Read Sangir MAZMURẸ̌ 103 Bible Online

MAZMURẸ̌ 103 - Sangir bible

MAZMURẸ̌ 103

¹Bọi Daud. Pẹ̌dalo MAWU e himukudẹ̌ku, kạguwạu naungku e pẹ̌daloko arengʼE susi.

²Pẹ̌dalo MAWU e ei himukudẹ̌ku, abe kiwul᷊eng kal᷊awọu kapianʼE!

³I Sie něngampung kal᷊awọu rosanu, napakapiang kal᷊awọu sakị u,

⁴I Sie napakal᷊iwiru niawanu e wọu lěbing, napẹ̌dal᷊embong kau ringangu kakěndagẹ̌ ore lai tatal᷊ěntụ.

⁵I Sie napakal᷊aedu pẹ̌bawiahu[55] ringangu kapia, hakịu kangangudạ u e měngkai mạtal᷊ěmbuhu kere kalěmba.

⁶MAWU e mạmewẹu tita ringangu kạadilẹ̌ baugu patikụ taumata apan sěsẹ̌dakeng.

⁷I Sie mělẹ̌lahẹ u karakinʼE si Musa ringangu apang kakanoạʼE su tau Israel.

⁸ U MAWU e kai makěndagě dingangu mal᷊ondo, i Sie makědang dingangu kalạ u tatal᷊ěntụʼE.

⁹I Sie tawe měllahěkadẹ̌ sịdutu, ringangu tawe kạdiongeng limangehẹ̌ sarang marěngụ-děngụ.

¹⁰I Sie tawe mělahukung si kitẹ tuhụ dosang kitẹ e, arau měmal᷊isẹ̌ si kitẹ tuhụewe pẹ̌sasal᷊agi kitẹ e.

¹¹Kaiso karěngụewen langị su wowon dunia e kerene kasariane kakěndagʼE waugu taumata kụ měngkạtakụ i Sie.

¹²Karaụewen sẹ̌bangeng sarang sẹ̌dapeng, kerene karaune nirěmmẹʼE kal᷊awọu rosang kitẹ.

¹³Kerẹewe sěngkatau i amang kụkěndagu manga anạ e, kerene MAWU e kụkěndagu taumata kụ mạngimang.

¹⁴Batụu MAWU e masingkạ u i kitẹ e kinoạ bọu a, i Sie mẹ̌tẹ̌tahěndung u i kitẹ e kětạembeng awul᷊ẹ̌ e.

¹⁵Taumata e pẹ̌bawiahe kere rěmpugẹ̌, i sie mẹ̌bẹ̌burạ kere bungang su rahami e;

¹⁶Kereu tiukang u anging, ute i sie semben tawẹdise, saral᷊ain tampạ e sen tawe kahěnganeng.

¹⁷Arawe MAWU e tẹ̌bewe kụkěndagu taumata mạngimang, kapia-Ne e mạtuhung su pal᷊ahite mẹ̌bẹ̌bawělasẹ̌

¹⁸baugu taumata kụ mẹ̌tẹ̌tumpaedẹ̌ su pẹ̌dariandi-Ne, mase ringangu satia mẹ̌děndal᷊engu tita-Ne.

¹⁹MAWU e mẹ̌pẹ̌parenta su sorga, i Sie kai ratu kụ kawasa waugu patikụ e.

²⁰Pẹ̌dalo MAWU, ei malạekatʼE matatoghasẹ̌, kụ dụdaringihẹ̌ dingangu mẹ̌gěngganapẹ̌be apang laoronʼE.

²¹Pẹ̌dalo MAWU, ei patikụ diadikang su sorga, patikụ ěllangʼE kụ mẹ̌kẹ̌koạ be kapulu-Ne.

²²Pẹ̌dalo MAWU, ei patikụ diadikang, su kạguwạ u wanua su kawasa-Ne. Pẹ̌daloko MAWU, ei himukudẹ̌ku e!