Read Sangir AYUB 23 Bible Online

AYUB 23 - Sangir bible

AYUB 23

¹Arawe i Ayub e simimbang, ”Iạ e mẹ̌kẹ̌kal᷊ipěpahẹ̌ dingangu mẹ̌kẹ̌kasiang su těngon Duata; iạ e tawe nakakoạ nẹ̌tingkědangu susa naungku e.

³Ah, mal᷊owọko ren takụ kasingkateng tampạe měnsang suapa i Sie, tadeạu iạ e wotonge makatamai reng mẹ̌sombang dingange.

⁴Tangú pěrkaraku ini e ren takụ ihabarẹ̌ si Sie, kụ bọu mohongku e měngkawe apa mẹ̌tẹ̌tatahěnạ baweran tatahutěndạ.

⁵Iạ e mapulu masingkạ u měnsang kai apa sarung iwerane, ringangu kereapa i Sie mẹ̌gẹ̌lịu sasimbange.

⁶Apa měnsang i Sie maparal᷊engu kawasa-Ne si siạ e? Tala! I Sie nal᷊ahẹu sarung dumaringihẹ̌ kal᷊awọu waweraku.

⁷Iạ e tawẹ sal᷊aku kụ botonge makapẹ̌tahutěndạ u watangeng su těngonʼE, tangú iạ e sarung ipakal᷊iwirẹ̌[36] sarang marěngụ-děngụ.

⁸Takụ deakeng Mawu Ruata e su sěmběkan daki, wahẹ, timuhẹ̌, sawěnahẹ̌, kaiso walạewe su tampạ sude Ruata e mang tawe dise; kụ iạ e tawe makapẹ̌sombang i Sie.

¹⁰Kaiso i Sie masingkạ u kal᷊awọu ral᷊engku ringangu apạeweng dal᷊empangku. Kereu mẹ̌sul᷊ungu wul᷊aeng iạ e wanikateng, kụ mal᷊ahẹu naungku e wurẹ̌si.

¹¹Iạ e matuhụ si Sie ringangu masatia; tawẹ běke iạ e nělenga wọu ral᷊eng kụ niatorʼE.

¹²Kal᷊awọu titam Mawu Ruata e hanesẹ̌ takụ tuhukang, kapulunʼE e takụ tẹ̌tol᷊eěng, kụ wal᷊inewe kapuluku hala.

¹³Mawu Ruata e tawe mẹ̌bawal᷊ui; tawẹ u makal᷊awang si Sie. I Sie mẹ̌kẹ̌koạ apang kẹ̌kapulunʼE.

¹⁴I Sie sarung měndal᷊engu karaki-Ne si siạ, ringangu wědang lai lawọ karaki-Ne su l᷊ikudu ene.

¹⁵Ual᷊ingu mạtakụ i Sie ute, kimendẹ e iạ e; mangkeng kěbị e takụ tiněnnaěng ute mangkeng mạtakụ iạ e.

¹⁶Kakawasaěnge nakaghoghahẹ̌ kal᷊awọu wahaniku e. Iạ e matakụ ual᷊ingu Ruata, kụ wal᷊inewe ual᷊ingu kararěndung maěllị e, manilaing kararěndunge mělẹ̌liwung si siạ, dingangu měnẹ̌nakạ gatiku.