Read Sangir AYUB 31 Bible Online

AYUB 31 - Sangir bible

AYUB 31

¹Iạ seng nẹ̌kědo piạ pẹ̌sasalune, u iạ e tawe měmanda mahuala kụ piạ sahigẹ̌ku.

²Kai apạ e koatengu Ruata e waugʼi kitẹ e tangú? Kereapa pěmamal᷊ise su kakanoạ u taumata?

³Silakạ dingangu hombange nal᷊ahẹ u iaparěntane waugu taumata apang měmpẹ̌kẹ̌koạ dal᷊akisẹ̌ e!

⁴Mawu Ruata e semben tantu masingkạ u kal᷊awọu kakanoạku; ikasilo-Ne kal᷊awọu ral᷊empangku e.

⁵Iạ e mẹ̌salu u tawe nẹ̌kẹ̌koạ hal᷊ẹ̌ u měngakal᷊ẹ̌ e; dingangu tawe nẹ̌lẹ̌linga taumata.

⁶Balạe Mawu Ruata pẹ̌timbang si siạ su wowon timbangengu katul᷊ide, kụ i Sie makakasingkạ u iạ e tawẹ sal᷊aku.

⁷Manga andene iạ e seng nělenga wọu ral᷊eng matul᷊idẹ̌ e, arau naungku e mạbol᷊eng su hal᷊ẹ̌ u ta mẹ̌tatahino, mạengu limaku e nẹ̌sataru rosa e,

⁸tangú walạe taumata wal᷊ine apakaěng u apan takụ nisuang, kụ kal᷊awọu ghẹ̌sim banuaku e nagholọ.

⁹Manga andene iạ e wọu mạbae su manga kawingu hapị su l᷊ampung, kụ kapẹ̌kěmbunine mẹ̌pahimang bọu manga l᷊ikudu tukadẹ̌ e,

¹⁰tangú balạekere kawingku e pěnanasạ e waugu taumata wal᷊ine; kụ balạe pẹ̌tatikị e i sie su katatikilangu esẹ bal᷊ine.

¹¹Kereu rosa tatingkaị ene e mamben takụ kinoạ ute iạ e mambeng hinone makaěbạ hukumang.

¹²Dosa ene makạbinasa kere putungu naraka, kal᷊awọu apan tẹ̌taghuanengku e masuen tutunge.

¹³Piạ e ěllangku e kụkahiorọ u hakẹ̌ e takụ niapẹ̌sal᷊a, takụ daringihang i sie ringangu takụbe pandungangu naungku wurẹ̌si i sie.

¹⁴Kamageng tala, kereapa wue iạ mẹ̌těngon Duataku? Kai apạe sasimbangku su tempong i Sie ruměnta měhukung iạ?

¹⁵Kai wal᷊inewe Mawu tangú něndiadi si siạ, něndiadi lai manga ěllangku ene e tangú?

¹⁶Tawẹ běke iạ kụ tawe nẹ̌tul᷊ung u taumata kasiang, arau napakawalang manga wawine wal᷊u e měbẹ̌biahẹ̌ lụhumpinausang.

¹⁷Tawe takụ niwẹ̌bala manga rariọ kasisi ěndusẹ̌ e karal᷊unuse, kụ iạ sẹ̌saku e kawe mahěmpal᷊iu kaěngku e.

¹⁸Den dokeng darodọ i sire takụ lẹ̌hikinang; kanandung pẹ̌bawiahẹ̌ku e i sire takụ lẹ̌ahakeng.[46]

¹⁹Kereu takụ ikasilo taumata apang kasiang, tumanịu masigěsạ makawělli pakeang,

²⁰takụ ipakatětị u pakeang wolẹ̌ bọu dombaku hala e, kụ i sie lụluasu iạ e ringangu kasěllahu ral᷊ungu naung.

²¹Mangawe iạ e wọu měnẹ̌nigěsạ apang kasisi ěndusẹ̌ e, batụu maiaking u makauntu su pěrkaraku,

²²tangú manilaing masape takiahẹ̌ku ruam běka, hakịu mẹ̌tal᷊ei wọu wěmbangku e.

²³Iạ e tawe mẹ̌koạ kerene, batụu hukumangu Mawu Ruata e apawe makạkedọ dal᷊ungu naungku e.

²⁴Tawe měngangumbala su arětạku e iạ e,

²⁵arau lụl᷊esạ u kakakalạku.

²⁶Iạ e tawe nẹ̌sẹ̌suba matangěllo kụ sụsěnnang matualagẹ̌ arau wul᷊ang sụsarang mapaelẹ̌ e.

²⁷Iạ e tawẹ běke kụ mạbae si sie arau takụ lẹ̌lewaěng limaku e waugu měngadatẹ̌ si sie.

²⁸Gahịu rosa kerene e hinong makahombang hukumang papate; batụu Ruata Limembong Kawasa e seng nipẹ̌sunial᷊ẹ̌.

²⁹Tawẹ běke iạ e lụl᷊uasu sědụku e masigěsạ, arau lụl᷊uasẹ̌ ual᷊ingu i sie e nakahombang silakạ.

³⁰Iạ e tawe mẹ̌kakal᷊iomaneng baugu kapapaten sědụku; tawe nědẹ̌dosa kerene iạ e.

³¹Apang mělahal᷊ẹ̌ dingangku e masingkạ, u walạewe i sai takụ tangkianeng su wal᷊eku.

³²Bal᷊eku e mạtatope waugu taumata mẹ̌dẹ̌daral᷊eng, tawe takụ ipakawala i sire e apětikị su raral᷊engang.

³³Taumata wal᷊ine e měmẹ̌muni rosane, arawe iạ e tawe nẹ̌kẹ̌koạ kerene.

³⁴Kapulung lawọ e tawe ikatakụku, ringangu lahinakangu taumata e tawe takụ pandungang. Tawẹ tanạem bal᷊e iạ e arau měngkawe tạ kěndịku, kětạeng ual᷊ingu mạtakụ u sarung tahumeang.

³⁵Kai tawẹu mapulu rumaringihẹ̌ baweraku tangú? Takụbe saluang u kahěngang bue kěbị ene. Mal᷊owọko Limembong Kawasa e sumimbang si siạ. Mangạewe laěnsilu sědụ si siạ e kěbị e bohekang hakịu kěbị e takụ ikasilo,

³⁶tangú ringangu mal᷊uasẹ̌ takụ saketang su wěmbang, kụ tabidạu makota takụ irěkạ su těmbọku.

³⁷Takụ sarung ihabarẹ̌ su Mawu Ruata kal᷊awọu kakanoạku; dingangu takụ tatěngoěng i Sie ringangu ral᷊uasẹ̌ ore lai těmbọ kạl᷊ahengkẹ.

³⁸Manga andene ěntana takụ nikal᷊i e seng takụ tinako e, ringangu takụ nipul᷊aho wọu taghuange tutune,

³⁹ringangu andene ual᷊ine sen nasueng kaěnge kareạku e, ringangu mělahěnsinuange takụ niwala pinakal᷊unusẹ̌ e,

⁴⁰balạekere wal᷊inewe ghẹ̌tung dingangu gandung e timuwo su rahami e, kaiso kawe sumpinị dingangu ěhe.” Sarang ini e wawerang Ayub.