Read Sangir AYUB 29 Bible Online

AYUB 29 - Sangir bible

AYUB 29

¹I Ayub natẹ̌paseng bawerane angkuěnge,

²”Mal᷊owọko pẹ̌bawiahẹ̌ku e botongewe lai makoạ kere kal᷊imona, su tempon Duata e mạngěllung si siạ e.

³Iạ e hanesẹ̌ gẹ̌gěllirangu tul᷊umang, tẹ̌tualagenge su tempong iạ dụdal᷊eng su ral᷊ungu kararěndung.

⁴Seng ene e kal᷊awọu ělloku masasombọ e, su tempo nạung kapiang naungu Ruata e mạněntanudẹ̌ dal᷊ohom bal᷊eku e.

⁵Su tempo ene, Kasěllahenge wědang tụtaking si siạ, dingangu manga anạku e wědang ene su rěduhẹ̌ku.

⁶Manga binatang lẹ̌hinakanengku e makaual᷊i susu maral᷊awọ. Mal᷊awọ lana kẹ̌kaẹ̌bakeng bọu manga kalun zaitunku, manimbe sẹ̌suangeng su ěntana mawatu e.

⁷Kereu manga ghaghurangu soa e maiang sěngkakaiang e ringangu takụ al᷊akeng tampạku su tal᷊oaran sire, tangú

⁸pěmpẹ̌deạ e wiwihe ei kamene mangangudạ e, mạengu iạ e ikasilon sire. Kerene lai taumata maghaghurang e nẹ̌pětị dingangu piạ pěhěngkinge; mẹ̌deạu mẹ̌gěllịu adatẹ̌.

⁹Sarangkate masasěllahẹ̌ e nangědo němpẹ̌bera,

¹⁰ringangu taumata kapapiaěnge mal᷊aing tawe němpẹ̌bisara.

¹¹I sai wue mang maherang kereu makaringihẹ̌ habaru iạ e; i saing makasilo si siạ e, mědẹ̌dalọewe pěmunaraku.

¹²Batụu, takụ itẹ̌tul᷊ung tau kasiang kụ mědẹ̌dorong tul᷊umang; apang manga rariọ kasisi ěndusẹ̌ e takụ tẹ̌tongkaěng batụu tạ měnanongkane.

¹³Iạ e rẹ̌daloěngu taumata tumanịu masigěsạ, iạ e mẹ̌tul᷊ungu manga wawine wal᷊u sarang i sire e mal᷊enehẹ̌.

¹⁴Kakanoạku e matul᷊idẹ̌ bue tawẹ turạ e; sěntiniạ mang takụ ipakạtei kaadilẹ̌ e.

¹⁵Baugu tau wuta e, iạ makoạ mata; baugu apang peosẹ̌ e, iạ e mạkoạ laede.

¹⁶Baugu apang kasiange, iạ makoạ i amange; baugu apan daghị e, iạ mạkoạ tumatawang.

¹⁷Arawe kawasan taumata mahasa e, takụ pědiang, dingangu apan nawihua si sire e takụ ambangeng.

¹⁸Pělaharapẹ̌ku e ute kai makaratingu umburẹ̌ marangẹ, ringangu mairị su katatěmurang su wal᷊eku hala e.

¹⁹Iạ e kai mẹ̌sul᷊ungu kalu matuwo maapisẹ̌, hamụ e mahuakẹ dingangu namuhẹ̌ e mělẹ̌holo manga lelange.

²⁰Iạ e měngkate hanesẹ̌ dẹ̌daloěngu kěbị taumata, dingangu ren tawẹ běke u katoghasẹ̌ku e seng kakạkohone.

²¹Taumata e měngkạděmmasẹ̌, kamagengu iạ e měngonggọu sasasa; kal᷊awọu waweraku e rẹ̌daringihang i sire mauwuhẹ̌.

²²Masu e waweraku e, sen tawẹ apa hinong tambaěng; bawera e sụsuẹ̌ kere tatědọu tahiti.

²³Kěbị taumata e rụdaẹ baweraku e ringangu ral᷊uasẹ̌, mẹ̌sul᷊ungu mělahěnsinuange rụdaẹ tahiting tempong pẹ̌bawurạ u manga bungang.

²⁴Kụ lụhěming si sire su tempong i sire e kẹ̌kahěpusangu tiněnna e; gatiku matal᷊uahẹ̌ e sauneng makạbahansang si sire e.

²⁵Seng iạ e mạngumbelẹ pul᷊ung kawasa e, ringangu mạngal᷊ạ kal᷊awọu putusang. Takụ lẹ̌ahakeng i sire e kere ratu su tal᷊oaran buntuange, dingangu takụ lẹ̌hiborang i sire e su tempon susa naung i sire.