Read Sangir AYUB 9 Bible Online

AYUB 9 - Sangir bible

AYUB 9

¹ Arawe i Ayub simimbang, ”Kahěngang iạ masingkạ, u manga waweranu e tawẹ sal᷊ane. Kai mariadiwe kerea taumata kụ mẹ̌pěrkara rumokạ Mawu Ruata dingangu měmatạ e?

³Bọu kakiwal᷊o sěhiwu nikiwal᷊on Duata e, sarang manga sěmbaụ kai tawe ikasimbahu taumata.[17]

⁴Duata e kai apạ e pelesa ringangu makawasa; i sai tangú makararagẹ̌ dumokạ si Sie?

⁵Duata e napěngal᷊ing bul᷊ude su kawěgang taumata, mase nipẹ̌kal᷊intuinge ringangu ral᷊angehẹ̌ ore lai libutu.

⁶Duata e napakariadin linuhẹ̌ sarang dunia e ghimanuẹ̌, dingangu rihi měpụdu runia e kụkanoạ tạ sihinge,

⁷Mawu Ruata e makasěding u matangěllo suměpụ mal᷊ukadẹ̌ e, ringangu makapetọ manga wituing suměnnang hěbi lawọ.

⁸NiěmpahʼE winangaenge tawẹ u naontol᷊ẹ̌; nipẹ̌tatahida-Ne tal᷊ẹ̌tugu nagạ u l᷊audẹ̌ e.[18]

⁹ Nisakẹ e ghal᷊ipohong bituingu timuhẹ̌ e su winangaeng, kerene lai wituing Ahusu ěllo, wituing Saha, ringangu wituing Hiabẹ̌.

¹⁰Tawe makarating i kitẹ mangěnna kal᷊awọu munaranʼE, tawe makaumal᷊ẹ̌ i kitẹ mẹ̌tiạ kal᷊awọu karal᷊inaụ kinoạ e.

¹¹I Sie simahe ghatiku, kaiso tawe takụ nikasilo; i Sie limiu wọu sěndihangku, kaiso tawe nẹ̌těngkal᷊ahẹ si siạ.

¹²Kereu i Sie měmul᷊aho, i sai wue wahani mẹ̌sěding i Sie? arau wahani makiwal᷊o si Sie, ’Ei, kai mẹ̌kẹ̌kapura i Kau?’

¹³Mawu Ruata e tawe měnganguhung dal᷊angehʼE ringangu luwahangu naungʼE; manga lumaontol᷊ẹ̌ si Rahab[19] mal᷊aing kụkoho si Sie.

¹⁴Kụ, kereapạ e iạ e makakarendehẹ̌ si Sie? Kụ kai mẹ̌berạeng apa iạ e sumimbahẹ̌?

¹⁵Manilaing iạ e tawẹ sal᷊aku, kai mẹ̌koạ kereapa iạ, tabeạu katewe kumakindoạ u kakěndagu Mawu Ruata e měnggaghutaku?

¹⁶Mangạewe i Sie sumimbahẹ̌ kereu iạ e mẹ̌kui, iạ e wědang tawe mangumbala kahěngang bue i Sie rumaringihẹ̌be tingihẹ̌ku e tangú?

¹⁷I Sie něměhạ si siạ su ral᷊ungu angingu rěllang, ringangu nahuntinambang sigěsạku, tawẹ apa ral᷊enge.

¹⁸Tawe napakawalang iạ e makasindạ manga sěngkasindạ; katewe mundangu nipahuntinambang sigěsạ e si siạ e.

¹⁹Kụ kai hinong měnukạ u toghasẹ̌ku e iạ si Sie tangú? Kai kakěllạe apạ e katoghasẹ̌ i Sie! Kụ kai manga iạ kawe hinong měnowang kạbaratangku e si Sie, kai i saị e tangú wahani mẹ̌kui si Sie[20] sol᷊ong pěngadilange tangú?

²⁰Iạ e satia ringangu tawe mẹ̌kakoạ dosa, arawe mohongku e tabidạu mẹ̌berang kawal᷊ikange; apang bawera wọu wiwihẹ̌ku e, tabidạu mapẹ̌sal᷊ang batangengku.

²¹Iạ e tawẹ sal᷊aku, kaiso iạ e tawe mẹ̌tiaha. Iạ e nasahe nẹ̌biahẹ̌. Si siạ e sen tawẹ apa relaing piạ arěgane lai; apang nẹ̌sal᷊a ringangu nihino e, měngkate mẹ̌sul᷊ung kakakoạ e: Mawu Ruata e sarung mapakawinasang kěbị si rẹ̌dua e.

²³Kereu taumata tawẹ sal᷊ane mate sěngkělěndị e, Mawu Ruata e kětạembeng luměge.

²⁴Dunia e nisarakangu Ruata e su měnggaghohaeng, dingangu manga měnggaghuta e seng niapakawutane kěbị. Duata seng nẹ̌koạ kěbị ini, kai manga wal᷊inewe i Sie, i sai wue tangú?

²⁵Kal᷊awọu ělloku e napaghohẹ̌ kereng kasahawụ e, wọu e napuạ tawẹ pěndangu ral᷊uase.

²⁶Mẹ̌sul᷊ungu sakaeng mahaěng, pẹ̌bawiahẹ̌ku e simahe masahawụ-sahawụ, kere kasahawụ u kalěmba měměntul᷊ẹ̌, měnahedẹ̌ kinaěnge.

²⁷Kereu iạ mapulu huměmming dingangu luměge mal᷊uasẹ̌, kereu iạ měnal᷊ukạ mẹ̌timbul᷊eng kal᷊awọu sigěsạ, tangú susan naungku e ruměnta kạpia, měnahusu siạ; batụu iạ masingkạ, Duata e těbe mapẹ̌sal᷊ang iạ.

²⁹Kụ, mạeng kerene, kai mẹ̌tiaha apa iạ tangú?

³⁰Tawẹ apa saboěng kụ makakailang dosaku!

³¹Duata e němunsal᷊u iạ su ral᷊ungu lamuhụ, sarang kate pakeangku e mạngěnnau iạ e kai nakararěnting.

³²Kereu andene Mawu Ruata kawe taumata, iạ e sarung makasimbahẹ̌ si Sie; mase i kami e sarung tumatěngo sol᷊ong pěngadilang měngěnsue kal᷊awọu pẹ̌sasal᷊intohẹ̌.

³³Kai su tal᷊oarang kami e tawẹ apa jaksa kụ makapěngurusẹ̌ si kandua.

³⁴Mal᷊owọko Mawu Ruata e měngirol᷊o měhukungu iạ dingangu mapakaraung kal᷊ahasa-Ne wọu anuku!

³⁵Iạ e tawe matakụ i Sie ringangu sarung mẹ̌bisara ini, u iạ e masingkạ u naungku hala e.