Read Sangir AYUB 38 Bible Online

AYUB 38 - Sangir bible

AYUB 38

¹Bọu ene wọu ral᷊ungu rěllang MAWU e něhengetang si Ayub kere ini:

²”Kai i sai i kau e, hakịu wahani tawe mangumbala su kapelesa-Ku e ringangu kal᷊awọu manga waweranu wodo ringangu tawẹ lohone?

³Ini e tatěngọ e Iạ kere sěngkatau esẹ, ringangu simbahẹ̌ko kal᷊awọu kakiwal᷊o ini.

⁴Seng ene i kau e tangú, piạ dunia ini e nikoạ? Kereu mambeng mal᷊oahẹ̌ kasingkạ u e paul᷊ị e!

⁵I sai tangu manilakehu kawěnahu dunia e? Kai i sai němatedu tal᷊i kakětinge si sie? Masingkạ i kau e sasimbange?

⁶Kereapa manga rihi[50] tatongka runia e rụdarisị matoghasẹ̌ e? I sai naměllọu watu wawukun dunia e kụ matoghasẹ̌,

⁷su tempong manga wituingu mal᷊ukadẹ̌ měmpẹ̌kẹ̌kantarị mělẹ̌hindọ kụ manga riadikang masorga e[51] měmpẹ̌gẹ̌gion dal᷊uasẹ̌.

⁸ I sai měmpẹ̌lẹ̌hěping tukadẹ̌ baugu měnahaghe laudẹ̌ mal᷊oang[52] piạ akene simal᷊iwěbudẹ̌ bọu tiang u runia e?

⁹Seng iạ e něliwung laudẹ̌ e ringangu winawa, kụ nipapikunge ringangu kararěndung.

¹⁰Iạ e měngětạ u pẹ̌saraěng baugu kětakeng u l᷊audẹ̌ mal᷊oang e ringangu tukadẹ̌ kạpapal᷊e Iạ e měnuhaghe.

¹¹Bawera-Ku si sie, ’Seng ini e kětakenge. Kumbahang i kau lumiu! Seng sini e manga luạ u matoghasẹ̌ e hinong mangědung.’

¹²Ei Ayub, dembeng manga wọu sěnsul᷊e i kau e něngoro, aparěnta deng mal᷊ukadẹ̌?

¹³Dembeng bọu rimolohu tualagu měhěgo dunia ringangu měmunasẹ̌ taumata ral᷊akisẹ̌ e wọu tampạu pẹ̌kakěmbuniang i sire tangu?

¹⁴Tualagu ěllo e napasilo mal᷊ahẹ bul᷊ude ringangu wal᷊ane kere capẹ̌ su ěntana masipul᷊ụ dingangu lěkune su kakingkaeng sěmbaụ e.

¹⁵Tualagu ěllo e tumanịu matilang baugu taumata tạ mawune, ringangu měnahang i sire mẹ̌koạ mahasa.

¹⁶I kau e rem bọu limintụ sol᷊ong simbul᷊u l᷊audẹ̌ e, bawa sol᷊ong bal᷊ahuange karal᷊ungange? I kau e rem bọu mědẹ̌daral᷊eng su wal᷊ahuangu l᷊audẹ̌ mal᷊oange tangu?

¹⁷Dem piạ u wọu něnodẹ si kau e pasěllangeng su těngom bal᷊am papate kụ marěndung pinẹ̌kětinge?

¹⁸Makakoạ i kau měnikạ běnahu runia e? Simbahẹ̌ko mạengu i kau e masingkạ.

¹⁹Masingkạ i kau e wọu apa rarěntane tualagẹ̌, dingangu suapa tuhụ hinone simbul᷊u kararěndung tangú?

²⁰Makakoạ i kau pẹ̌saraěng kararěndung dingangu tualagẹ̌ ngae? arau měndolohʼi sire pakapul᷊ẹ bọuten narěnta?

²¹Tantu i kau wotonge, batụu i kau e něngalembo maghurang, kụ piạ dunia e niriadi, i kau e seng ene!

²²I kau reng bọu rimal᷊inge manga gudang-Ku tampạ u saldu ringangu tahiti watu,

²³kụ Takụ niresọ baugu tempong kasasěsẹ, baugu tempong pẹ̌sasekẹ dingangu kal᷊awọu ěllong pẹ̌sasilontahẹ̌ e?

²⁴Masingkạ i kau tangu tampạ u matangěllo suměbang? arau tatanggaěng angingu rakị e?

²⁵Kai i sai němangka raral᷊engangu tahiti mahěbung dingangu nẹ̌gěllịu ral᷊eng baugu rěllụ dingangu kilạ tangu?

²⁶Kai i sai naparasehu tahiti su wowom banua l᷊inggi, ringangu su wowong ěntana ta pẹ̌tatanakeng u taumata?

²⁷I sai tangu naněbohẹ̌ dunia mamara ringangu lụhumpinausange hakịu rěmpugẹ̌ e nasue himětị?

²⁸Unụe tahiti kai piạ i amange tutune? I sai i amangu tatědọu namuhẹ̌ tangú?

²⁹Akẹ u eisẹ̌ e kai piạ i ninange tangú? Kai i sai něhanạ u namuhẹ̌ nẹ̌kompelẹ̌ tangú?

³⁰Kai i sai němal᷊ui akẹ nakoạ batu? ringangu nẹ̌koạ bowon sasị e tawe nẹ̌kakanoạ?

³¹ Botonge wěkisu wituing Kartika e ikitangu? arau wěntungu wituing Belantik ipěllọ u ngae?

³²I kaahạu tangu manga wituing apang musunge, ringangu wituing Hiabẹ̌ gẹ̌guwạ dingangu kadodọ e, i kau měnantu ral᷊enge?

³³I kau masingkạ u manga toratẹ̌ su sarul᷊uang tangu? ringangu wotonge i kau makapẹ̌tatahinong ene su dunia tangu?

³⁴Botonge i kau makapẹ̌bansagu parenta su winawa, ringangu maparasehu tahiti e si kau?

³⁵Kụ kamagengu i kau e měngoro manga rěllụ e pẹ̌sẹ̌sasahedẹ̌, kai měnsang i sire e ruměnta ringangu mẹ̌bera u, ”Iạ, Tuang!”?

³⁶Bọu i sai manụ baral᷊ange[53] masingkạ u tempo sude Sal᷊ụ u Nil maelọ tangu? I sai měhabarẹ̌ su manụ esẹ u sarung dumasehẹ̌ ngae?

³⁷I sai limembong pelesa měndekeng binawa ringangu měmihu sarang dumasehẹ̌ e?

³⁸tahiti e nangětị awul᷊ẹ̌ nakoạ nẹ̌kompelẹ̌ dingangu ěntana e nẹ̌darěkạ tangú?

³⁹Botonge i kau makasahusu kinaěngu manga singa ngae? ringangu makal᷊aedẹ̌ tiangu manga anạ e?

⁴⁰kereu i sire mẹ̌těngkaěllung su manga l᷊iang arau luměnnạ su ral᷊ungu sal᷊ehe?

⁴¹I sai nẹ̌tul᷊ung manụ gaga kinal᷊unusang dingangu mẹ̌sẹ̌sal᷊ịgoahẹ̌ tamai ramahi mẹ̌dẹ̌deạ kaěnge. I sai we lai nẹ̌gěllịu tul᷊umang kereu manga anạ e kụkahiorọ si Siạ mẹ̌dẹ̌dorong kaěnge?