Read Sangir AYUB 22 Bible Online

AYUB 22 - Sangir bible

AYUB 22

¹Mase nẹ̌bisarạ e i Elifas, ”Su tal᷊oarang kal᷊awọu umatẹ̌ e, tawẹu sarang sěngkatau piạ gunane su Mawu Ruata. Taumata kereng katahuěnnane e, kětạeng piạ gunane waugu watangenge hala.

³ Kụ měnsangbe piạbe gunane su Mawu Ruata, kereu i kau e mẹ̌koạ kapulunʼE ngae? Kụ měnsangbe piạ untune si Sie, kereu pẹ̌bawiahu e masukụ?

⁴Bal᷊inewe ual᷊ingu katatakụ u e su Mawu Ruata, kụ i kau e ěnsilang dingangu itoke nẹ̌sal᷊a,

⁵kaiso kawe ual᷊ingu tumanịu mal᷊awọ dosanu, ringangu apạ e ral᷊akisẹ̌ kakanoạ u ringangu lulunu.

⁶Kereu anạu sěngkataunu tawe makawaehẹ̌ utange, i kau e měmul᷊aho kěbị pakeange.

⁷Taumata masaghedẹ̌ e tawe ipěnginungu, apang nahutung e tawe witaugangu ringangu kaěng.

⁸I kau e nẹ̌pakẹ u diabatang dingangu kawasa baugu měmeslakẹ̌ ěntana kěbị.

⁹Bal᷊inewe tumbạu i kau e tawe nẹ̌tul᷊ung u manga wawine wal᷊u, arawe lai manga rariọ kasisi e sěsẹ̌dakengu.

¹⁰Ual᷊ingu ene su tampạu nangělikụ e, ini napenẹ u sedẹ, kụ sěngkianu naungu e niliwungangu katatakụ.

¹¹Ěllo e mangkeng kakạděndunge, kụ i kau e tawe makasilo apa; i kau e nawul᷊usẹ̌ niral᷊engangu lěba maihạ.

¹²Wal᷊inewe Mawu Ruata e mạtanạ su l᷊angị karangetange, kụ kụkakurung mạmanda manga wituing marangẹ-dangẹ tangú?

¹³Kaiso i kau nakiwal᷊o, ”Masingkạ u apa i Sie? I Sie ene su sěmběkam binawa ringangu tawe makaghuta si kitẹ.”

¹⁴I kau e mạngěnna u silone kai narěndungu winawa ringangu kětạeng su pẹ̌saraěngu langị dingangu dunia e[33] i Sie rụdal᷊eng tangú?

¹⁵Kụ i kau e tatapẹ̌be lụl᷊iu wọu ral᷊eng nipileng kal᷊awọu taumata ral᷊akisẹ̌ e?

¹⁶I sire něhěngkasẹ̌ deng bědang bal᷊ine tempong papatene, ringangu nịlaonodu lěba rimal᷊eng.

¹⁷Seng i sire ene e wahani mẹ̌sonọ u Kasěllahenge, ringangu mạngiral᷊ing u i Sie tawe makakoạ u manga apa si sire.

¹⁸Sumbal᷊iau Ruata e sen napakariadin sire nakalạ! Mamben tawe nakaěnna iạ e tiněnnan taumata ral᷊akisẹ̌ e!

¹⁹Taumata mapia e, lụl᷊ẹ̌ge napenẹ u ral᷊uasẹ̌, kereu makasilo taumata ral᷊akisẹ̌ e makaěbạ hukumang.

²⁰Kal᷊awọu rarotongu taumata ral᷊akisẹ̌ e seng nasue nagholọ, kụ putunge sen nasue nanutung apạeweng lěmbene.

²¹Kụ, i Ayub tangú pẹ̌damẹ e ringangu MAWU, tadeạu i kau e makaěbạbe karal᷊enehẹ̌. Kereu ene e koatengu e, nal᷊ahẹu i kau e makahombangbe kal᷊auntu.

²²Tarimạ e apan nitěntirom MAWU e si kau, kụ desọ e kěbị ene su ral᷊ungu naungu.

²³Pẹ̌sul᷊ẹ e su anum MAWU ringangu kasasanạ u naung,[34] kụ apan dal᷊akisẹ̌ su wal᷊enu e pakasue ědonu.

²⁴Děmẹ e wul᷊aengu kapaelange; kụ bahungke su wal᷊an sal᷊ụ kụ sen tawẹ akene lai.

²⁵Balạekere Kasěllahenge makoạ bul᷊aeng, ringangu sal᷊akanu kapaelange.

²⁶Tangú i kau e wotongewe mangimang su Mawu Ruata e sěntiniạ, dingangu masingkạ u i Sie kai simbul᷊u karal᷊unsemahu.

²⁷Kereu i kau e mẹ̌doa, i Sie sarung dumaringihẹ̌, kụ i kau e makapaněhụbe kal᷊awọu kědonu e.

²⁸Munaranu e sarungbe hanesẹ̌ piạ ual᷊ine, ringangu tualagẹ̌ e sarung sumarang su pẹ̌bawiahu e.

²⁹Taumata maobotẹ̌ e[35] ipakasanạ u MAWU, arawe apan naunge masanạ e ipakasal᷊amatẹ̌.

³⁰Mawu Ruata e sarung mẹ̌tul᷊ung i kau e kereu i kau e tawẹ sal᷊anu, ringangu kereu i kau e mẹ̌koạbe kapulu-Ne.”