Read Sangir AYUB 30 Bible Online

AYUB 30 - Sangir bible

AYUB 30

¹Arawe ini e iạ tẹ̌tahumeangu taumata apang limembong kangudạ e. Nạung kal᷊amona e i amang i sire e takụ kẹ̌koateng kere tumanịu masanạ baugu ipělukadẹ̌ dombaku ringangu asung lukadẹ̌.

²Si siạ e i sire tawẹ gunane batụu kawe seng tawẹ toghasʼi sire.

³I sire něngkahutung dingangu apạ e masigěsạ kahěngang, hakịu kụkaěng hamụ mahěgu su wanua l᷊inggi lụhio.

⁴I sire měmpạngěbụ kěhu su wanua l᷊inggi e mase mạhungkaěng daukalune arau l᷊ai hamụ e.

⁵I sire lẹ̌userang dingangu lahěkadẹ̌ kere něnguserẹ̌ tahatako.

⁶I sire mạtanạ su ral᷊ungu manga liang; su manga lohange su manga sindungu wul᷊ude mạkoạ bal᷊en sire.

⁷Su kěhu i sire e měmpẹ̌kẹ̌kiaratagẹ̌ kere binatang, měmpẹ̌kẹ̌kamonaěng su al᷊ungu manga ghahundungu rěmpugẹ̌ su ral᷊ungu kěhu.

⁸I sire tawẹ arenge, ringangu tawẹ arẹ̌gane, taumata e kụ seng nịdal᷊iwuaheng bọu wanuane.

⁹Orasẹ̌ ini e i sire riměnta arawe iạ e lělẹ̌geěnge; waugʼi sire e iạ ini e kai pal᷊ahul᷊ẹ̌geěng i sire samatang.

¹⁰Iạ e irẹ̌dekeng i sire mahina ringangu mahasa, sarang gatiku e lẹ̌ěduang i sire.

¹¹Ual᷊ingu Mawu Ruata e napakariading iạ e lome ringangu tawe makakoạ manga apa, tangú i sire e němpẹ̌buntiageng bawal᷊uang i sire.

¹²Ghapaěng i sire e němpěngalọ e si siạ bọu těngoku, kụ kananawoku e kẹ̌karakiang i sire.

¹³I sire němotọ dal᷊engku e mědeạu měnilakạ siạ; tawẹ u sarang sěngkatau měnuhaghe,[45] piạ i sire němpěngalo.

¹⁴Mẹ̌sul᷊ungu lěba i sire e němpěnope meselu pẹ̌kakěllungangku e; měmpẹ̌gẹ̌gihingang i sire e nahunděnta měmpěngěpisẹ̌ badangku e.

¹⁵Katatakụ e tạ sihinge něliwung batangengku; kere tatiụ u anging, arěgam batangengku e napaghohẹ̌; tabidạu winawa simahe e, napuạ tawe dise karal᷊unsemahẹ̌ku e.

¹⁶Kụ ini e seng maraning papateku e; tawẹ apa kal᷊ahaěng baugu sigěsạku.

¹⁷Su tempong hěbi e kal᷊awọu ruhiku e ghugiadẹ̌; pěndangu tědụ e měngkai sěntiniạ mạnusụ tạ irul᷊ene.

¹⁸Duata e mẹ̌lẹ̌hěngkung siạ su l᷊ehẹ u kamejaku hakịu pakeangku e mělẹ̌hakụewe wadangku e.

¹⁹Iạ e wẹ̌bahungang sol᷊ong dal᷊ungu manga lěbo, kẹ̌koateng kere onasẹ̌ e marihutu.

²⁰Iạ e mẹ̌tẹ̌tahimokoi si Kau, o Ruataku, i Kau e tawe nangonggọu sasimbahe; kereu iạ mẹ̌kal᷊iomaneng, i Kau e tawe rumararingihẹ̌.

²¹I Kau e tumanịu mahasa si siạ, dingangu iạ e měngkai sẹ̌sẹ̌dakengu ringangu kasěllahu toghasʼU e.

²²Iwẹ̌balanʼU anging e apatělạ u e iạ; su ral᷊ungu anging mal᷊aihạ e iạ e ipěnanalang e wadangku e.

²³Iạ masingkạ, iạ itẹ̌tondanu su alangu papate, tampạ u patikụ taumata wiahẹ̌ e tampungang.

²⁴Unụe i Kau e měngalo taumata nasilakạ, kụ tawe makakoạ manga apa tabeạu katewe makịtul᷊ung tangú?

²⁵Bal᷊inewe iạ sụsangị dingangu taumata mạsusa, ringangu kụkěndagẹ̌ su taumata apang biahe masusa tangú?

²⁶Iạ e mělẹ̌harapẹ̌ karal᷊unsemahẹ̌ e ringangu tualagẹ̌, kaiso sigěsạ dingangu kararěndunge měngkawe sụsongo.

²⁷Iạ e naghaghonaị u susa naung dingangu kapapěndụ; ěllo-ěllo mang kakạl᷊awọe wěhạ lụhombang.

²⁸Su kararěndung, tawẹ tualagẹ̌ e, iạ e mẹ̌kẹ̌kakiling; iạ dụdarisị su těngon lawọ e mẹ̌dẹ̌dorong tul᷊umang.

²⁹Tingihẹ̌ku e napenẹ u sasangị dingangu susa naung kere sasangị u ral᷊ugẹ̌ dingangu manụ onta.

³⁰Pisiku e nẹ̌těngkitung; badangku e natutungu lěhabẹ̌.

³¹Nạung kạngerẹ e takụ ikẹ̌karingihẹ̌ musikẹ̌ u ral᷊uasẹ̌ e arawe ini e kětạeng sasangị samatang.