Read Sangir MAZMURẸ̌ 115 Bible Online

MAZMURẸ̌ 115 - Sangir bible

MAZMURẸ̌ 115

¹Bal᷊inewe i kami, o MAWU, wal᷊ine i kami, kaiso i Kau e hala hinon daloěng, batụu i Kau e satia ringangu tatapẹ̌ kụkěndagẹ̌.

²Unụ e manga wansa e iapẹ̌bera u, ”Kai suapa Ruatan sire e?”

³Duatang kitẹ e ene su sorga, i Sie mẹ̌kẹ̌koạ apang i kẹ̌kapulu-Ne.

⁴ Mahang duatan sire e kai wul᷊aeng dingangu sal᷊aka, koạu l᷊iman taumata.

⁵I sire e piạ mohonge kaiso tawe makawawera, piạ matan sire kaiso tawe makasasilo.

⁶I sire piạ tul᷊in sire kaiso tawe makararingihẹ̌, piạ irung i sire, kai tawe makal᷊aimbu.

⁷I sire piạ l᷊iman sire, kaiso tawe makasasaghipo, piạ laedi sire, kaiso tawe makararal᷊eng, dingangu tawẹ tingihi sire sụsẹ̌bang bọu tinggol᷊ange.

⁸Mal᷊owọko mambeng kerene pẹ̌bawiahu[65] taumata apang mẹ̌kakoạ e, ringangu kěbị taumata apang mạngimang si sie.

⁹E, Israel, pěmpangumbalako su MAWU, seng i Sie e mẹ̌tul᷊ung dingangu mangěllung si kamene.

¹⁰E manga imang, pangumbalako su MAWU, seng i Sie e mẹ̌tul᷊ung dingangu měngěllung si kamene.

¹¹E, kěbị apang měngkạtakụ u MAWU, pěmpangumbalako su MAWU, seng i Sie e mẹ̌tul᷊ung dingangu měnirung si kamene.

¹²MAWU e mẹ̌tahěndung si kitẹ dingangu sarung měngal᷊amatẹ̌ si kitẹ, i Sie sarung měngal᷊amatẹ̌ tau Israel dingangu kal᷊awọu imang pal᷊ahiten Harun.

¹³ I Sie sarung měngal᷊amatẹ̌ taumata apang mạtakụ u Mawu, darodọ arau ghaghuwạ.

¹⁴Karimạko MAWU e mapahuntinambang kakẹ̌pal᷊i kamene e, mapakakěpal᷊eweng kamene ringangu manga hiteng kamene.

¹⁵Mal᷊owọko i kamene al᷊amateng u MAWU, měndariadi langị dingangu dunia!

¹⁶Langị e kai tataghuanengu MAWU samatang, arawe runia e nionggọʼE su taumata.

¹⁷MAWU e tawe raraloěngu tau nate, kahian taumata kụ seng limintụ sol᷊ong tampạ kụ marěmasẹ̌ e.

¹⁸Arawe i kitẹ kụ měběbiahẹ̌ e hinone makitarimakasẹ si Sie e, orasẹ̌ ini ringangu sarang marěngụ-děngụ. Karaloko MAWU!