Read Sangir MAZMURẸ̌ 106 Bible Online

MAZMURẸ̌ 106 - Sangir bible

MAZMURẸ̌ 106

¹ Pẹ̌daloko MAWU! Pakitarimakasẹko su MAWU, watụ u i Sie mapia; kakěndagʼE kakalẹ̌ tạ kahẹ̌pusange.

²I sai makasue mẹ̌bal᷊ong kawasaʼm MAWU, ringangu makạberang daralo kụ mẹ̌tẹ̌tatal᷊ahino si Sie?

³Kariangkamang taumata apang matuhụ su kal᷊awọu tita-Ne, dingangu sěntiniạ mang mẹ̌tẹ̌tatal᷊ahino su ral᷊ungu kakanoạ e.

⁴Tahěndungeko iạ, o MAWU, baugu kapia-Nu su manga umatʼU, tul᷊ungko iạ lai kereu i Kau e mapakasal᷊amati sire.

⁵Mal᷊owọko iạ e makasilo katatul᷊enden taumata apam pinile-Nu e, ore lai sěngkapahul᷊uasẹ̌ dingangu manga umatʼU. Mal᷊owọko iạ e sěngkapahul᷊uasẹ̌ dingangu sěngkapahul᷊iagẹ̌ dingangu taumata apang makoạ tataghuanengʼU.

⁶I kami e seng nẹ̌dosa kere manga i upung i kami e; i kami seng nẹ̌koạ dal᷊akisẹ̌ dingangu nẹ̌duruhaka.

⁷ Nạung su Misirẹ̌ e manga i upung i kami e tawe nakaěnna, munara-Nu kụ makạdal᷊inaụ tawe kinahěnganeng i sire. I sire niwul᷊eng kakěndagʼU e mẹ̌dẹ̌dal᷊embo kụ masandigu Laudu Lěntuwu e i sire němpěnggohaeng su Mawu Karangetange.[59]

⁸Kaiso MAWU e napakasal᷊amati sire e, waugu watangenge hala, tadeạu kawasa-Ne e mal᷊ahẹ.

⁹ Ual᷊ingu laoro-Ne hakịu Laudu Lěntuwu e natehe, i Sie něngahạ umatʼE limiu laudẹ̌ kere limiu wanua l᷊inggi.

¹⁰Ual᷊ingu kerene tangú niapakasal᷊amatʼE i sire e wọu l᷊iman sekẹ, nipakal᷊iwirʼE i sire wọu kawasan sekẹ.

¹¹Kaiso akẹ e namul᷊usu sekẹ i sire, kụ tawẹ u nal᷊ěmbe sarang sěngkatau.

¹² Mase umatʼE mạngimang su riandi-Ne ringangu mẹ̌kẹ̌kantarị mẹ̌dẹ̌dalo si Sie.

¹³Kaiso i sire tawẹ karararěngụ e niwul᷊eng pẹ̌kakoạu MAWU e, kụ i sire apidu nẹ̌karadiahang tawe kadiongeng nakitěgu si Sie.

¹⁴ I sire e wẹ̌bal᷊ẹ̌bidangu abul᷊in sire, su wanua l᷊inggi; kụ něnal᷊ukạ Mawu Ruata.

¹⁵I Sie nẹ̌gěllịu apan dẹ̌dorongang i sire e, kaiso lai sahindạ e něnakị si sire.

¹⁶ I sire e němpẹ̌dahirị si Musa e su wanua l᷊inggi e ringangu si Harun ěllangʼE susi.

¹⁷Bọu e runia napahiạ něnelohẹ̌ si Datan, něngambung si Abiram dingangu ral᷊ohoʼm bal᷊ene.

¹⁸Putunge limintụ něnahedẹ̌ ghal᷊ipohon sire e, něhěngisẹ̌ patikụ apam bọu nẹ̌duruhaka e.

¹⁹ Su Wul᷊udu Sinai i sire nẹ̌koạ anạu sapi wul᷊aeng, ringangu nẹ̌suba tul᷊ada niwěmbing ene.

²⁰I sire něnal᷊iu Ruata kụ mawantugẹ̌ e ringangu tul᷊adan sapi kụkaěng děmpugẹ̌ e.

²¹I sire niwul᷊en Duata měnanal᷊amatẹ̌ si sire, kụ seng němpẹ̌koạ manga hal᷊ẹ̌ masasaria su Misirẹ̌.

²²Apạ e makạtatakụ kal᷊awọu kakanoạʼE su wanua ene, makạl᷊aherang kakanoạʼE su Laudu Lěntuwu.

