Read Sangir AYUB 32 Bible Online

AYUB 32 - Sangir bible

AYUB 32

¹Ual᷊ingu i Ayub maiaking kahěngang su hal᷊ẹ̌ u katul᷊idu watangenge, tangu manga hapị e tatěllu e tawe mapulu l᷊ai sumimbang si sie.

²Kaiso sene piạ sěngkatau arenge i Elihu anạ i Barakheel, sěngkatau hěnton Bus bọu ghal᷊ipohong Ram. I sie seng tawe makakědang u pědune, batụu i Ayub kai mạpakạtul᷊idu watangenge hala mase mapẹ̌sal᷊an Mawu Ruata.

³I sie mal᷊aing nẹ̌pědu su manga hapị i Ayub sire těllu e ual᷊ingu i sire tawe makararendehẹ̌ manga wawerang Ayub, maningbe i sire mapẹ̌sal᷊an sie.

⁴I Elihu nakoạ kangudakenge wọu tal᷊oaran sire e, ual᷊ingu ene i sie mạngampal᷊ẹ̌ sarang kěbị-kěbị e masuem bisarane.

⁵Sarangke nakasilọ e u i sire těllu ene e tawe makasimbahẹ̌, i sie nẹ̌pědu,

⁶kụ nẹ̌bera kere ini, ”Iạ e wědang mangudạ, arawe i kamene e seng maghurang, ual᷊ingu ene iạ e matakụ dingangu tạ kumbalaku maul᷊ị u ěbạku e.

⁷Su tiněnnaku e, i kamene e harusẹ̌ mẹ̌bisara, u kaghaghurange hinong mẹ̌gaghelaru pelesane.

⁸Arawe mẹ̌gaghěllịu kapelesa su taumata e, samatang Rohkẹ̌ u Mawu Limembong Kawasa.

⁹Taumata e mạkoạ pelesa e, wal᷊inewe ual᷊ingu umbure marangẹ; taumata makạěnna kahěngang e, wal᷊inewe kawe ual᷊ingu umbure marangẹ.

¹⁰Ual᷊ingu ene, daringihẹ̌ko si siạ; pakawalako iạ deng maul᷊ịu tahuěnnaku.

¹¹Dingangu kasasabarẹ̌ iạ e rụdaringihẹ̌ bue piạ i kamene kapẹ̌bẹ̌berane, ringangu měngẹ̌ngampal᷊ẹ̌ piạ i kamene kạdeạ e manga wawera mẹ̌tatal᷊ahino e.

¹²Takụ kẹ̌kakěllaěng pakatitị; takụ kinaringihẹ̌ u i kamene nẹ̌bal᷊unsengehẹ̌. Pẹ̌sasal᷊a su ral᷊ungu manga wawerang Ayub tawe ikal᷊ahẹ i kamene.

¹³Kai ikawerang kamene kereapa tangú! u kapelesa e kawe seng kinahombangeng i kamene? U i kamene kawe nasihasa něngaku. Makasimbahẹ̌ si Ayub samatang katewe Mawu Ruata.

¹⁴Seng si kamene ini e i Ayub nẹ̌bera, kụ wal᷊inewe si siạ, arawe iạ e sarung tawe měngonggọu sasimbahe kere i kamene.

¹⁵Ayub, i sire e niwingọ e, kụ tawe nakaghěllịu sasimbange; tawẹ apa kụ ikaweran sire.

¹⁶I sire e měngkate rimarisị kerene, kai semben tawe makawera l᷊ai. Kai harusẹ̌ měngampal᷊ẹ̌ iạ e tangú manimbe i sire e měngkate marěmasẹ̌ e?

¹⁷Tala wue, ini e hědon takụ simbaheng; tiněnnaku e hědowen takụ ihabarẹ̌.

¹⁸Selain tawe makararagẹ̌ iạ e měngampal᷊ẹ̌. Sen tawe ikapetọ baweraku e.

¹⁹Mạengu iạ e měngkate marěmasẹ̌, ute mạběka e iạ e, mẹ̌sul᷊ungu kawihẹ̌ napenẹu anggorẹ̌ buhu.

²⁰Iạ e harusẹ̌ mẹ̌bisara, tadeạu naungku e mal᷊enehẹ̌; iạ e harusẹ̌ měmuka mohongku e ringangu měngonggọu sasimbahẹ̌ku.

²¹Tawẹ u takụ tatawangeng walạewe měnsang i sai wue su ral᷊ungu sidarạ ini e, dingangu tawẹ u lai sarang sěngkatau takụ daloěng.

²²Kakakoạ u mẹ̌mahansang tangú iạ e wěga wue, kụ mangawe andene iạ e mẹ̌kẹ̌koạ ene, Duata e sarung lighạ měhukungu iạ.