Read Sangir MAZMURẸ̌ 10 Bible Online

MAZMURẸ̌ 10 - Sangir bible

MAZMURẸ̌ 10

¹Unụ e i Kau kawe marau o MAWU dingangu mẹ̌kẹ̌kěmbuni su tempong i kami su kasasěsẹ?

²Taumata ral᷊akisẹ̌ e maobotẹ̌ miěbạ taumata kasiang; balạete i sire pakaehọ su sedẹ i sire hala.

³Taumata ral᷊akisẹ̌ e mẹ̌kẹ̌kotarilang ěnningi sire ral᷊akisẹ̌ e, taumata maanggang e měngẹ̌ngane ringangu mẹ̌sẹ̌sunial᷊u MAWU e.

⁴Taumata waradosa e tawe mẹ̌papandung MAWU, kahiang obote, i sie měngẹ̌ngěnna u Mawu e tawẹ apa.

⁵Taumata ral᷊akisẹ̌ e makạěbạ ual᷊ine su patikụ tawakal᷊ine; i sie tawe makakiral᷊a ringangu tawe makal᷊aěnna titam MAWU ringangu i sie tawe měngangarěgan dokạe.

⁶I sie mẹ̌bẹ̌bera su naunge, ”Iạ e tawe mẹ̌sasul᷊en tala ringangu su hěnto mẹ̌bẹ̌bawěllasẹ̌ e mẹ̌sul᷊ungu taumata kụ tawe dal᷊akise.”

⁷ I sie turusẹ̌ měngẹ̌ngane, mẹ̌matakụ dingangu mạngakal᷊ẹ̌, kal᷊awọu wawerane napenẹ u pẹ̌bawinsị dingangu karal᷊akisẹ̌.

⁸I sie nẹ̌kěmbuni su manga weọ e, kụ měmate taumata tawẹ sal᷊ane. Mẹ̌sul᷊ungu singa i sie měngẹ̌ngampal᷊ẹ̌ su sěmběkang gahundunge měpẹ̌pahimang taumata kụ ta makakoạ apa-apa. I sie mělẹ̌hěgạ taumata kasiang su tampạ marěmasẹ̌, měhěgạ, dingangu měnuhudẹ̌.

¹⁰I sie kumakowọ, kụ mělikosẹ̌; kụ mapakanawon taumata ene kahian tingkaị.

¹¹Su naunge, ”Mawu Ruata e seng niwul᷊e ringangu tawẹ padul᷊ine kụ bọu ene seng tawe saụ makasilo si siạ!”

¹²Pẹ̌bangungke, MAWU, kụ hukungke taumata ral᷊akisẹ̌ e! Tahěndungeko taumata kụ kạsasědạ!

¹³Unụ e taumata ral᷊akisẹ̌ e měngkai mělẹ̌hinakang Mawu Ruata ringangu měngẹ̌ngěnnau Ruata e tawe měhukung i sie?

¹⁴Arawe i Kau e nakasilo; i Kau e tụtingang susa ringangu sunsara, ringangu sidutu sadia mẹ̌tul᷊ung. Taumata kụ tawe makakoạ apa-apae měnarakangu watangenge si Kau. I Kau e sidutu mang mẹ̌tẹ̌tul᷊ungu taumata kasiang.

¹⁵Pekohẹ̌ko kawasan taumata ral᷊akisẹ̌ e ringangu duruhaka; hukungko i sire kahiang kakanoạ i sire sarang i sire mẹ̌tobatẹ̌.

¹⁶MAWU e mẹ̌parenta sarang karěngụe; kal᷊awọu wansa kụ běgan Sie sarungbe maupu wọu ěntana-Ne.

¹⁷MAWU, i Kau e nakaringihẹ̌ kakal᷊iomaneng u taumata hina e ringangu mạnoghasẹ̌ naung i sire.

¹⁸Manga rariọ kasisi ringangu taumata i pẹ̌tẹ̌tahuěllang e tẹ̌tatawangengʼU e pěrkarane, tadeạu tawẹ apa taumata kụ měmatakụ si sire.