Read Sangir AYUB 3 Bible Online

AYUB 3 - Sangir bible

AYUB 3

¹ Bọu e i Ayub nanětạ e nẹ̌bisara ringangu něngane ěllong kal᷊aiwantele, angkuěnge,

²”O Ruata, aneiko ěllong kinawantelangku ringangu hěbing iạ nanětạ su gandongang i ninangku!

⁴O Ruata, koạko ěllo ene marěndung, dědasẹ̌ko wọu ěndumangʼU sarang pakapuạ; kumbahangbe i Kau e mapakawalang lai tualagẹ̌ mahamagẹ̌ e sumarang.

⁵Koạko ěllo ene e mitung pal᷊usẹ̌, marěndung maěllị, mal᷊ěbuhẹ̌ dingangu masul᷊akọ; takatengkoʼm binawa kụ pakatukusẹ̌ lingkuweko wọu sěnnangu matangěllo e.

⁶Mal᷊owọko hěbi ene pakailang bọu rekenangu taung ringangu wul᷊ang; kụ tawahal᷊uase lai tẹ̌tiwakeng manịen tawe lai pakiwilang.

⁷Balạekere lai hěbi ene napenẹ u kararěndung, tawẹ pẹ̌kakakěndage, tawẹ dal᷊uasẹ̌.

⁸Ei taumatang ampuang dingangu tatal᷊ing Lewiatan,[6] ěnsakeko ěllo ene ringangu pẹ̌sasalu ringangu laane;

⁹kumbahang sarang bituing kejora suměnnang abe wala tualagu wěmbanaho e suměnnang! Walạekere hěbi ene tawẹ kěhase měngampal᷊ẹ̌ darěntang ěllo ringangu ol᷊ang buhu.

¹⁰Kai wontogẹ̌ su hěbin silakạ piạ iạ niwantelʼi ninangku, dingangu niwala niapěnal᷊udẹ̌ sunsara.

¹¹Kawe unụ e iạ tawe nate su ral᷊ungu gandongang i ninangku, arau napinsul᷊ẹ̌ singongo su piạ iạ kinawantelẹ̌ e tangú?

¹²Kawe unụe iạ nilahěkutang i ninangku kụ nisarul᷊une ringangu nipasusune su totọ e ruam běka?

¹³Kai manga su tempo ene iạ napul᷊ẹ asal᷊ẹ̌, tangu iạ nẹ̌tikị dingangu něngirul᷊e mapia,

¹⁴kerẹewe mararatu ringangu mangangawasa nạung kal᷊imona, kụ němangung kapia istana tempo nạung kal᷊amona-mona.

¹⁵Iạ e kinahuntikilang kere ahusu ratu, kụ něloho wal᷊ene ringangu sal᷊aka kal᷊aukang u wul᷊aeng.

¹⁶Unụe iạ tawe nipěhanạ tawẹ niawane, tadeakengu tikịku e mal᷊ěna-l᷊ěnabẹ̌ dingangu mal᷊ehẹ?

¹⁷Paị sene su ral᷊ungu lěbing, iral᷊akisẹ̌ e tawe nẹ̌koạ dal᷊akisẹ̌, dingangu mantorosẹ̌ kụ kinasueěngu toghase makạpěngirul᷊e.

¹⁸Kerene lai apang kinatawenge nakapěndangbe nawatụ kapulune nal᷊iwirẹ̌ bọu lahěkadu manga měndariagạ.

¹⁹Paị sene kěbị taumata mẹ̌sul᷊ung: apan timeleng dingangu apan tawe ikasasěbạ arenge. Dingangu apang ěllange pangěnsueěnge tangu nal᷊iwirẹ̌.

²⁰Unụe taumata měngkate niwala měbẹ̌biahẹ̌ sunsara? Unụe tualagẹ̌ e kawe nighěllị suapang měmpẹ̌lutu?

²¹ I sire limembong puluang su lěbing sul᷊ungu su arětạ, mạngampal᷊ẹ̌ papate, kaiso mang tawe rimẹ̌děnta.

²²Karal᷊unsemahẹ̌ e wuhụ e kapěndangeng kereu i sire mate ringangu ilẹ̌bing.

²³Tempon sire ramahi e nitimbuhungangu Ruata, i sire nilikutangʼE wọu kěbị tampạ.

²⁴Laaweng kaěng ute lụlahunsusa, tawẹ ědone iạ e mẹ̌kẹ̌kabaratang.

²⁵Patikụ apang takụ ikẹ̌kaghěnggang, nahumagẹ̌ si siạ, patikụ apang kẹ̌katakụku, seng něngambung si siạ.

²⁶Si siạ e tawẹ apa karal᷊enehẹ̌, iạ e mang masigěsạ tawẹ umpade.”