Read Sangir AYUB 33 Bible Online

AYUB 33 - Sangir bible

AYUB 33

¹Kụ ini e, ei Ayub, daringihẹ̌ko pakapia manga wawera takụ ihabarẹ̌ ini.

²Iạ e seng sadia měhabaru manga wawera ene.

³Dingangu naung matul᷊idẹ̌ iạ e mẹ̌bisara, takụ iwera ini e ute kai kahěngang.

⁴Rohkẹ̌ u Mawu Ruata e sen něndiadi si siạ dingangu něngonggọu pẹ̌bawiahẹ̌ e si siạ.

⁵Kụ, kereu wotonge, simbahẹ̌ko siạ. Diahiko sasimbahu.

⁶Baugu Mawu e, i kau e ringangu iạ e tawẹ pẹ̌tatěntangenge, bọu ěntana masipul᷊ụ kěbị i kitẹ e kinoạʼE.

⁷Kụ tawahal᷊uasu i kau e matakụ u iạ; iạ e tawẹ tiněnnaku mapulu měmatạ si kau.

⁸Kụ, sen takụ kinaringihẹ̌ apan niweranu e, kụ iạ e nakaěnna apa karakinu e.

⁹I kau e nẹ̌bera, ’Iạ e wurẹ̌si, tawe nẹ̌koạ pẹ̌sasal᷊a. Iạ e tawẹ turạ e, ringangu tawe nẹ̌koạ pẹ̌sasal᷊a.

¹⁰Arawe Mawu Ruata e mědẹ̌deạ banggilu rumokạ siạ, ringangu nikoạ e iạ kere sědụ.

¹¹ I Sie něnangẹ u hante su l᷊aedẹ̌ku; ringangu mạnitị kal᷊awọu kakanoạku.’

¹²Ei Ayub, tiněnnanu e mamben nẹ̌sal᷊a! Batụu Ruata e limembong kasěllahe wọu taumata.

¹³Unụe i kau e mạnoke Mawu Ruata u i Sie tawe mẹ̌papandung kakahiorọ u taumata?

¹⁴Mawu Ruata e měbẹ̌bisara ringangu ral᷊enge haghi, kaiso tawẹ u sarang sěngkatau rụdaringihẹ̌ bawera-Ne.

¹⁵ Ene piạ e taumata kạpahuntikị e mal᷊ěnabẹ̌ su tempong hěbi su ral᷊ungu ipi ringangu papasilo e, Ruata nẹ̌bisara.

¹⁶Mawu Ruata e něngoro si sire apararingihẹ̌; kụ nihěkosangʼE i sire ringangu sasasa.

¹⁷Timona-Ne tangú mědeạu i sire pěngědo mẹ̌dosa ringangu měněntangu obotʼi sire.

¹⁸Tawe nipakawala i sire ipakagholọ; kaiso kawe niěllungʼE i sire wọu papate.

¹⁹Ruata e naněntiro si sire kụ naparěntan sakị, hakịeweng badang i sire tinalung makạpěndang tědụ e.

²⁰Masasakị e kinailangengu pěndangu kumaěng, sarang lai kaěng kasědapěkange mal᷊aing makạmuta.

²¹Badange nahusụ marasai, manga ruhine nasue liměto.

²²I sie seng masarạ mate kụ tampạ u tau nate e seng masandigʼi sie.

²³Aramanung sěmbaụ bọu tal᷊oarang sěhiwu malạekatu Mawu Ruata e relaim mapẹ̌tahěndungu taumata su munarane, sarung duměnta mẹ̌tul᷊ung i sie.

²⁴Dingangu naunge masusa malạekatẹ̌ e hědong mẹ̌bera, ’Pěllọ e i sie, tawe wotonge i sie rumẹ̌sung sol᷊ong tampạu taumata nate. Ini e roitẹ̌ tatubusẹ̌, tadeạu i sie mal᷊iwirẹ̌be lai.’

²⁵Badange sarung makoạ matogha-toghasẹ̌, mahuweka kere mangangudạ.

²⁶Kereu i sie mẹ̌kal᷊iomaneng, Ruata e sarung kuměndagʼi sie, tangú i sie sarung mẹ̌dalo Mawu ringangu ral᷊uasẹ̌ kụ Duata e sarung mapakaul᷊ị u kakakoạ e.

²⁷Tangú su těngon lawọ e i sie sarung měhengetang, ’Apang dal᷊akisẹ̌ e irekengu mapia wue, masaria rosaku, kaiso Ruata e tawe měhukungu iạ.’

²⁸Duata e měsẹ̌sěding u iạ makoạ sol᷊ong tampạu tau nate, hakịu iạ e mang biahẹ̌ sol᷊ong orasẹ̌ ini.

²⁹Masau su sul᷊ene, Mawu Ruata e seng něndal᷊engu patikụ ini e,

³⁰tadeạu i Sie makaambangbe taumata ringangu měngonggọu karal᷊unsemahẹ̌ su pẹ̌bawiahe.

³¹Tangú raringiheko i Ayub, kụ taingko tul᷊i, karěmasẹ̌ko, u ini e kai iạ mẹ̌bisara.

³²Kai kereu piạu iweranu e, ute pẹ̌berạe; kụ kereu i kau e kahěngang, ute iạ e sadia wue mangaku e.

³³Kai kereu kawe tala wue ute, karěmasẹ̌ko, ringangu raringihẹ̌ko siạ; iạ e hědong maněntirong kapelesa e si kamene.