Read Sangir AYUB 42 Bible Online

AYUB 42 - Sangir bible

AYUB 42

¹Sasimbang i Ayub su MAWU, ”Iạ e masingkạ, o MAWU, u i Kau e Limembong Kawasa; i Kau e makaumal᷊ẹ̌ walạewe měnsang mẹ̌koạ apa.

³ I Kau e makịbal᷊o unụe iạ bahani su tawe měngumbala kapelesaʼU sumbal᷊iau iạ sẹ̌saku e wěgawe marihutu. Iạ e mẹ̌bisarang hal᷊ẹ̌ u apang tawe takụ kahěnganeng, mạanung munara kụ tumanịu makaral᷊inaụ baugu iạ ini.

⁴ I Kau e něngoro si siạ apạdaringihẹ̌ piạ i Kau kapẹ̌bisarane, ringangu nẹ̌gěllịu sasimbange piạ i Kau e makịbal᷊o.

⁵Nạung kal᷊imona, kasingkạku mạanung Kau e kětạeng ikẹ̌karingihẹ̌ku wọu taumata samatang, arawe ini takụ ikakiral᷊a i Kau e mẹ̌tẹ̌těngong gati.

⁶Ual᷊ingu ene iạ e mamea makatahěndung kal᷊awọu waweraku ringangu piạ sěsilẹ̌ku iạ e naiang su ral᷊ungu awul᷊ẹ̌ dingangu awu.”

⁷Nasuẹeng bisarane si Ayub, něhengetangke MAWU si Elifas, ”Iạ e limangehẹ̌ si kau ringangu su hapị u e rarua, ual᷊ingu i kamene e tawe nẹ̌bera hinone mạanung batangeng-Ku e. Arawe ěllang-Ku i Ayub e wal᷊inewe kerene.

⁸Kụ al᷊ạ e ini sapi esẹ pitum baụ dingangu domba esẹ pitum baụ kụ dakọ e sol᷊ong anung Ayub. Bọu ene sěmbako kěbị ene kere sasěmba tẹ̌tongkateng baugu watangengu. I Ayub sarung mẹ̌kal᷊iomaneng baugʼi kamene ringangu kakal᷊iomanenge sarung Takụ tarimakeng. I kamene tawe Takụ ipakamea, maningbe i kamene hinong makatarimạ hukumang. I kamene tawe naul᷊ị tuhụ hinone mạanung batangeng-Ku, arawe i Ayub kawe naul᷊ị u ene.”

⁹I Elifas, i Bildad dingangu i Zofar mẹ̌kẹ̌koạ apang ilẹ̌orong MAWU, mase MAWU e něnarimạ kakal᷊iomaneng i Ayub.

¹⁰ Bọu ene sarětạeng i Ayub nẹ̌kal᷊iomaneng baugu hapị e i sire těllu tangú, MAWU e napakakalạ i sie kapia ringangu si sie ruan sul᷊e kakěpal᷊e wọu kal᷊awọu tataghuanenge nạung kal᷊imona.

¹¹Kal᷊awọu tuhang dingangu wawineng Ayub, dingangu kal᷊awọu hapị e nạung těbe e riměnta nẹ̌tiwo si sie wọu ene nẹ̌sal᷊iwang sěngkapẹ̌sal᷊iwang dingange su wal᷊ene. I sire mẹ̌tẹ̌těngkal᷊ahẹ u mal᷊aing kụkěndungu kal᷊awọu haghin susa kụ seng niapakarěntang MAWU si sie ringangu měhiborẹ̌ si sie. Sěngkatau-sěngkatau wọu tal᷊oaran sire e mẹ̌gẹ̌gěllịu roitẹ̌ dingangu sinsing bul᷊aeng sěmbaụ si Ayub.

¹²I Ayub nial᷊amateng u MAWU niapẹ̌dal᷊embo su ral᷊ungu pěngěnsueěngu pẹ̌bawiahe, wọu tempo těntal᷊ang i sie ren tawe nihombangengu sigěllạ. I Ayub piạ kambinge ringangu domba 14.000 su waụ e ringangu onta 6.000 su waụ e ringangu sapi 2.000 su waụ e ringangu kalide 1.000 su waụ e.

¹³I sie nakaěbạ manga rariọ esẹ pitung katau ringangu manga rariọ bawine i sire těllung katau.

¹⁴Anạ e wawine humotong isẹ̌sẹ̌bạ si Yemima, karuane i Kezia, ringangu kahembokange i Kerenhapukh.[61]

¹⁵Su kạguwạu wanua e tawẹ apa mahuala kaholẹ e kere i sire těllu wawine anạ i Ayub. I sire nighěllirangu wahageange su rarotong i amange, mẹ̌sul᷊ungkewe lai su mahuanen sire.

¹⁶Bọu ene i Ayub e bědang nẹ̌biahẹ̌ mahasụ ěpạ u pul᷊o su taunge karěngụ e hakịu i sie ren nakasilo manga pulunge ringangu manga anạ i sire.

¹⁷Mase nairị e i Ayub kụ umbure apạ e marangẹ.