Read Sangir AYUB 24 Bible Online

AYUB 24 - Sangir bible

AYUB 24

¹Unụe Mawu Ruata e tawe něnilakehu ěllong pělahukunge, tadeạu apan taumata masingkạ i Sie makaěbạbe kạadilẹ̌ e tangú?

²Piạ taumata němpẹ̌ngal᷊ing tialam pẹ̌saraěng, tadeạu ěntanane něngalembong kawěnahe. I sire němpẹ̌tako ghapaěngu domba, ringangu něngurung su těndạu domban sire.

³Kalide tataghuanengu manga rariọ kasisi ěndusẹ̌ e, nital᷊ang i sire; sapin sěngkatau wal᷊u e niweslaki sire nikoạ kere wawaehe.

⁴I sire měnẹ̌nahaghe apang kasiang e makaěbạ bahageange, tangú nasihasa nẹ̌kěmbunị e apang kasiang.

⁵Kụ, tau kasiang ene e mẹ̌sul᷊ungu kalide maghaěng, kụ mědẹ̌deạ kaěng su kěhu mal᷊oang, kětạeng su tampạ ene samatang piạ kaěng baugu manga anạ e.

⁶Dahaming taumata wal᷊ine e[37] katewe nasihasa nịlahal᷊ẹ̌ e; buang anggoru taumata ral᷊akisẹ̌ e harusẹ̌ tampungange.

⁷I sie tawẹ kahiwune ringangu pakeange ipěnětị badange su tempong hěbi.

⁸I sie naholong tahiti mal᷊awọ su wul᷊ude, mase něndani wul᷊udu watu mědeạu mẹ̌těngkal᷊indung.

⁹Tau ral᷊akisẹ̌ e mẹ̌tahuěllangu anạ tạ i ninange ringangu i amange, kụ něngal᷊ạ dariọ kadodọ kasiang piạ utange si sie.

¹⁰Tau kasiange rimal᷊eng tạ pakeange; i sie nahutung těntal᷊ang deng kạpěměnsạ e gandung su rahami.

¹¹I sie mẹ̌kẹ̌koạ l᷊ana wọu zaitun, dingangu wọu wuang anggorẹ̌ lẹ̌inungang, arawe i sie hala e enẹ e narou-rou.

¹²Su apan soa ikẹ̌karingihẹ̌ sal᷊indoron tau maraning mate, apan nal᷊esẹ e mẹ̌kẹ̌kiạ u makịundang, arawe Mawu Ruata e tawe rumararingihẹ̌ daroan sire; i Sie tawe mapulu mẹ̌pandung.

¹³Piạ taumata apang tawe měnarimạ tualagẹ̌ e ringangu mẹ̌bẹ̌binsị u ene e, i sire tawe makakiral᷊a ringangu tawe tumol᷊e ral᷊enge.

¹⁴Su tempong kalonge e tahapate e mẹ̌bangung bọu katatikilange, mase suměbang měmate tau kasiang dingangu těntal᷊ang deng tawe naěllo, i sie měngkate liměnạ kere tahatako.

¹⁵Tahapẹ̌sundal᷊ẹ̌ e mạngampal᷊ẹ̌ darěntang bawěllo e; nipakẹ e tatimbuhunge tadeạu taumata tawe makakiral᷊a si sie.

¹⁶Tahatako e němolengkarẹ̌ bal᷊e su tempong hěbi; arawe su tempong ěllo e i sie mẹ̌tẹ̌tahul᷊ingkadu tualagẹ̌ kụ mẹ̌kẹ̌kěmbuni.

¹⁷Baugʼi sie e, mal᷊ukadẹ̌ e apạ e makạtatakụ, arawe kararěndung maěllị e makạl᷊ahimpulu.”

¹⁸Mase angkuěng i Zofar, ”Taumata ral᷊akisẹ̌ e nionodu lěba, ěntana tẹ̌taghuanenge e kai nilaanen Duata e; baelu anggorẹ̌ ini e kai lụhio, sen tawẹu mělẹ̌hal᷊ẹ̌ lai sene e.

¹⁹Kerẹewe saldu napuạ kinahinoěngu pělahangu ringangu matangěllo e, kerene tau marosa e niěllụ e sol᷊ong dal᷊ungu wanuan tau nate.

²⁰I ninange hala e niwul᷊en sie, ringangu manga lěheng tangú mahungkinạ badange. Arenge tawe lai tahěndungang; i sie nipakawinasa kere kalu nawangka.

²¹Patikụ ene nariadị e ual᷊ingu i sie kawe měnẹ̌nědạ pẹ̌bawiahu taumata wal᷊u, ringangu matingkaị miěbạ manga wawine tawẹ anạ e.

²²Arawe Mawu Ruata ringangu kawasa-Ne e kawe měnẹ̌nagha taumata mal᷊ahasa e. Duata e mẹ̌karạdiahange tangú mate e taumata duruhaka e.

²³Duata e mapẹ̌bẹ̌biahʼi sie mapia e, arawe pěnananitị e tawẹ umpade.

²⁴Tumbạeweng kadodọ tempo i sie e měbẹ̌biahẹ̌ mal᷊unsemahẹ̌ e, arawe wọu ene tangú mapul᷊ẹ sarang marěngụ-děngụ. I sie nalolang kere rěmpugẹ̌ kụ tawẹ gunane; mẹ̌sul᷊ungu wul᷊ihu ěmme kụ niharesẹ̌ bọu kalune.

²⁵I sai wue makapẹ̌sunial᷊u karal᷊ahẹ ene e, arau lumewang katul᷊idu waweraku e tangú?”