Read Sangir AYUB 27 Bible Online

AYUB 27 - Sangir bible

AYUB 27

¹I Ayub naněpasu rụdatone angkuěng, ”Su arengu Ruata kụ biahẹ̌ kụ tawe mẹ̌gaghěllịu kạadilẹ̌ e si siạ,

³iạ e mẹ̌salu: Karěngụeweng Mawu Ruata e wědang měgěllịu singongo si siạ e, karěngụewen niawa e wědang ene su ral᷊ungu wadangku e,

⁴biwihẹ̌ku e ren tawe makasěbạ u wawera konti, lilaku e ren tawe mẹ̌beran tondol᷊ikụ.

⁵Kụ, mạdiri wue iạ mẹ̌bera u i kamene e matul᷊idẹ̌; saral᷊aing mate e iạ mang mẹ̌tahutěndạ u iạ e tawẹ turạ e.

⁶Iạ e těbewe mẹ̌tẹ̌tumpaedẹ̌ su tatuhụku, ringangu ral᷊ungu naungku e mang sěntiniạ burẹ̌si.

⁷Mal᷊owọko sědụku e ihukung kere taumata duruhaka e, ringangu sekẹku e takụ l᷊uwageng kere tau ral᷊akisẹ̌ e.

⁸Piạ harapange ngae waugu sěngkatau ral᷊akisẹ̌ e su tempon Duata e měnẹ̌nuntụ himukudẹ̌?

⁹Duata e sarumbe rumaringihẹ̌ kakiạ e kereu hombangengu sigěsạ i sie ngae?

¹⁰I sie harusẹ̌be kụkaralọ u ral᷊uasẹ̌ bọu Mawu Ruata, ringangu mẹ̌kal᷊iomaneng si Sie kụ běgawe makapěndang masaghedẹ̌.

¹¹I kamene sarung takụ těntiroěng hal᷊ẹ̌ u kasěllahu kawasan Duata, takụ ihabarẹ̌ si kamene karaking Mawu Limembong Kawasa.

¹²Arawe i kamene kěbị e seng nakasilo hala. Kụ unụ e i kamene nẹ̌gěllịu sasasa tawẹ mangal᷊ene?”

¹³Tangú nẹ̌berạe i Zofar, ”Kere ini kakakoạ u Ruata e Limembong Kawasa, měhukung taumata mahasa ringangu duruhaka.

¹⁴Kereu anạ e mal᷊awọ, i sire sarung mate su ral᷊ungu pẹ̌sasekẹ dingangu anạ pulunge sarung mẹ̌biahẹ̌ ikẹ̌kawuse.

¹⁵Anạu sěngkataune apang ene e, mẹ̌taten sahindạ, dingangu apam bawine wal᷊u e tawe sumasangị i sire e.

¹⁶Botonge wue sal᷊akane mẹ̌tẹ̌tatimbo ringangu pakeange mẹ̌dẹ̌dal᷊ahaweng,

¹⁷arawe sal᷊aka ringangu pakeang ene kěbị e sarung makoạ tataghuanengu taumata apang naunge matul᷊idẹ̌ e.

¹⁸Bal᷊en tau ral᷊akisẹ̌ e hupadẹ̌ kere sal᷊ehu kal᷊ịbangkang,[41] kětạembeng bal᷊e paněntal᷊ang kere suěngu sěngkatau riagạ.

¹⁹I sie něnarehu wadange kere tau kalạ, kaiso i sie tawe makasaụ kapia,[42] piạ i sie napuko wọu nẹ̌tikị e, ute seng nasue napuạ tạdise kakakalạ e.

²⁰Hombang masaria nariadi kere lěba riměnta sěngkělěndịe. Anging maihạ su tempong hěbi, timiụ dingangu něnuhudi sie tamai.

²¹Angingu raki něnapuạ i sie, mase němunasʼi sie wọu wal᷊ene.

²²I sie niěmmane tạ tatal᷊ěntụ e, kụ nasihasa timal᷊ang nẹ̌deạ pẹ̌kakěllungang.

²³Kananawone e nisěnsomahengu taumata ringangu pěnanal᷊okạ; kai walạewe su tampạ sude i sie e makạhombang lahinakang.”