Read Sangir MAZMURẸ̌ 108 Bible Online

MAZMURẸ̌ 108 - Sangir bible

MAZMURẸ̌ 108

¹Kakantarị Mazmuri Daud.

² Iạ mangimang matoghasẹ̌, o Ruata, iạ mapulu mẹ̌kantarị dingangu mẹ̌dalo si Kau. Ei pẹ̌bangungke, himukudẹ̌ku!

³Ei pẹ̌bangungke, kakobitang dingangu kěcapi! Iạ e mapulu měmuko tualagu wěmbanaho.

⁴MAWU, iạ e mapulu makitarimakasẹ si Kau su tal᷊oarang manga wansa. Iạ e lụěnningu mẹ̌kantarịu raralo si Kau, su tal᷊oarang umatẹ̌ lawọ e.

⁵U kai masaria kakěndagʼU e sarang langị, dingangu satianʼU e sarang manga winawa.

⁶O Ruata, lahẹko kasěllahʼU e su l᷊angị, dingangu kawawantugʼU e su kạguwạ u dunia.

⁷ Ambangeko i kami e ringangu kawasa-Nu, kụ simbaheko kakal᷊iomaneng i kami e, tadeạu taumata apang ikẹ̌kěndagʼU e ambangeng.

⁸Bọu katatanakengʼE susi e[61] Ruata něhengetang, ”Iạ e mapulu lumuasẹ̌ kụ měmahiạu ěntanan Sikem, Bal᷊ang Sukot Takụ pẹ̌dal᷊ahurị.

⁹Gilead dingangu Manasye e kai tataghuaneng-Ku, Efraim kai sapeọ uada-Ku, ringangu Yehuda e těkingu kararatuang-Ku e.

¹⁰Arawe Moab ute kai tampạu pěnganguhaseng laedẹ̌-Ku; Iạ e lụl᷊uasu nakawatạ Filistea. Baugu Edom Takụ pěnděmeěngu sapatu-Ku, tabidạu tatiala u i sie kai tataghuaneng-Ku.”

¹¹I sai tangú měngahạu iạ sol᷊ong Edom? I sai měngahạ u iạ sol᷊ong soa kụ matoghasẹ̌ ene?

¹²O Ruata, i Kau e wal᷊inewe timol᷊e ringangi kami e tangú? I Kau e wal᷊inewe sěngkasěbang dingangu sordadong kami e ho?

¹³Tul᷊ungko i kami e mẹ̌těngon sekẹ, u laontol᷊u taumata e kai sia-sia.

¹⁴Dingangu Ruata e, i kitẹ e sarung mal᷊intoị dingangu makawatạ; kai i Sie nakawatạ sekẹ i kitẹ e.