Read Sangir AYUB 39 Bible Online

AYUB 39 - Sangir bible

AYUB 39

¹I kau e masingkạ kạnge kambing u wul᷊ude nipěhanạ i ninange? Bọu nakasilo i kau e rusa maghaěng něhanạ?

²I kau e masingkạ kạděngụe i sire matiang ngae? Makatikạ tangu i kau e dekenangu tempom pal᷊ahanạ e?

³Masingkạ i kau angerẹ i sire mẹ̌tal᷊apuhang kụ bọu ene měngědihu manga anạ e?

⁴Manga anạ e kakạsěllahe ringangu matoghasẹ̌ su wanua l᷊inggi; i sire mạhundal᷊eng dingangu tawe mẹ̌sasul᷊e su anung iněngene.

⁵I sai makapělọ u kalide maghaěng su kěhu e tangu? I sai makal᷊uka tal᷊ine ringangu i sie pẹ̌papalilị tangu?

⁶Baugʼi sie Takụ gělirangu wanua l᷊inggi makoạ kere wal᷊ene ringangu wimbaengu asing baugu pẹ̌tatanakenge.

⁷I sie mẹ̌těngkaraung manga soa ringangu gahẹ e, tawẹ u makaharo si sie ringangu makapěhal᷊ẹ̌ i sie.

⁸Wimbaengu rěmpugẹ̌ su wul᷊ude e kai tampạ u kẹ̌kanengange, rẹ̌deakenge manga rukụ birụ paị sene.

⁹Kụ měnsang sapi maghaěnge mapulu měhal᷊ẹ̌ baugʼi kau e? Mapulu ngae i sie mẹ̌tikị su ral᷊ungu kandangu e?

¹⁰Ikaikị u i sie ringangu ikasihasanu ipěngal᷊i waugʼi kau ngae? Ikarol᷊ohu i sie pělele rahaminu tangu?

¹¹Ikapěngumbalaěngu saghede masěgadẹ̌ e, ringangu isarakangu si sie hal᷊ẹ̌ u mawěhạ tangu?

¹²Kụ kapěngumbalaěngu i sie pěngomol᷊ẹ̌ kal᷊awọu pěnsạu e ringangu mangěntudu ene su tampạ u pěmipiangu e tangu?

¹³Apạ e masahawụ kakalipẹ u papanidu manụ onta e! Kaiso tatělạ u wahoa e tawe makasul᷊ung.

¹⁴Manụ onta e mẹ̌těluhẹ̌ su ěntana, bọu e itěntange; tangu hědo ěnne makasal᷊ighang těluhe.

¹⁵I sie tawe makapěndang aramanung kawe taumata měnanahidane ringangu manga manụ maghaghaěng e měndal᷊indane.

¹⁶Tabidạu i sie mạngěnna u anạ e wal᷊inewe i sie piạ; i sie tawe mẹ̌dia maningbe munarane e mariadi tạ kěhase.

¹⁷Seng Iạ e nakawodo ringangu nakakul᷊i si sie; tawe Takụ nighělirang i sie e kapelesa ringangu tahuěnna e.

¹⁸Kai kamagengu i sie manětạ e tumal᷊ang[54] masahawụ, ute i sie makatanungbe kawal᷊o ringangu sasakene.

¹⁹Ei Ayub, seng i kau tangu nẹ̌gěllịu toghasẹ̌ su kawal᷊o ringangu pagụ e kụkal᷊ipẹ su rěhụ e?

²⁰Seng i kau tangu rimolohʼi sie apạl᷊insọ kere kal᷊imbotong, mase kahiang sasikine makạtatakụ taumata e?

²¹I sie měngẹ̌ngahụ ěntana su wal᷊ane ringangu mal᷊uasẹ̌; ore lai piạ giange i sie mẹ̌těngesẹ su pẹ̌seketang.

²²I sie wẹ̌gaweng gěnggang dingangu takụ; tawẹ apa peda kụ makakasohọ si sie.

²³Aghidẹ̌ sẹ̌saghěnggelangu sasakene rụl᷊ensehẹ̌ dingangu kụkerong kahinoěngu tualagẹ̌.

²⁴Ual᷊ingu abul᷊ing kawal᷊o ene tumal᷊ang e tangu; kereu napiri e huměte ute i sie tawe makakědang.

²⁵I sie sụsiki walạewe tatiụ u napiri, ute wọu maraune seng ikaimbune ral᷊urung pẹ̌seketang. Ikẹ̌karingihe wansagu manga pěrwira su tempong i sire mẹ̌kumando.

²⁶Lẹ̌ěnnaěng kalěmba e lẹ̌ahakengu tuměllạ kereu i sie mẹ̌timona sol᷊ong sěmběkan timuhẹ̌ dingangu papanide kạbawingkahẹ̌ e tangu?

²⁷Parentanu e tangu tẹ̌tol᷊eěngu manụ kasiahe těntal᷊ang i sie tawe nẹ̌kẹ̌koạ sal᷊ehe su wul᷊ude marangẹ e tangu?

²⁸Su wongkom bul᷊udu watu e i sie namětị bal᷊ene; manga kotọ u watu mal᷊ahoro e nakoạ bal᷊oarị e.

²⁹Bọu tampạ ene i sie měnẹ̌nitị měnsang baewe sol᷊ong lantehe sude matane pẹ̌pahimang mẹ̌deạ kinaěnge.

³⁰ Su apam piạ u nate e, sene lai i sie, kụ rahang kinange ene e lẹ̌inungangu manga anạ e.