Read Sangir MAZMURẸ̌ 118 Bible Online

MAZMURẸ̌ 118 - Sangir bible

MAZMURẸ̌ 118

¹ Pakitarimakasẹ e su MAWU watụ u i Sie kai mapia, kakěndagʼE kakalẹ̌ tạ kahẹ̌pusange.

²Israelẹ̌ e pẹ̌berako, ”KakěndagʼE kakalẹ̌ tạ kahẹ̌pusange.”

³Manga imang e pẹ̌bera, ”KakěndagʼE kakalẹ̌ tạ kahẹ̌pusange.”

⁴Kal᷊awọu taumata mạtakụ u Mawu e pẹ̌bera, ”KakěndagʼE kakalẹ̌ tạ kahẹ̌pusange.”

⁵Su ral᷊ungu kasasěsẹku e iạ e mẹ̌kẹ̌kui MAWU; wọu e i Sie rimaringihẹ̌ kụ něliwiru iạ e.

⁶ Iạ e tawe ghumaghěguhẹ̌ batụu MAWU e mạněntanudẹ̌ si siạ, taumata e tawe makakoạ apa-apa si siạ e.

⁷MAWU e rụděndingang si siạ mẹ̌deạu mẹ̌tul᷊ungu iạ, iạ e sarung makasilo sekẹku e i kawatạ.

⁸Mapiawe mẹ̌těngkaěllung su MAWU e, sul᷊ungu mangumbala su taumata.

⁹Mapiawe mẹ̌těngkaěllung su MAWU e, sul᷊ungu mělẹ̌harapẹ̌ su matatuhasẹ̌.

¹⁰Mal᷊awọ sědụ e mạngělikụ si siạ; kụ ual᷊ingu kawasang MAWU e i sire i kẹ̌kawatạ.

¹¹I sire mělẹ̌liwung si siạ balạewe wọu těngone sude; ual᷊ingu kawasang MAWU e, i sire kẹ̌kawatạku.

¹²Mẹ̌sul᷊ungu katiupang i sire měmpẹ̌lẹ̌liwung si siạ e, ual᷊ingu kawasang MAWU, i sire e takụ ikawatạ. Su ral᷊ungu sěngkakondạ i sire e ipakạpurạ, kere putung nakatutung sumpinị.

¹³Iạ e nialoěng marehe kụ maraning mawatang, kaiso MAWU e nẹ̌tul᷊ung u iạ.

¹⁴ MAWU e kai katoghasẹ̌ku e ringangu ikẹ̌karalọku, i Sie seng napakasal᷊amatu iạ e.

¹⁵Daringihẹ̌ko tingihu ghion nakawatạ su manga tentang umatʼE, ”MAWU e mẹ̌kẹ̌koạ munarang kawasa!

¹⁶Kawasang MAWU e mạngonggọu kal᷊auntu si kitẹ e! MAWU e mẹ̌kẹ̌koạ munarang kawasa.”

¹⁷Iạ e tawe mate, kaiso tatapẹ̌ biahẹ̌ mẹ̌deạu mamombengu munarang MAWU.

¹⁸MAWU e seng němahang matědụ si siạ e, kaiso i Sie e tawe něnarakangu iạ e su papate.

¹⁹Topeko waugu iạ e tukadu pasěllangengu Wal᷊em MAWU e, tadeạu iạ e sumuẹ̌ kụ makitarimakasẹ si Sie.

²⁰Kai ini e tukadu pasěllangengu MAWU, kětạeng taumata matul᷊idẹ̌ e makal᷊iu wọu ene.

²¹Iạ e mẹ̌dalo si Kau, watụ u i Kau e rụdaringihẹ̌ kakal᷊iomanengku; i Kau e seng nangonggọu kal᷊auntu si siạ.

²² Batu nạung sen nirěmmẹu mẹ̌kakoạ bal᷊e e, seng nakoạ batu pinẹ̌bukuang.

²³Kai ini e kakanoạu MAWU, kụ apạ e makạdal᷊inaụ si kitẹ e.

²⁴Kai seng ini e ěllo tinantung MAWU; kụ mahịe i kitẹ měmantugẹ̌ dingangu ral᷊uasẹ̌.

²⁵ I kami e makịkasiang MAWU, ambange wue i kami, o MAWU ghěllirembeng kal᷊auntu e i kami.

²⁶ Karimạko al᷊amateng i sie kụ diměnta su arengu MAWU, i kami měngal᷊amatẹ̌ si kamene wọu ral᷊ungu Wal᷊em MAWU.

²⁷MAWU e kai Ruata, i Sie kai mal᷊ondo si kitẹ e. Dal᷊engko pẹ̌gapaěng dingangu manga hakonda su l᷊ima, kụ pělikụko pananěmbaěngu MAWU.

²⁸I Kau e kai Ruataku, iạ e makitarimakasẹ si Kau. Duataku, iạ e mẹ̌mantugẹ̌ si Kau.

²⁹Pakitarimakasẹ su MAWU, u i Sie kai mapia, kakěndagʼE kakalẹ̌ tạ kahěpusange.