Read Sangir AYUB 40 Bible Online

AYUB 40 - Sangir bible

AYUB 40

¹Ei Ayub, i kau e rụdokạ si Siạ, Duatanu e Limembong Kawasa; i kau e mẹ̌samal᷊ẹ arau kai rumokạ?”

³Tangu sasimbangi Ayub su MAWU e, ”Iạ e mẹ̌bisara kere taumata wodo MAWU! Kai sumimbaheng apa iạ e? Seng tawẹ apa l᷊ai hinong takụ ipẹ̌bera.

⁵Sen tumanịu mal᷊awọ takụ tuturang.”

⁶Mase wọu ral᷊ungu rěllang e MAWU e něhengetangko l᷊ai si Ayub.

⁷Mase MAWU něhengetang si Ayub, ”Tatěngoịete Iạ e kere sěngkatau esẹ, kụ simbahete kal᷊awọu kakiwal᷊o ini.

⁸Kụ kai hědong ipẹ̌sunial᷊u tangu kaadilẹ̌-Ku e, ringangu mapakatěngadu watangengu e ual᷊ingu mapẹ̌sal᷊ang Iạ e?

⁹Katihọ u i kau e matoghasẹ̌ kere Iạ? Botonge tingihu e ghumal᷊ědụ kere tingihẹ̌-Ku?

¹⁰Lẹ̌gaheko watangengu e ringangu karal᷊epatẹ̌ e ore lai kasěllahẹ̌ e, pěluheko kawawantugẹ̌ dingangu kapia.

¹¹Tatingangko i sire apan naung i sire mararangẹ; apasongkangko ral᷊angehu e ringangu apakasanạko i sire.

¹²Ore, tatingangko taumata maobotẹ̌ e, kụ apẹ̌tumpěkuhẹ̌ko i sie! nihěmpungko taumata ral᷊akisẹ̌ e su tampạ e.

¹³Lẹ̌bingko i sire kěbị su ral᷊ungu awul᷊ẹ̌; kurungko i sire su wanuan tau nate.

¹⁴Tangu i kau e sarung daloěng-Ku, ual᷊ingu i kau e nakawatạ kahiang katoghasu sẹ̌sanu e.

¹⁵Tatinganeko i Behemot,[55] binatang masaria ene; mẹ̌sul᷊ungu i kau e, i sie mal᷊aing kinoạ-Ku l᷊ai. Manga rěmpugẹ̌ e nakoạ kaěnge, kerẹewe sapi ringangu sapi wiasa.

¹⁶Kaiso tětikeko katoghasẹ̌ su ral᷊ungu wadange ringangu katoghasẹ̌ su manga ihạ u wadange!

¹⁷I sie mạmětịu tol᷊ene kere kalung aras, manga wiadu palange masimạ dingangu matětogẹ̌.

¹⁸Manga ruhine makětị kere tambaga, laede matoghasẹ̌ tabidạu manga watangu baja.

¹⁹Su tal᷊oarang kal᷊awọu riadikang-Ku e seng i sie e tumanịu makạl᷊ahiasẹ̌; samatang ual᷊ingu Měndariadine i sie ikawatạ!

²⁰Su manga wěntihe tampạ u manga binatang dul᷊u e měmpẹ̌nẹ̌nalang maral᷊uasẹ̌ e, himětị e lai manga rěmpugẹ̌ kụ nakoạ kaěnge.

²¹I sie rụdal᷊oka su al᷊ungu manga sumpinị piạ hanggange, su wělạu manga lěntuwu su manga lẹ̌bone e i sie mẹ̌kẹ̌kěmbuni.

²²Gahundunge piạ hanggange mạngěllung si sie ringangu manga kěngkaune. Manga kalung gandarusa su wiwihu manga sal᷊ụ e mělẹ̌lindung si sie.

²³I sie tawe gumaghěnggang manilaing Sal᷊ụ u Yordan e matoghasẹ̌ tạ sihinge laelehe, i sie měngkate matatapẹ̌ mal᷊enehẹ̌ maningbe akene seng nelehẹ̌ su ghatine.

²⁴I sai wue tangu wahani mapakawutang matane, wọu ene měnamẹ si sie ringangu měnedẹ sasimụ e?