Read Sangir MAZMURẸ̌ 104 Bible Online

MAZMURẸ̌ 104 - Sangir bible

MAZMURẸ̌ 104

¹Pẹ̌daloko MAWU, ei himukudẹ̌ku! Apạe kawantugẹ̌ i Kau e, o MAWU Ruataku! I Kau e mẹ̌pẹ̌pakẹ u kal᷊ahamagẹ̌ dingangu kawawantugẹ̌,

²dingangu mẹ̌tẹ̌tatimbuhungu tualagẹ̌. I Kau e namingkahẹ̌ langị kere tenta,

³dingangu němělli Wal᷊e-Nu rasị su wowong akẹ su l᷊angị.[56] Manga winawa e koatengʼU kareta-Nu, i Kau e tụtempang su panidu anging.

⁴ Anging e kinoạʼU e rarolohangʼU ringangu kilạ e mẹ̌tatangkiangʼU.

⁵Apạ e matoghasẹ̌ dunia e nipakarasagʼU e su wal᷊ahuange, hakịu semben tawe kumiọ sarang karěngụ e.

⁶I Kau e něhěmbung dingangu taghal᷊oang, kụ akẹ e nakaelọ manga pusigu wawul᷊urange.

⁷Piạ i Kau e namal᷊ěndihẹ̌, akẹ ene e nelehẹ̌, nelehẹ̌ dingangu maihạ ual᷊ingu ghal᷊ẹ̌dụu tingihʼU e.

⁸Akẹ e nelehẹ̌ limiu wawul᷊urange sarang dal᷊ungu wal᷊ane, sarang tampạ kụ seng nisạdia-Nu waugʼi sie.

⁹I Kau e seng něměllọu apang pẹ̌kětakenge kụ tawe wotonge i sie lumiu, tadeạu kumbahang delaing mẹ̌bal᷊ị měngellọ dunia e.

¹⁰I Kau e napasal᷊iwěbudu simbul᷊u akẹ e su kal᷊awọu wal᷊ane, kụ manga songene lụelehẹ̌ su wěllạ u manga wul᷊ude e,

¹¹baugu mapěnginungu kal᷊awọu binatang su ral᷊one, ringangu mapakaundangu roung manga kalideng kěhu.

¹²Su rěduhe manga manụ u winalangeng e měmpẹ̌kẹ̌koạ sal᷊ehi sire; i sire e měmpạněnsiol᷊ẹ̌ su tal᷊oarang kal᷊awọu manga rokạku.

¹³I Kau e naparasehu tahiti e wọu langị su wawul᷊urange, kụ banua e napenẹ u l᷊ěnnạ u karạdiahangʼU.

¹⁴I Kau e napahětịu rěmpugẹ̌ e waugu binatang, dingangu kal᷊awọu haghin sasuang baugu taumata e. Tangú i sie wotongewe makapahěnsinuang,

¹⁵kụ makaual᷊i akẹ u anggorẹ̌ e kụ makạl᷊ahimpulu. Kerene lai lanang zaitun kụ makạdiadi ghatine matilang, dingangu makạdiadi kaěng kụ makạgěllị u katatatoghasẹ̌ si sie.

¹⁶Kal᷊awọu kakaluangu MAWU e makạhombang tahiti mẹ̌dẹ̌dal᷊embo, patikụ kal᷊aianengu Libanon kụ nisuange hala.

¹⁷Sene tangú nẹ̌sal᷊ehe manga manụ u winalangeng, bahoa mal᷊aing nẹ̌sal᷊ehẹ̌ su kotọ e.

¹⁸Bul᷊ude mararangẹ e nakoạ tampạ u kambingu ral᷊one, rusa kětẹ e mẹ̌bẹ̌baesẹ̌ su al᷊ungu manga watu hanibẹ̌ e.

¹⁹I Kau e napakariading bul᷊ang piněniala tempo, matangěllo e masingkạ u tempon sumědạ e.

²⁰Kereu i Kau e mapakarěndungu ěllo e makoạ hěbi, dingangu kal᷊awọu binatang u kěhu e mẹ̌sal᷊ịgoahẹ̌.

²¹Kal᷊awọu pẹ̌gol᷊u singa e masịhuangu huange měmpẹ̌dẹ̌deạ kinaěnge, mẹ̌dorong kaěng kụ nisạdian Duata.

²²Mageng matangěllo e suměbang, i sire e měmpělingkạ, kụ mahundal᷊oka su tampạ u pẹ̌bawaesang i sire.

²³Tangú siměbangke taumata e waugu mẹ̌koạ hal᷊ẹ̌ e, kụ měmpěhal᷊ẹ̌ sarang bawěllo.

²⁴Kai apạ e kakěpal᷊e munara-Nu e MAWU patikụ e nikoạʼU ringangu kapelesa; banua e napenẹ u riadikangʼU.

²⁵Kakěllạ e laudẹ̌ e enẹ e kasariane naěmpahẹ̌, dingangu riadikang gaghuwạ darodọ e tawe i katiạ.

²⁶ Sene manga kapal᷊ẹ̌ e měmpạhuntondo, ringangu i Lewiatan, nagạ u l᷊audẹ̌ diadikang u e iapěnẹ̌nalang.[57]

²⁷I sire kěbị e mang mạngampal᷊ẹ̌ si Kau, waugu makahombang kaěng su tempone.

²⁸I Kau e něngonggọ, dingangu i sire e měnanampunge, i Kau e měnanadiane, ringangu i sire e kumakaěnge sarang měngkal᷊aedẹ̌.

²⁹Kereu i Kau e měmuning gatinu e i sire e měngkatakụ, kereu al᷊akengʼU e singongone, i sire e mawinasa, ringangu měmpẹ̌sul᷊e makoạ awul᷊ẹ̌ kapia.

³⁰Arawe kamagengu i sire e onggotangʼU e singongo,[58] ute i sire e mariadi; i Kau e mạngonggọu pẹ̌bawiahẹ̌ buhu e su dunia.

³¹Mal᷊owọko kawawantugu MAWU e apakatanạ e sarang kakalẹ̌. Mal᷊owọko i Sie e lụl᷊uasu kal᷊awọu riadikangʼE!

³²I Sie mạmanda runia e kụ makapělẹ̌linuhẹ̌, manga wul᷊ude sẹ̌senggehangʼE, sarang tipune sụsěbang.

³³Iạ e mapulu mẹ̌kantarị baugu MAWU kananduʼm pẹ̌bawiahẹ̌ku, mẹ̌kantarị u raralo waugu Ruataku karěngụeweng iạ ene.

³⁴Mal᷊owọko kakantarịku e mẹ̌tatahino si Sie, u kai i Sie e napakal᷊uasu naungku.

³⁵Milumbạu taumata waradosa e maghěngging bọu wowon dunia e, kụ taumata ral᷊akisẹ̌ e masue mawinasa. Pẹ̌daloko MAWU e ei himukudẹ̌ku! Pẹ̌daloko MAWU!