Read Sangir AYUB 28 Bible Online

AYUB 28 - Sangir bible

AYUB 28

¹[43] Piạ pěngangul᷊ị suapang sal᷊aka e kinaěbakeng; piạ tampạ suapang bul᷊aeng sahikang.

²Uase e wangkang bọu ral᷊ungu ěntana e; bọu watu e apaelehu tambaga.

³Kararěndung maěllị e kinatěpaseng e tampạ karal᷊ungange nisẹ̌suiang. Sene su ral᷊ungu kararěndung e taumata e mědẹ̌deạ manga watu.

⁴Su tampạ mararau kụ tawẹ taune, den tawe ral᷊indaěng arau sẹ̌saheěng, taumata e měmpělẹ̌hal᷊ẹ̌ kapẹ̌tẹ̌timbalonge su tal᷊i, su ral᷊ungu liang těpasẹ̌ kụ lụhio marěmasẹ̌.

⁵Ěntana e makạual᷊i kaěng baugu taumata, kaiso su al᷊ungu ěntana ene lai, kěbị e ipẹ̌kakal᷊iune sarang dal᷊ohong banua e ipẹ̌kal᷊iaesẹ̌.

⁶Batu su ral᷊ungu ěntana e piạ lohone nilakandi, ringangu awune e piạ lohone wul᷊aeng sahị.

⁷Manụ kalěmba e běgawen dal᷊eng sol᷊ong paị ene, ringangu manụ sahedẹ̌ e bědang tawe timẹ̌těllạ sumarangẹ e.

⁸Bědangbe tawẹ banạ u singa arau l᷊ai binatang dul᷊u wal᷊ine e limẹ̌liu ral᷊eng lụhio mẹ̌tẹ̌timona pai ene.

⁹Taumata měmẹ̌mangka su ral᷊ungu watu e kụ manilaing kereapa kakětị e, niwangkane wul᷊ude sarang nịdatingu hamụ e.

¹⁰Su tempong i sie nẹ̌koạ lohange natěpasu wul᷊udu watu e, nikaěbakenge paramata kụ seng tạ u kereng kal᷊ěnggihe.

¹¹Sarangkewe simbul᷊u manga sal᷊ụ e niwangkane,[44] kụ nasongkahewe apang kạbawuni.

¹²Kaiso měnsang suapa kapẹ̌deakeng kapelesa e? Suapa i kitẹ makapěngěndung tadeạu makaěnna?

¹³Kapelesa e tawẹ dise su tal᷊oarang taumata; tawẹ u masingkạ arěgane tutune.

¹⁴Su manga wal᷊ahuangu sasị dingangu laudẹ̌ mal᷊oange nẹ̌bera u kapelesa ene e tawe apa si sie.

¹⁵Kapelesa e tawe kasal᷊iuangu manilaing bul᷊aeng sahị, ringangu manilaing běliangu sal᷊aka e kai mang tawe kawěliang.

¹⁶Bul᷊aeng dingangu paramata e kaarẹ̌gaěnge tawe makataking arěgạeng pelesa e.

¹⁷Bul᷊aeng arau kaca al᷊usẹ̌ e tawe ikawanding dingange, tawe lai ikawaehu tampạ u bungang bul᷊aeng.

¹⁸Pelesa e něngalembong kaarěgane wọu kalung ino, kristal arau mutiara e.

¹⁹Batung paramata maririhẹ̌ tutune, ringangu wul᷊aeng sahị e tawe tumanịu maarěga wọu tiněnna mapia.

²⁰Kai suapa simbul᷊u kapelesa ngae? Kai suapa i kitẹ makahombang katatahuěnna?

²¹Tawẹ apa riadikang biahẹ̌ e kụ bọu makasilo, ringangu manga manụ u kinoaěnge tawe nakatingang.

²²Papate ringangu kawawinasa e mal᷊aing nẹ̌bera u, i sire samatang dụdaringihẹ̌ habarẹ̌ niusẹ̌.

²³Kětạembeng Duata e masingkạ u tampạ u kapelesa e, kětạembeng i Sie masingkạ u ral᷊eng tamai kerene,

²⁴ual᷊ingu i Sie makạsilo kal᷊awọu pondol᷊u dunia e; kal᷊awọu sabarang su al᷊ungu langị e tẹ̌tinganengʼE.

²⁵Piạ e anging gẹ̌gělirangu katoghasẹ̌ e, kụ nitantune apang pẹ̌kẹ̌takengu wiwihu laudẹ̌ e;

²⁶piạ e nitantu-Ne tampạ u kahondosangu tahiti e, ringangu ral᷊eng kụ niliuangu kilạ dingangu rěllụ;

²⁷kụ su tempo ene e pelesa e kinasilo-Ne, kụ niwanikatenge arẹ̌gane, kụ bọu ene niakunʼE.

²⁸ Mawu Ruata e něhengetang su taumata, ”Mědeạu makahombang kapelesa e, Duata e hinong adateng i kamene. Mědeạu makaěnna tangú, karal᷊akisẹ̌ e hinong pakarau wọʼi kamene.”