²³Tangú Ruata e piạ ol᷊ange mapakawinasang manga umatʼE, kaiso kawe nipetokang i Musa taumata pinile-Ne. I Musa e nakoạ měnanal᷊oara si sire, hakịu nal᷊ěda ral᷊angehu Ruata e.

²⁴ Bọu ene i sire tawe něnarimạ u wanua mal᷊ěnggihẹ̌ ene, ual᷊ingu tawe měngangimang su riandin Duata.

²⁵I sire e ghụgalumị su ral᷊ungu tentan sire kụ madiri rumaringihẹ̌ tingihu MAWU.

²⁶Tangu ringangu pẹ̌sasalu i Sie nẹ̌diandi sarung měmate si sire su wanua l᷊inggi.

²⁷ Hěnton sire sarung i rěmmẹ su tal᷊oarang manga wansa ringangu pinẹ̌kal᷊iaesẹ̌ su kal᷊awọu wanua raghị.

²⁸ Bọu ene su Peor i sire němpěněmba Baal, dingangu němpẹ̌kaěng sasěmba waugu manga mahang duata.

²⁹Kakanoạ ene makạsongkahẹ̌ dal᷊angehu MAWU, hakịu i sire nitěmboěngu sahindạ makạtatakụ.

³⁰Kaiso i Pinehas měngkatewe něhukungu apang piạ sal᷊ane, kụ nangědọe sahindạ ene.

³¹Pẹ̌kakoạ ene e nikoạ kere tatiwạ baugi sie, ringangu tẹ̌tahěndungang sarang marěngụ-děngụ.

³² Su manga sumu su Meriba e i sire nakal᷊angehẹ̌ MAWU, ringangu nakasigěsạ si Musa ringangu kakanoạ i sire.

³³I sire seng nakakariadi naunge nakedọ, hakịu i sie mẹ̌bisara e sen tawe mẹ̌tatiněnna.

³⁴ Manga wansa wal᷊ine e tawe pinakaupun sire e, kerẹewe seng niparentaʼm MAWU.

³⁵I sire maal᷊ạ nẹ̌těngkal᷊aụ u wansa ene, ringangu nẹ̌těno kakakoạu taumata apang tawe mẹ̌kiral᷊a Ruata.

³⁶Bọu ene i sire naněmba manga mahang duata, kụ ene nakoạ banggilu kananawon sire e.

³⁷ I sire němpěnarakang u manga anạ i sire su manga mahang duatang Kanaan.

³⁸ I sire napatědọu rahan taumata kụ tawẹ sal᷊ane, rahang manga anạ i sire hala e, mědeạu i sarakang su manga mahang duata; hakịu wanua ene pinakal᷊amuhụ i sire.

³⁹Ual᷊ingu kal᷊awọu kakanoạ ene tangú i sire mal᷊amuhụ, dingangu tawẹ satian sire su Mawu Ruata.

⁴⁰ Mase ral᷊angehu MAWU e riměllị e piněndokạ si sire, i Sie narěntingu tataghuanengʼE hala e.

⁴¹Kụ nisarakangʼE i sire su manga wansa, niwalanʼE i sire su al᷊ungu kawasan sekẹ.

⁴²Bọu e i sire lẹ̌episangu manga sekẹ i sire, kụ nipẹ̌tumpěkuhẹ̌ su al᷊ungu kawasan sire.

⁴³Masau susul᷊ene MAWU e napakal᷊iwiri sire, kaiso i sire něngalembo puluang měnggohaeng, hakịu i sire nawihua su ral᷊ungu kal᷊awọu rosan sire.

⁴⁴Kaiso MAWU e rụdaringihẹ̌ kakahiorọ i sire, i Sie tụtatingang kasasusan sire.

⁴⁵Baugi sire i Sie mẹ̌tẹ̌tahěndung diandi-Ne ringangu tatal᷊ěntụ i sire ual᷊ingu kakěndagʼE masaria.

⁴⁶I Sie napakariadin sire i kẹ̌kěndagu kal᷊awọu taumata apang měnẹ̌naweng si sire e.

⁴⁷ Ambangeko i kami, o MAWU Ruatang kami, tampungko i kami e wọu tal᷊oarang manga wansa, tadeạu i kami e makakal᷊iomaneng u tatarimakasẹ dingangu mẹ̌dalo arengʼU kụ susi e.

⁴⁸Pẹ̌daloko MAWU, Ruatang Israel, bọu orasẹ̌ ini e ringangu sarang marěngụ-děngụ. Balạete patikụ taumata e měmpẹ̌berang, ”Aming!” Pẹ̌daloko MAWU!