Read Sangir AYUB 8 Bible Online

AYUB 8 - Sangir bible

AYUB 8

¹Mase nẹ̌berạe i Bildad, ”Kạděngụe lai i kau e měbẹ̌bisara kerene? Manga waweranu e mẹ̌sul᷊ungu anging gụgal᷊ěgehẹ̌.

³Duata e tawẹ běke měmal᷊engkọ u kạadilẹ̌; tawẹ běke mạgolọ su ral᷊ungu mapakateing katul᷊idẹ̌ e.

⁴Aramanung manga anạ u e nẹ̌dosa su těngonʼE, kụ hinone i sire i hukungʼE.

⁵Kai kereu kawe i kau e mẹ̌těngkaěllung si Sie, mẹ̌gausẹ̌ kakěndagẹ̌ dingangu mẹ̌gausẹ̌ dorongu ampung,

⁶kamagengu naungu e matul᷊idẹ̌, tawẹ turạ e, Duata e sarung mẹ̌tul᷊ung i kau e tạ kararěnane; kụ kere wawal᷊ise, ute ral᷊ohom bal᷊enu e sarung ipakaul᷊ị.

⁷Kakakalạ u apang nailang e tawẹ mangal᷊ene su apang sarung kaẹ̌bakengu e.

⁸Tau masingkạ nạung kal᷊amona e naunge wue karạ u, ringangu sipire wue apang ěbạ u pẹ̌bawiahu manga i upungu.

⁹Pẹ̌bawiahi kitẹ e manimbụ, i kitẹ běgaweng apa; ěllong kitẹ e kai mẹ̌sul᷊ungu kěngkau samatang.

¹⁰Daringihẹ̌ko waweran tau masingkạ ene kal᷊imona, i sire nẹ̌gěllịu těntiro ini e si kau,

¹¹’Su tampạ kụ mahuakẹ samatang tuwoěngu lěntuwu; pindangke wue ute tumbạ kaěbakeng su ěntana mal᷊ěbo.

¹²Kereu akene mamara, lěntuwu ene malolang, limembong kasahawụ e wọu sasuang bal᷊ine e. Sěmbal᷊iau wědangbeng melong dingangu wal᷊ine tempone, i sie potokang dingangu pěngal᷊akeng pul᷊ise.

¹³Kerene kakakoạ u taumata tạ mawune. I sie mịbul᷊en Duata, kụ kẹ̌kailangengu harapange.

¹⁴Banaěng sěmběsụ lome e mạkoạ ilẹ̌umbalane; sal᷊ehu kal᷊ịbangkang e mạkoạ pạngimangenge.

¹⁵Matoghasẹ̌ bue sal᷊ehẹ̌ ene e makoạ pěngangunsarehange? Makědang bue banaěng ene e mạeng koateng pěngangumbelekang?’

¹⁶Mẹ̌sul᷊ungu ěhe, kahuwekane taumata tawẹ mawune; kereu sarangengu matangěllo, i sie tumuwo mapia kụ maměpidẹ̌ tampạ.

¹⁷Hamụ e mělahěkụ[16] manga watu su ěntana; mělawe matoghasẹ̌, kụ i sie tawe gampang mahaka.

¹⁸Arawe kěnangko ěbụ ěhe ene ini e, tangú tabidạu tawẹ banaụ i sie ene sene.

¹⁹Tangú ral᷊uasu tau ral᷊akisẹ̌ e tumbạeweng ene e; taumata wal᷊ine marěnta ringangu měngaweng si sie.

²⁰Kai Mawu Ruata e tawẹ běke reng maněntangu taumata satia, ringangu tawẹ běke lai reng mẹ̌tul᷊ungu taumata duruhaka.

²¹Mohongu e sarung ipakal᷊ěgene, biwihu e sarung mẹ̌tahimokoin dal᷊uasẹ̌.

²²Sědụ u e sarung mamea ringangu makapěndang masanạ, dingangu wal᷊eng iral᷊akisẹ̌ e sarung goghaheng pakaupu.”