Read Sangir AYUB 26 Bible Online

AYUB 26 - Sangir bible

AYUB 26

¹Arawe i Ayub nẹ̌bera u, ”Apạ e masaun sul᷊ene i kau e mạngonggọu tul᷊umang si siạ taumata lome ringangu mawěhạ e!

³Enẹ e sasasa ringangu těntiro ene seng nionggọu si siạ, taumata kụ l᷊ongong!

⁴Kai waugʼi sai tangú waweranu ene ipạdaringihẹ̌ tangú? I sai mapạl᷊ohong kau e mẹ̌dụdato kerene?”

⁵Sasimbangi Bildad, ”Taumata apang su kěkadẹ̌ e nawintogẹ̌; akẹ dingangu panunggune e němpẹ̌kal᷊ipěpahẹ̌.

⁶Su těngon Duata e runian tau nate e nawualagẹ̌, tawe nahěping hakịu kinasilo-Ne.

⁷Duata e napakawingkahu langị e, su wowong laudẹ̌ mal᷊oang, ringangu namitingu wanua su huange tạ l᷊ohone.

⁸Binawa e nilurangengu akẹ niapẹ̌dal᷊embone, kaiso winawa e tawe nawědesẹ̌ kahiang kawěhạ e.

⁹Niapẹ̌kěmbuni-Ne gahịu wul᷊ang limangu e su l᷊ikudu winawa seng niěmpahe.

¹⁰Nighambare limbolong su wowong l᷊audẹ̌ mal᷊oang mědeạu ipěměta tualagẹ̌ e wọu kararěndung.

¹¹Kereu i Sie e měhěkadẹ̌ ringangu tingihe gụgal᷊ěgehẹ̌ e, tangú mangạ e kal᷊awọu rihi tatongka langị e gumanuẹ̌.

¹²Laudẹ̌ mal᷊oange ipẹ̌samal᷊ẹ[38] su kawasa-Ne, kụ i Rahab[39] mal᷊aing nigheseru kapelesanʼE.

¹³SingongonʼE měngaehẹ̌ langị e sarang pakal᷊endạ-l᷊endạ; l᷊imanʼE ipěmate nagạ sarang tumal᷊ang marau.[40]

¹⁴Arawe patikụ ene e tumbạeng tatialang kawasanʼE; tumbạeng sasiang kụ nahumpạ u tul᷊ing kitẹ e. Apạ e kakạdodọ katatahuěnnang kitẹ mạanụeng Duata e ringangu kahuagatu kawasanʼE!”