Read Sangir MAZMURẸ̌ 116 Bible Online

MAZMURẸ̌ 116 - Sangir bible

MAZMURẸ̌ 116

¹Iạ e kụkěndagu MAWU, watụ u i Sie e rụdaringihẹ̌ si siạ, dingangu mẹ̌pẹ̌pandungbe kakahiorọku.

²I Sie rụdaringihẹ̌ bue si siạ, apangkewe iạ kumahiorọ si Sie.

³Iạ e niliwungangu papate; papate makạbintogẹ̌ e něhěgạ si siạ, kụ nakataghiawahẹ̌ dingangu nakatatakụ si siạ e.

⁴Tangú iạ kimahiorọ su MAWU, ”O MAWU, iạ e mẹ̌kẹ̌kahumang u ambange wue iạ!”

⁵MAWU e makěndagẹ̌ dingangu adilẹ̌; Duatang kitẹ e napenẹ u tatal᷊ěntụ.

⁶MAWU e mạněntanudẹ̌ apan taumata kụ naunge masanạ; piạ iạ e seng tanakakoạ apa-apa e, niambangengʼE iạ.

⁷Pinakal᷊enehe naungku e, u MAWU e kai mapia si siạ.

⁸MAWU e seng něliwiru iạ e wọu papate; niliwuhʼE iạ dingangu tawe nipakawala-Ne pinakanawo.

⁹Tangú iạ e wotongewe makateěng pẹ̌bawiahẹ̌ su dunia ini, su ral᷊ungu pẹ̌kakěllungang MAWU.

¹⁰ Iạ tẹ̌bewe mạngimang, manimbe iạ mẹ̌bera u, ”Iạ e tumanị u lẹ̌ěpisang.”

¹¹Su ral᷊ungu pẹ̌bawingọku iạ e nẹ̌bera, ”Tawẹ u sarang sěngkatau reng kapangimangeng.”

¹²Kai apạ e takụ i kaonggọ su MAWU i pěmal᷊isẹ̌ kapia-Ne si siạ ngae?

¹³Iạ e hědo mẹ̌bawa sasěmba anggorẹ̌ e waugu MAWU mědeạu makitarimakasẹ su kakěndagʼE.

¹⁴Iạ e sarung mapakasěhụ u kědoku e si Sie, su těngong kal᷊awọu umatʼE.

¹⁵MAWU apạ e tụtal᷊ěntụ u kakaten sěngkatau kụ i kẹ̌kěndagʼE.

¹⁶Iạ ini e ěllangʼU, o MAWU, mẹ̌sul᷊ungu i ninangku, iạ e mal᷊aing mẹ̌kẹ̌kal᷊iomaneng si Kau i Kau e seng naměllọu iạ bọu tahungkụ.

¹⁷Iạ e hědong mẹ̌bawa ghaghěllị tatarimakasẹ si Kau, kapělẹ̌humpạeng kakal᷊iomaneng si Kau.

¹⁸Iạ e sarung mapakasěhụ u kědoku e su MAWU, su těngong kal᷊awọu umatʼE

¹⁹kụ nẹ̌tampung su rělahu Wal᷊em MAWU, su tal᷊oarang soan Yerusalem. Karaloko MAWU.