Read Sangir MAZMURẸ̌ 105 Bible Online

MAZMURẸ̌ 105 - Sangir bible

MAZMURẸ̌ 105

¹Pakitarimakasẹko su MAWU, pěhabarẹ̌kong kasěllahʼE, pẹ̌běkengkong kakanoạʼE su manga wansa.

²Pẹ̌kantarịkong daralo waugu MAWU, pěhabarẹ̌kong kal᷊awọu munara-Ne kụ makạdal᷊inaụ.

³Seng i Sie e MAWU Kụ Limembong Susi; pěmpahul᷊uasẹ̌ u i kitẹ e kai tataghuanengʼE, patikụ apam měmpạněmba e pěmpahul᷊uasẹ̌ bue.

⁴Pẹ̌dorongke katoghasẹ̌ e wọi Sie, kụ pẹ̌suba wue si Sie sěntiniạ.

⁵Ei pal᷊ahiteng Abraham, ěllangʼE, ringangu hěnton Yakub, taumata pinile-Ne, pẹ̌tahěndungko kal᷊awọu karal᷊inaụ kụ seng nikoạʼE, kumbahang miwul᷊eng kal᷊awọu putusangʼE.

⁷MAWU e kai Ruatang kitẹ, kal᷊awọu putusangʼE kinoạ baugu kasěllahu dunia.

⁸I Sie hanesẹ̌ makạtahěndung diandi-Ne, kai waugu sarang karěngụ e.

⁹ Pẹ̌dariandi ene e kinoạʼE ringangi Abraham, kụ bọu ene ringangi Ishak;

¹⁰ bọu e nighuanting si Yakub, nakoạ pẹ̌dariandi kakalẹ̌ baugu umatu Israel.

¹¹UngkuěngʼE, ”Ěntanang Kanaan sarung Takụ i onggọ si kau, makoạ pusakạ tataghuanengu.”

¹²Nạung kal᷊imona umatʼU Mawu e nẹ̌biahẹ̌ kere tau raghị paị sene, kụ i sire tumbạeng mahal᷊i.

¹³I sire mẹ̌pẹ̌palilị bọu wansa sěmbaụ sarang bansa wal᷊ine, mẹ̌pẹ̌papural᷊ing bọu wanua sěmbaụ sol᷊ong banua wal᷊ine.

¹⁴ Arawe MAWU e tawe mapakawalan sai-sai měmpělinda si sire; baugi sire e manga ratu e pinaul᷊ikangʼE,

¹⁵”Kumbahang měmpěnal᷊ukạ si sire apam pinile-Ku e, kumbahang měmpẹ̌koạ dal᷊akisẹ̌ su manga nabi-Ku!”

¹⁶ MAWU e naparěntang karal᷊unusẹ̌ su wanua ene, ringangu něngal᷊ạ kal᷊awọu kaěng mạdaresọ.

¹⁷ Kaiso i Sie něndolohu sěngkatau niapěngal᷊imona si sire, i Yusup seng niwal᷊ụ kere ěllang.

¹⁸Laede nịlaikị dingangu wawěntung, lehẹ e nisohokangu hante uase.

¹⁹ Pěngěnsueěnge nariadị e apang i lẹ̌ol᷊ange, i sie seng nẹ̌tatal᷊ahino ual᷊ingu hengetangu MAWU.

²⁰ Bọu e ratung Misirẹ̌, kawasang manga wansa e, něliwiri sie wọu tahungkụ.

²¹ I sie piněngilasengu hal᷊ẹ̌ u mẹ̌tangkiang istana, dingangu nionggotangu kawasa waugu kal᷊awọu arětạ e;

²²kerene lai su hal᷊ẹ̌ u měngatorẹ̌ kal᷊awọu sawohị u ratu, ringangu měngahạ apang matatimadẹ̌.

²³ Bọu e i Yakub nakoạ sarang Misirẹ̌ kụ nẹ̌banua paịse kere tau raghị.

²⁴ MAWU e napakal᷊awọu umatʼE, hakịu i sire limembong katoghase wọu rokạ i sire.

²⁵I Sie němal᷊ui naungu tau Misirẹ̌ e hakịu měmpẹ̌bẹ̌binsị u umatʼE ringangu měmpạngakal᷊ẹ̌ manga ěllangʼE.

²⁶ Bọu e i Sie něndolohi Musa ěllangʼE ringangi Harun tau pinile-Ne.

²⁷Su Misirẹ̌ e i sire nẹ̌koạ manga karal᷊inaụ, hal᷊ẹ̌ e masaria wọu MAWU,

²⁸ dingangu i sire matuhụ su tita-Ne. Mase MAWU e napakariadin banua ene marěndung-děndung.

²⁹ Sal᷊ụ i sire e niwal᷊ui-Ne pinakakoạ daha, hakịu kěbị kinạ e nasue naupu.

³⁰ Tumpepạ e měngkate nẹ̌sal᷊igoahẹ̌ su wanuan sire, hakịu sarang nakasuẹ̌ su ral᷊ungu istanan datu.

³¹ Ual᷊ingu kawasan Duata e riměntạ e kal᷊awọu lango, ringangu těnị němpẹ̌dahěmbung su kạguwạu wanuan sire.

³² I Sie naparasehu eisẹ̌ piněngaweng tahiti, dingangu naparěntang kilạ mẹ̌sẹ̌sasahedẹ̌.

³³I Sie napakahakang kalung anggorẹ̌ dingangu kalung ara, dingangu napakahakang kal᷊awọu kakaluang i sire e.

³⁴ Ual᷊ingu parenta-Ne, riměntạ e kumbaị, kụ apạ e mal᷊awọ-l᷊awọ tawe karekenang.

³⁵I sire němpẹ̌kinạ kal᷊awọu sasuang su rahami, ringangu nasueng kaěnge si sire kal᷊awọu wuang darukutang i sire e.

³⁶ Mase niapakapate-Ne manga anạ i sire esẹ i akang su apạewem bal᷊en tau Misirẹ̌ e.

³⁷ Bọu e tau Israelẹ̌ e niahạ e niapasěbang, i sire nẹ̌bawa wul᷊aeng dingangu sal᷊aka; kěbị e mal᷊ahuweka ringangu matatoghasẹ̌.

³⁸Tau Misirẹ̌ e nihombangengu ghěnggang dingangu takụ, kụ i sire e lụl᷊iagẹ̌ su tempon tau Israelẹ̌ e siměbang.

³⁹ Duata e namingkahu winawae waugu i pangěllung umatʼE, dingangu putung i panualagẹ̌ su tempong hěbi.

⁴⁰ I sire němpẹ̌dorong, kụ bọu ene niaparěnta-Ne manụ mělle, i sire nighěllirangʼE borotẹ̌ bọu sorga sarang něngkal᷊aedẹ̌.

⁴¹ Niwẹ̌ka-Ne wul᷊udu watu e, kụ bọu e nẹ̌giase akẹ, kụ nelehẹ̌ kere sal᷊ụ su wanua l᷊inggi.

⁴²Batụu MAWU e mẹ̌tẹ̌tahěndung diandi-Ne si Abraham, ěllangʼE.

⁴³Tangú niěntudʼE umatʼE ringangu ral᷊uasẹ̌, taumata e apam pinile-Ne ringangu ral᷊iagẹ̌.

⁴⁴ Ěntanang manga wansa e nionggọʼE si sire, manga rahamin sire e nikoạ tataghuanengu umatʼE,

⁴⁵tadeạu umatʼE ene e matuhụ su manga tita-Ne, ringangu tụtuhụ kal᷊awọu manga titaʼE. Pẹ̌daloko MAWU!