Read Sangir AYUB 34 Bible Online

AYUB 34 - Sangir bible

AYUB 34

¹Kai wal᷊inewe pande i kamene ringangu matahuěnna tangu? Kụ daringihẹ̌ko kal᷊awọu waweraku ini e.

³Taumata e masingkạ u wiahẹ̌ masědapẹ̌ kereu makatemang, ringangu kal᷊awọu wawera mapapia e kereu ikaringihe.

⁴Kul᷊ịdal᷊ange ini e hinong parikẹ̌saěng i kitẹ e, mase pẹ̌tatibuluang i kitẹ lukaěng.

⁵Angkuěng i Ayub, ’Tawẹ apa pẹ̌sasal᷊aku, kaiso Mawu Ruata e tawe mapulu měngonggọu kạadilẹ̌ e si siạ.

⁶Iạ nirekenge nẹ̌konti, ual᷊ingu nẹ̌bera u iạ e tawẹ dosaku. Ini e iạ nal᷊esẹ marasai, maniweng iạ e tawẹ sal᷊aku.’

⁷Bọu makạsilo tangú i kamene taumata kere i Ayub ini? I sie mělẹ̌langehẹ̌ Mawu Ruata masaun sul᷊ene.

⁸I sie mapulu mẹ̌dal᷊ahapị u taumata duruhaka ringangu mẹ̌dal᷊aụ u taumata ral᷊akisẹ̌.

⁹I sie nẹ̌bera, u apawe sia-sia kereu i sie mẹ̌tawakal᷊i mẹ̌koạ kapulun Duata e.

¹⁰Ei taumata pelesa e, raringihẹ̌ko! Sen tumanịu Duata Limembong Kawasa e mẹ̌koạ pẹ̌sasal᷊a.

¹¹ I sie mělẹ̌hěgisẹ̌ taumata e kasariạeweng kakanoạ e, miěbạ i sie tuhụewe su kalakuange.

¹²Duata Limembong Kawasa e tawe mẹ̌kakoạ dal᷊akisẹ̌; kěbị taumata e nighěllirangu kạadilẹ̌.

¹³Bọʼi sai tangu Ruata e něnarimạ u kawasa-Ne? I sai tangu piněnarakanengu wanua ini e si Sie!

¹⁴Manga andene Ruata e něnawụ niawan taumata e, kụ něngal᷊ạ kapia singongom pẹ̌bawiahe,

¹⁵tangu nate e kal᷊awọu riadikang piạ niawane, kụ taumata e nasul᷊e nakoạ awul᷊ẹ̌.

¹⁶Kụ, kereu i kau e pelesa, ute kakěllạ e, taingko tul᷊inu kụ daringihẹ̌.

¹⁷Kụ Duata adilẹ̌ dingangu mahěgisẹ̌ ene ipẹ̌sal᷊anu tangu? Kụ apa i kau mạngěnna u Ruata e kai měbẹ̌binsị u kạadilẹ̌ e?

¹⁸Duata e mělẹ̌hukung datu ringangu měngangawasa kereu i sire e ral᷊akisẹ̌ dingangu duruhaka.

¹⁹I Sie tawe měnanumběka mararatu e, arau mạngapia taumata kalạ e něngalembo wọu tau kasiang. Batụu i sire e kawe riadikangʼE.

²⁰Kẹ̌kal᷊oarane e, i sire wotonge mate sěngkělěndị e. Duata e měhukungu měngangawasa ringangu i sire e mal᷊aing mawinasa; tawẹ susane i Sie měmate taumata mal᷊ahasa.

²¹I Sie tụtitị pẹ̌bawiahu taumata, kụ kẹ̌kasilo-Ne kal᷊awọu ral᷊empange.

²²Tawẹ apa kararěndung, kereapa wue kaěllị e, makạbuni apam baradosa e.

²³Tawahal᷊uasu Mawu Ruata e měmoěngu tempone,[47] taumata ruměnta mědeạu ghutaěngʼE.

²⁴Tawẹ sẹ̌suine ringangu parịkěsane i Sie nělohosu měngangawasa ringangu mělahengkẹ měngangawenge.

²⁵Batụu i Sie mạsingkạ u apang koateng i sire; kụ i Sie mapakal᷊enggen sire ringangu mapakagholọ i sire su tempong hěbi.

²⁶NiperunʼE i sire ual᷊ingu rosan sire, i sire nihukungʼE su těngon lawọ.

²⁷Batụu i sire tawe timuhụ kapulunʼE, ringangu tawe mẹ̌papandung kal᷊awọu laoro-Ne.

²⁸I sire nakawodaị tau kasiange měngkasusa naung i sire, kakiạ i sire e ikẹ̌karingihu Ruata.

²⁹Kereu Mawu Ruata e mẹ̌berau měngkate karěmasẹ̌, tawẹu sarang sěngkatau wahani měněngkul᷊ẹ̌. Kereu i Sie měmuni ghati-Ne, tawẹ u sarang sěngkatau makahombang.

³⁰Tangú manga wansa e tawe makatohạ měnahaghe kawasang pěngangěpisu i ral᷊akị.

³¹Ayub, kụ dosanu e sen niakunu su Mawu Ruata tangu? kụ sem bọu nẹ̌kědo u semben tawe lai mẹ̌dosa?

³²Sem bọu nirorongangu tadeạu rosanu e ipakal᷊ahẹ e tangu? Kụ sem bọuwe nẹ̌salu i kau mangědong kakanoạ u ene tangu?

³³Tumanịu wue Mawu Ruata e sarung mẹ̌gěllịu apang ilẹ̌ěnningu e, sarangke kakanoạ u Ruata e tawe kireěngu. Ini e, hinone i kau harusẹ̌ měmutusẹ̌ bal᷊inewe iạ. Pẹ̌berạe kai a su ěnnanu!

³⁴Kal᷊awọu taumata pande man sarung mal᷊uasẹ̌; u taumata pelesa apan dụdaringihẹ̌ si siạ e sarung mẹ̌bera

³⁵u i Ayub mẹ̌bisara e tawe makal᷊aěnna, u wawerane e tawẹ mangal᷊ene apa.

³⁶Kereu manga wawerang Ayub pandaěng pakatitị e sarungbe mal᷊ahẹ u wisarane kai mẹ̌sul᷊ungu tau ral᷊akisẹ̌ e.

³⁷Pẹ̌sasal᷊ane tambaěngko l᷊ain dingangu rosa sěmbaụ; i sie nẹ̌pahuwungkadẹ̌ su těngom Mawu, ringangu mělahinakang su těngong kitẹ.