taumata mahuweka karěngụu pẹ̌bawiahe; i sie mairị kụ seng nasahe ringangu nawatụ kapulune. Papatene marěmasẹ̌ dingangu nakapěndangbe mal᷊unsemahẹ̌, mase wadange měngkai wědang katatoghase.

²⁵Kaiso piạ u l᷊ai nate napenẹ u tědụ, kụ tawe nakạpěndang karal᷊unsemahẹ̌.

²⁶Kaiso su l᷊ěbing, i sire sěngkaral᷊oka; tẹ̌tal᷊iwungangu ul᷊idẹ̌ dingangu lěheng.

²⁷Iạ mambeng masingkạ u apa tiněnnaěng i kamene, ringangu apang dal᷊akisẹ̌ ilẹ̌hingidʼi kamene.

²⁸Kakiwal᷊onu, ”Kai suapa wal᷊eng měngangawasa kụ mẹ̌kẹ̌koạ dal᷊akisẹ̌ e?”

²⁹Kai wědang tawe nakiwal᷊o su taumata l᷊awọ apang měmpẹ̌daral᷊eng tangú? Kai tawe mangimang i kamene tangú su habarẹ̌ ilẹ̌ul᷊ị i sire?

³⁰Angkuěng i sire, ”Su ěllo kụ Mawu Ruata e nẹ̌gěllịu hukumang, apan dal᷊akisẹ̌ e sarung ipakasal᷊amatẹ̌.”

³¹Tawẹ apa kụ naněngkul᷊ẹ̌ kakanoạ e; tawẹ apa kụ namal᷊isẹ̌ karal᷊akise.

³²I sie niwawa sol᷊ong lěbing, mase nitaho su ral᷊ungu lohang u lěbing; lěbinge rẹ̌diagateng dingangu hanesẹ̌ pẹ̌padul᷊iang.

³³Taumata ringangu hiwune rụdal᷊eng tụtaking maiete; kụ dingangu kasasikome e, tangú ěntana e něngambungke.

³⁴Kụ, lahiboru e kai tạ l᷊ohone ringangu kal᷊awọu sasimbahu e kai konti!”