Read Sangir AYUB 37 Bible Online

AYUB 37 - Sangir bible

AYUB 37

¹Děllang e nakawintogẹ̌ si siạ dingangu pẹ̌pusoku e tụtaghawahẹ̌.

²Pẹ̌daringihẹ̌ko tingihu Ruata e, ei kamene kěbị e; daringihẹ̌ko rěllụ suměbang bọu mohongʼE.

³Sol᷊ong kasěllahu l᷊angị e, kilạ e niringọ e rěllụ e sol᷊ong kal᷊awọu pondol᷊u dunia e.

⁴Bọu ene, kinaringihe tingihe ghimal᷊ědụ, tingihu rěllụ nẹ̌dahenesang dingangu rěllụ; su tal᷊oarang tingihẹ̌ mẹ̌gẹ̌gaghiandul᷊ẹ̌, mase rěllụ mẹ̌kẹ̌kilạ mẹ̌sẹ̌sasahedẹ̌.

⁵Ual᷊ingu laorom Mawu Ruata e, tangu kal᷊aherange mamben nariadi, manga hal᷊ẹ̌ makạdal᷊inaụ kụ tawe kahěnganeng i kitẹ.

⁶Saldu e tụtahěnnạ su dunia e ute kai ual᷊ingu parenta-Ne; tahiti masuwenehẹ̌ e rimasehẹ̌ ual᷊ingu laoro-Ne.

⁷Niědone munaran taumata e tadeạu i sire masingkạ u i Sie kapẹ̌lẹ̌hal᷊ẹ̌ e.

⁸Kerene lai binatang dul᷊u e nasue su ral᷊ungu lohange ringangu liange, kụ nẹ̌kěmbuni su tampạ e.

⁹Bọu sěmběkan timuhẹ̌ nisěpukangu rěllang maihạ ringangu wọu sěmběkan sawěnahẹ̌ e rahěndong e měnẹ̌nisị.

¹⁰Singongon Duata e makạkompelẹ̌ bowong akẹ kereng kawěnahe, makoạ eisẹ̌ makětị.

¹¹Binawa e nilohoěngu akẹ, dingangu winawa matualagẹ̌ e nituahengu kilạ.

¹²Manga winawa timěllạ sol᷊ong kasěllahu dunia e, ual᷊ingu parentan Duata e i sire nẹ̌kakanoạ balạewe sol᷊ong apa.

¹³Duata e něngonggọu tahiti waugu ipěholo ěntana arau l᷊ai waugu ipěhukung taumata, aramanung lai waugu mapatodẹ si sire, u enẹ e kasariane kakěndage kụ tatapẹ̌ sarang marěngụ-děngụ.

¹⁴Pakarěmmasẹ̌ko kadodọ tempo, ei Ayub, kụ daringihẹ̌ko; tatingangko kal᷊awọu karal᷊inaụ u Ruata e.

¹⁵Masingkạ bue i kau kereapa Ruata e mẹ̌gěllịu parenta, hakịu kilạ e suměnnang bọu winawa ringangu langị e?

¹⁶Masingkạ i kau e kereapa manga winawa e tụtěllạ, ual᷊ingu kapanden Duata e makạdal᷊inaụ e?

¹⁷Tala i kau e kětạeng makakahiorọ u nal᷊ěhabẹ̌ e kereu wanua e sawědaěng angingu timuhẹ̌ e.

¹⁸Makakoạ i kau e kere Mawu Ruata e měmilạu sarul᷊uange ringangu mapẹ̌tungkětị e kere uase niwěmbing arau kaca?

¹⁹Těntiroiko i kami e kai apạe hinong iwerang kami e su Mawu Ruata; tawẹu ikatualagʼi kami, u tiněnnang kami e kai tạ l᷊ohone.

²⁰Iạ tawe mapulu mẹ̌dorong mẹ̌bisara su Mawu Ruata, kibasinẹ u i Sie makareạ alasange mapakasilakạ u iạ.

²¹Ini e sěnnangu l᷊angị e enẹ e katualage hakịu makal᷊angị mata; anginge namurẹ̌si langị e kahian tatiụ e.

²²Tualagẹ̌ mẹ̌běmbul᷊aenge siměpụ su sěmběkan sawěnahẹ̌, ringangu kawawantugu Ruata e makạdal᷊inaụ naung i kitẹ e.

²³Ene e kasěllahe kawasang Duatang kitẹ e; tawe makaumal᷊ẹ̌ i kitẹ dumani si Sie, i Sie matul᷊idẹ̌ dingangu adilẹ̌ sěntiniạ e; tawẹ běke i Sie e mạnẹ̌dạ taumata e.

²⁴Kai ual᷊ingu ene hakịu i Sie hinong adateng i sai-sai, ringangu taumata apang mạngaku pelesa e, tawe papandungange.”