Read Sangir MAZMURẸ̌ 107 Bible Online

MAZMURẸ̌ 107 - Sangir bible

MAZMURẸ̌ 107

¹ ”Pakitarimakasẹko su MAWU, watụ u i Sie kai mapia, kakěndagʼE kakalẹ̌ tạ kahẹ̌pusange.”

²Hinong pěmpẹ̌berang ene pakasau, e i kamene apan seng pinakasal᷊amatẹ̌ bọu kasasusa.

³I kamene seng nitampungʼE wọu manga wanua raghị, bọu raki ringangu wahẹ, sawěnahẹ̌ dingangu timuhẹ̌.[60]

⁴Piạu němpẹ̌palilị su wanua l᷊inggi, dingangu wěgan dal᷊eng sarang tampạ katatanakeng su soa.

⁵I sire kinal᷊unusang dingangu něngkarou, ringangu kinahẹ̌pusangu pělaharapi sire.

⁶Su ral᷊ungkeng kasasěsẹ i sire e, měngkai měmpẹ̌kui MAWU e, kụ i Sie napakal᷊iun sire wọu kasasěsẹ.

⁷I Sie mạmihing si sire su ral᷊eng matene sol᷊ong tampạ katatanakeng su soa.

⁸Hinone i sire makitarimakasẹ su MAWU ual᷊ingu kakěndagʼE, kahiang kal᷊awọu munara-Ne makạdal᷊inaụ baugu taumata.

⁹Batụu i Sie seng napanginungu taumata apang něngkarou, ringangu niapẹ̌dal᷊embong luensangu haghing kapia su taumata měngkạhutunge.

¹⁰Piạbeng mạl᷊ahangkung su ral᷊ungu kararěndung, taumatan tahungkụe masunsara kạl᷊aikị u hante uase,

¹¹u i sire seng nẹ̌pahuwungkadẹ̌ niěbạ Duata, ringangu tawe nahimang su parentang Karangetange.

¹²I Sie napakahěmpungu naung i sire, dingangu karadiahang i sire masěgadẹ̌; kụ i sire e něngkaondol᷊ẹ̌ kụ tawẹ apa reng makatul᷊ung.

¹³Su ral᷊ungu kasasěsẹ e i sire měmpẹ̌kẹ̌kui MAWU, kụ i Sie napakal᷊iwiri sire e wọu kasasigẹ̌sạ.

¹⁴I Sie něngahạ i sire nipasěbang bọu kararěndung, dingangu naměsụ lahapusi sire e.

¹⁵Hinone i sire makitarimakasẹ su MAWU ual᷊ingu kakěndagʼE, ual᷊ingu kal᷊awọu munara-Ne makạdal᷊inaụ baugu taumata e.

¹⁶U i Sie e něndal᷊engge kal᷊awọu tukadẹ̌ tambaga, ringangu nělahěmpung kal᷊awọu papal᷊e tukadẹ̌ uase.

¹⁷Piạu nạung longong dingangu nasigěsạ ual᷊ingu rosan sire e, mase lai nịbawanti kahiang pẹ̌sasal᷊an sire.

¹⁸I sire něngkawoehu kal᷊awọu kaěng, i sire e nạung seng maraning papate.

¹⁹Su ral᷊ungu kasasěsẹ, i sire měmpẹ̌kẹ̌kui MAWU, ringangu i Sie mạpakal᷊iwiri sire e wọu kaghaghěnggang.

²⁰I Sie mapakạpian sakị i sire e ringangu hengetangʼE, ringangu mapakạl᷊iwiri sire e wọu ral᷊ungu lěbing.

²¹Mambeng hinone i sire e makitarimakasẹ su MAWU e ual᷊ingu kakěndagʼE, ual᷊ingu kal᷊awọu karạdiahangʼE makạdal᷊inaụ baugu taumata.

²²Balạekere i sire makitarimakasẹ apidu mẹ̌bawa sasěmba, ringangu měhabaru kakanoạʼE ringangu manga kakantarịu ral᷊uasẹ̌.

