Read Sangir MAZMURẸ̌ 101 Bible Online

MAZMURẸ̌ 101 - Sangir bible

MAZMURẸ̌ 101

¹Mazmuri Daud. Iạ e mapulu mẹ̌kantarịu mạanung kasasatia ringangu kạadilẹ̌, baugi Kau, o MAWU, kakantarị daraloku e!

²Iạ deng mapulu mẹ̌sěmpị kakanoạ u pẹ̌bawiahẹ̌ kụ tawẹ turạ e. Tempo sude i Kau ruměnta su anuku? Iạ e mapulu mẹ̌biahẹ̌ susi su wal᷊eku,

³karal᷊akisẹ̌ e tawe takụ i pakawala. Takụ i kẹ̌kawěnsing kakanoạu taumata kụ mẹ̌tul᷊a, ringangu mạdiri mẹ̌papangurusẹ̌ dingang i sire e.

⁴Iạ e madiri mẹ̌koạ hal᷊ẹ̌ tạ katěngade[53] dingangu mạdiri masangkong su ral᷊ungu karal᷊akisẹ̌.[54]

⁵Taumata kụ mẹ̌sẹ̌sampuhẹ̌ marěmasẹ̌ e sarung takụ i pakawinasa. Taumata maobotẹ̌ dingangu naunge marangẹ e tawe takụ i pakawala.

⁶Iạ puluang su taumata kụ masatia su Ruata; i sire wotonge matanạ su wal᷊eku. Taumata kụ mẹ̌bẹ̌biahẹ̌ tawẹ turạ e wotonge mẹ̌tangkiang si siạ.

⁷Tahapěngakal᷊ẹ̌ e tawe wotonge matanạ su wal᷊eku; tahakontiange tawe makararagẹ̌ su těngoku.

⁸Bọu ěllo sarang ěllo iạ e sarung mapakasuen taumata ral᷊akisẹ̌ e su wanua ini. Kal᷊awọu taumata apang měmpẹ̌kẹ̌koạ dal᷊akisẹ̌ e sarung takụ i pakaupu wọu soang MAWU e.