Read Sangir AYUB 6 Bible Online

AYUB 6 - Sangir bible

AYUB 6

¹Mase i Ayub simimbang, ”Manga andene naungku e itimbang běhạ e,

³nal᷊ahẹ u limembong kawěhạ e wọu ěnneng laudẹ̌ mal᷊oang. Kụ abe kaherang kereu manga waweraku e tawe naatorẹ̌ e ringangu mẹ̌sẹ̌sasahawụ.

⁴Papitị u Limembong Makawasa e kai tụtěpasu wadangku e; lailune nakeke su kasěllahu himukudẹ̌ku. Kahuagatu Ruata e apạ e makạtatakụ, dingangu měngalo si siạ e kere wuntuangu rokạ.

⁵Kalide sarung mawul᷊ugẹ̌ kereu gěllirangu rěmpugẹ̌ melong, kerene lai sapi kereu gěllirangu kaěnge.

⁶Arawe kaěng lěnding, i saị e mapulu? Kahěngang hawolan těluhẹ̌ e piạ temange?

⁷Iạ e tawẹ kapuluku měnenggehẹ̌; tahamuta[12] kamagengu iạ kuminạ.

⁸Unụe Ruata e tạ agise rumaringihẹ̌ daroaku? Unụe tawe měnanaung dorongku tangu?

⁹Milumbạko Ruata e piạ kapulune měhěmpung si siạ! Mal᷊owọko i Sie mẹ̌karadiahang dingangu měmate si siạ!

¹⁰Baugu iạ e hal᷊ẹ̌ ene e sarung makoạ hiborang; kụ iạ e sarung mẹ̌sal᷊ai su wěllạu sigěsạ. Kal᷊awọu parentan Duata Kasusiange, sen takụ nituhukang dingangu takụ nẹ̌naungang tatapẹ̌.

¹¹Kụ měnsang ual᷊ingu katoghasẹ̌ku e hakịu iạ e wědang ene? Kụ měnsang iạ e mẹ̌kẹ̌karaki mapulu mẹ̌biahẹ̌ deng limembong karěngụ e arau?

¹²Sěngapang katoghasu watu ngae wadangku ini e arau? Arau kawe wọu tambaga ngae wadangku ini?

¹³Nasuẹ e toghasẹ̌ku e mědẹ̌deạ tatongka; kaiso waugu iạ e mamben tawẹ apa relain tul᷊umang.

¹⁴Su ral᷊ungu kasasigěsạ[13] kere ini e tangú takụ lẹ̌ampal᷊eng hapị tutune. Apa měnsang iạ e těbewe satia arau kawe seng tawe mẹ̌papandung Mawu Kasěllahenge.

¹⁵Arawe i kamene manga hapị e tawe kapěngumbalaěng dingangu kapěngimangeng. I kamene kai tabidạu songe seng kinal᷊ẹ̌saěngu akene, su tempon tahiti e tawe rumarasehẹ̌.

¹⁶I kamene e mẹ̌sul᷊ungu sal᷊ụ marěmasẹ̌ dingangu nate, ual᷊ingu natukusu saldu ringangu tahiti watu.

¹⁷Tawẹ kararěnnane kereu sen tempone měhangu, saldu ringangu eisẹ̌ ene e nailang tawẹ ěnnạe. Běntan sal᷊ụ e kinamaraěng, tawe nahuakẹ, dingangu měngkate apa nahěgu nakol᷊a.

¹⁸Manga kafila e něngkapal᷊idẹ̌ su tempong mědẹ̌deạ akẹ; i sire mẹ̌pẹ̌palilị ringangu něngkapate su wanua l᷊inggi.

¹⁹Kafila wọu Syeba ringangu wọu Tema e nẹ̌deạ akẹ ene ringangu mělẹ̌harapu ene.

²⁰Kaiso harapang i sire e sia-sia su wiwihu songe tạ akene.

²¹Kerẹewe[14] sal᷊ụ ene i kamene hapị; i kau e simohọ dingangu natakụ nakasilo sigěsạku.

²²Unụ e? Kai nẹ̌dorongke apạe wọu i kau e? Arau kai něngoro si kau piněnorokẹ̌ taumata waugu pandungangu e tangú?

²³Kai manga iạ e mẹ̌dẹ̌dorong kasasal᷊amatẹ̌ dingangu itubusẹ̌ bọu rokạ kụ běgaweng kakěndagẹ̌ e tangú?

²⁴Ho, těntiroikoho iạ e, kụ lahẹko pẹ̌sasal᷊aku e! Iạ sarumbe marěmasẹ̌ dingangu rumaringihẹ̌ baweranu.

²⁵Bawera matul᷊idẹ̌ e makạdal᷊ěnding naung, arawe waweranu e tawẹ lohone, tawẹ mangal᷊ene!

²⁶Kal᷊awọu waweraku e lẹ̌ěnnaěng i kamene anging samatang; tawẹ kěhase i kamene sumimbahẹ̌ siạ kụ seng kinahěpusangu ěnna e.

²⁷Saral᷊aing manga rariọ kasisi ěndusẹ̌ e pẹ̌bawiahʼi sire e ipẹ̌dal᷊ahurị i kamene, hapị i kamene kantalẹ̌ e akal᷊eng i kamene mědeạu makalạ.

²⁸Kěnnangko, kakělla si siạ; kụ unụe wue iạ ini mẹ̌konti si kau?

²⁹Abe pẹ̌karadiahang su tawẹ kaadilẹ̌, pakaěnna wue! Kumbahang makasamedẹ̌ si siạ, iạ e mamben tawẹ sal᷊aku.

³⁰Unụe katihokangu iạ e kai nẹ̌konti, tawe makapẹ̌dal᷊ahaeng mapia ringangu piạ turạ e?