²³Piạ lai apang mẹ̌motọ taghal᷊oang su kapal᷊ẹ̌, baugu měmpẹ̌lẹ̌hambakẹ̌ su l᷊audẹ̌ mal᷊oang.

²⁴I sire makạsilo apang kinoạ u MAWU e, munara-Ne makạdal᷊inaụ su taghal᷊oang.

²⁵Ual᷊ingu hengetangʼE ute ringangu piạ děllang timiụ, kụ mẹ̌děnduị u wělladu sasị e taraị matoghasẹ̌.

²⁶Manga kapal᷊ẹ̌ e měngkạduị taraị marangẹ sol᷊ong langị, bọu ene maěnsạ sol᷊ong ěllị. Kal᷊awọu taumata e měngkaol᷊ọ u kawawahanin sire e mẹ̌těngon silakạ kerene kasariane.

²⁷I sire e mẹ̌bẹ̌bul᷊ihẹ̌ dingangu mẹ̌gẹ̌gonggẹ kere tau wukang dingangu kinahěpusangu tahuěnna.

²⁸Su ral᷊ungu kasasěsẹ i sire e měmpẹ̌kẹ̌kui MAWU, kụ i Sie měliwiri sire e wọu kasasigěsạ.

²⁹Děllang kụ nẹ̌tondaisẹ̌ e niapakal᷊ẹ̌da-Ne, manga luạ e mal᷊aing niapakal᷊enehe.

³⁰I sire e mal᷊uasẹ̌, baugu rěllange seng napaghohẹ̌; kụ niěntudʼE i sire e sol᷊ong belengang pẹ̌tẹ̌timonaěng.

³¹Mambeng hinone i sire e makitarimakasẹ su MAWU ual᷊ingu kakěndagʼE, ual᷊ingu manga munara-Ne makạdal᷊inaụ baugu taumata.

³²I sire e mapakạtelengu kawawantugu MAWU e su tal᷊oarang umatʼE, ringangu mẹ̌dẹ̌dalo si Sie su ral᷊ungu pẹ̌tatampungu katatimadenge.

³³Apan sal᷊ụ e niwal᷊ui-Ne pinakakoạ banua l᷊inggi, simbul᷊u akẹ e pinakakoạ e ěntana mamara.

³⁴Ěntana matawa e nikoạʼE ěntana mapěhadẹ̌, kahiang karal᷊akisu taumata apang mạtanạ sene.

³⁵Banua l᷊inggi e niwal᷊ui-Ne pinakakoạ mal᷊ane, ěntana mamara e pinakakoạ simbul᷊u akẹ.

³⁶Taumata apang kinal᷊unusang e piněllọ e sene, kụ i sire němpẹ̌koạ soa waugu katatanakeng i sire.

³⁷I sire e němpěnawuhu wine su manga waelẹ̌ dingangu němpẹ̌suangu anggorẹ̌, bọu e němpěngomol᷊ẹ̌ buane maěnasẹ̌.

³⁸MAWU e něngal᷊amatẹ̌ si sire kụ niapakahuntinamba, ringangu binatang i sire e tatapẹ̌ pinakahuntinambang kal᷊awọe.

³⁹Kaiso i sire e kinawatạ dingangu nal᷊ěmbe mahal᷊i, kahian sunsara ringangu pananědạ u tatingkaị.

⁴⁰MAWU mapakasanạu apang měngangawasa si sire, ringangu měngoro si sire apẹ̌palilị su wanua l᷊inggi, kụ tawẹ apa ral᷊enge.

⁴¹Arawe taumata kasiang tangú pinakal᷊iwirʼE, wọu kasasịgẹ̌sạ i sire, pal᷊ahěnton sire e ipahuntinamba kere ghapaěngu domba.

⁴²Taumata naunge matul᷊idẹ̌ e makasilo ringangu mal᷊uasẹ̌, arawe taumata ral᷊akisẹ̌ e ipẹ̌kěmming mohonge.

⁴³Mal᷊owọko taumata pelesa e mẹ̌tahuěnnang kal᷊awọu tamai ene, ringangu mangaku u MAWU e tẹ̌bewe kụkěndagẹ̌.