Read Sangir MAZMURẸ̌ 102 Bible Online

MAZMURẸ̌ 102 - Sangir bible

MAZMURẸ̌ 102

¹Kakal᷊iomanengu taumata kụ masunsara kụ su ral᷊ungu kakakoạe naěnsung nararul᷊ěpe o naral᷊owe e ghụgahiorọ su MAWU.

²O MAWU pẹ̌daringihẹ̌ko kakal᷊iomanengku, apakahumpạko kakindoạku e sarang anunʼU.

³Kumbahangbe mẹ̌bihung gatinʼU e wọu anuku kereu iạ su ral᷊ungu susa e. Pẹ̌daringihẹ̌ko kereu iạ e kụkui, kụ lighạbe simbahe iạ e pakarol᷊ạ.

⁴Pẹ̌bawiahẹ̌ku e mapuạ kere pěpusẹ̌, manga ruhiku e mẹ̌tětuhẹ̌ kere putung.

⁵Iạ e nahupadẹ̌ kere rěmpugẹ̌ mahěgu, ringangu tawẹ giangu kumaěng.

⁶Iạ e mẹ̌gěnggihẹ̌ maihạ; badangku e kate nal᷊ěmbe pisị namikung duhi.

⁷Iạ e mẹ̌sul᷊ungu wahoa maghaěng su wanua l᷊inggi, mẹ̌sul᷊ungu manụ sampahạ su tal᷊oarang goghahu meselẹ̌.

⁸Iạ e tawe kahuntikilang, kere manụ u winalangeng tụtal᷊iahu sẹ̌sane su wowong atụ.

⁹Kanandung ěllo manga rokạku e měmpạnamedẹ̌ si siạ; arengku mạkoạ i pạngane kahian taumata kụ bawal᷊uang si siạ e.

¹⁰Iạ e kụkaěng awul᷊ẹ̌ kere borotẹ̌, inumangku e mẹ̌dẹ̌dal᷊aụ u ěllo mata,

¹¹u i Kau e seng něnapuạ, kụ něnděmmẹu iạ, kinahian dal᷊angehʼU e kụ dụděllị.

¹²Pẹ̌bawiahẹ̌ku e mạpal᷊usẹ̌ kere kěngkau su tempong bawěllo; iạ e nalolang kere rěmpugẹ̌.

¹³Arawe i Kau e MAWU kai Ratu sarang marěngụ-děngụ, těbe tẹ̌tahěndungang bọu hěnto sarang hěnto.

¹⁴I Kau e sarung mẹ̌bangung dingangu kuměndagu Sion, tempone seng nịdating baugu piạ tatal᷊ěntụe si sie.

¹⁵Batụu manga ěllangʼU e kụkěndagi sie, maningbe i sie seng nakoạ kere ěnạ e. I sire nakapěndang timal᷊ěntụ si sie, manimbe i sie seng nakoạ ahine.

¹⁶Kawasang MAWU e sarung ikẹ̌katakụ u manga wansa; ringangu manga kawawantugʼE lẹ̌lahunggeětangu patikụ datu,

¹⁷kereu MAWU e měmětị Sion kapia, ringangu mẹ̌těngkal᷊ahẹ su ral᷊ungu kawantugʼE.

¹⁸I Sie sarung dumaringihẹ̌ kakal᷊iomanengu umatʼE kụ kasiang, dingangu tawe mẹ̌bawinsị u kakal᷊iomaneng i sire e.

¹⁹Bohẹko patikụ kakanoạ u MAWU, baugu pal᷊ahite sěngkal᷊awạ sarung su tempo ramahi, tadeạu wansa kụ bẹ̌dang tawe kinawantelẹ̌ e makapẹ̌dalo wue si Sie.

²⁰MAWU e mạngintěno wọu tampạʼE karangetange, wọu sorga kụ i Sie mạnitị bue sol᷊ong dunia

²¹mědeạu makaringihẹ̌ kakahiorọu taumatan tahungkụ dingangu mapakal᷊iwiru taumata apang nipakasahẹ u pateěng.

²²Tangú arengʼE sarung i wombeng su Sion, dingangu i Sie sarung daloěng su Yerusalem,

²³su tempong manga wansa ringangu manga kararatuange mẹ̌tampung baugu mẹ̌tahamawu su MAWU.

²⁴MAWU e napakaěnsung kuatẹ̌ku nạung iạ deng mangudạ, dingangu napakanimbụ u umurẹ̌ku.

²⁵Bọu e iạ nẹ̌bera, ”O Mawu Ruata abe pěngal᷊ạ niawaku su wělạu pẹ̌bawiahẹ̌ku e.” MAWU, i Kau e wiahẹ̌ sarang marěngụ-děngụ,

²⁶ kal᷊imona i Kau e něndiadi dunia; langị e mal᷊aing koạu l᷊imanʼU.

²⁷Patikụ ene sarung maparung, arawe i Kau e mang těbe ene; kěbị tamai ene sarung měngkatewe kere pedetẹ̌. I Kau e měnděmmẹ u ene kere pakeang těbe, mase kěbị e sarung maghěngging.

²⁸Arawe i Kau e mang mẹ̌sul᷊ung, pẹ̌bawiahʼU e tawẹ kahẹ̌pusange.

²⁹Anạ pulung i kami e sarung mẹ̌biahẹ̌ tawẹ konsange apa, dingangu hanesẹ̌ mal᷊enehẹ̌ su ěllungʼU.