Read Sangir MAZMURẸ̌ 109 Bible Online

MAZMURẸ̌ 109 - Sangir bible

MAZMURẸ̌ 109

¹Baugu měngangahạ kantarị. Mazmuri Daud. O Ruata kụ sěntiniạ dẹ̌daloěng, kumbahang mẹ̌těngkarěmasẹ̌.

²U iạ e kai nialoěngu taumata ral᷊akisẹ̌ e ringangu tahapělinga kụ mẹ̌kẹ̌kakekeng běkene konti mạul᷊ị u iạ e.

³I sire něngalo si siạ, kal᷊awọu waweran sire napenẹ u pẹ̌bawinsị, dingangu němpěnekẹ si siạ e tawẹ apa sěbapẹ̌ e.

⁴I sire e měmpạnoke si siạ, maningbe iạ e kụkěndagi sire, ringangu seng nẹ̌kal᷊iomaneng i sire.

⁵I sire e mạmal᷊isẹ̌ kapiaku e ringangu karal᷊akisẹ̌, ringangu mạmal᷊isẹ̌ kakěndagẹ̌ku e ringangu pẹ̌bawinsị.

⁶Pěhengkẹkon sěngkatau ral᷊akisẹ̌ e waugu pěhukung si sie, balạete i sie pakikalakẹ̌ su rokạ e.

⁷Balạekere i sie pakihukung dingangu ipakal᷊ahẹu nẹ̌sal᷊a, dingangu walạekere kakal᷊iomanenge kakoạ dosa.

⁸ Balạekere pẹ̌bawiahe lighạ pakal᷊iu, ringangu diabatange rol᷊osangu taumata wal᷊ine.

⁹Balạekere manga anạe apakakasisi, dingangu kawinge e apakawal᷊u.

¹⁰Balạekere manga anạe apẹ̌taharorong kụ mẹ̌pẹ̌palilị, dingangu tẹ̌tokol᷊ang[62] bọu wal᷊ene naghoghahẹ̌ e.

¹¹Balạekere kal᷊awọu tataghuanenge pul᷊ahoěngu měnanětul᷊ẹ̌ utang, dingangu wuan saghede ahoěngu taumata.

¹²Kumbahangbe piạu naunge mapia si sie, arau tumal᷊ěntụ u manga rariọ kụ nitěntange.

¹³Balạekere kal᷊awọu hitene pakawinasa, ringangu arenge kawul᷊enangu sěmbihingangu pal᷊ahite tuhụ e.

¹⁴Balạekere karal᷊akị i upunge kạtatanạ tẹ̌tahěndungangu MAWU, dingangu rosan ninange tawe niěmmụ.

¹⁵Balạekere rosan sire sěntiniạ tẹ̌tahěndungangu MAWU, ringangu tawẹ apa kụ deng mẹ̌tahěndung si sire su dunia.

¹⁶Batụu tau ene tawe mẹ̌tatahěndung manodẹ u kakěndagẹ̌. I sie mạnumbiagẹ̌ tau kasiang dingangu lụl᷊ahunsusa, ringangu mẹ̌mate taumata kụ seng tawe makakoạ apa-apa.

¹⁷I sie kai puluang měngane; kụ balạ e sẹ̌sane katuhungangu ane! I sie madiri měngonggọu al᷊amatẹ̌; balạekere i sie tawe kawuakengu al᷊amatẹ̌!

¹⁸Baugʼi sie e měngane ene kai kakanoạ biasa, mẹ̌sul᷊ungu mělẹ̌luheng pakeange. Balạekere laane ene e apatěpasẹ̌ kere akẹ sol᷊ong badange, dingangu kere lana sol᷊ong dal᷊ungu manga ruhine.

¹⁹Balạekere laane ěndaị e apěhěping si sie kere pakeang, dingangu hanesẹ̌ mẹ̌měgong si sie kere papehẹ.

²⁰MAWU, hukungko apang mạngěnsilẹ̌ si siạ, baugu taumata kụ mẹ̌bẹ̌bisaran dal᷊akị mạanung iạ.

²¹Kaiso tul᷊ung bue iạ e tuhụ diandi-Nu, o MAWU Ruataku, ambangeko iạ e ual᷊ingu kapia ringangu kakěndagʼU.

²²Batụu iạ e kasiang dingangu masunsara, dingangu naungku e nal᷊esẹ sarang dal᷊unge.

²³Iạ e maraning mailang kere kěngkau tempom bawěllo, iạ e pinakal᷊iwirẹ̌ kere kal᷊imbotong.

²⁴Bukuku e kụkende kahiang pẹ̌papuasa, badangku e mahusụ-husụ.

²⁵ Taumata apang nakasilo si siạ e mělẹ̌heghesẹ̌ si siạ kapẹ̌kakilingu těmbọ e.

²⁶Tul᷊ungko iạ, o MAWU Ruataku, ambangeko iạ tuhụ kakěndagʼU.

²⁷Tangú sekẹku sarung masingkạ u ene kakanoạʼU, u i Kau, MAWU e nẹ̌koạ ene.

²⁸Manimbe i sire němpěngane si siạ, mal᷊owọko i Kau e měngal᷊amatẹ̌ si siạ. Manimbe i sire němpẹ̌pětị e, i sire e sarung i pakamea; kaiso mal᷊owọko iạ ěllangʼU e ipakal᷊uasẹ̌.

²⁹Balạekere taumata apang měmpạnoke si siạ e kahěmbungangu kasasamedẹ̌, dingangu kamamea e měliwung si sire kere kakingkaeng.

³⁰Iạ e mapulu mẹ̌dalo MAWU ringangu tingihẹ̌ maihạ, mapakateleng i Sie su tal᷊oarang komol᷊angu umatẹ̌.

³¹Batụu i Sie tumatawang dingangu mapakasal᷊amatu taumata kasiang bọi sire apang něnawong hukumang papate si sie.