Read Sangir MAZMURẸ̌ 119 Bible Online

MAZMURẸ̌ 119 - Sangir bible

MAZMURẸ̌ 119

¹Kariangkamang taumata kụ pẹ̌bawiahe tawẹ turạ e ringangu masatia su kal᷊awọu titaʼm MAWU.

²Kariangkamang taumata apan tụtuhụ tita-Ne, ore ringangu kasěllahu naung mẹ̌bẹ̌bangkuadẹ̌ mẹ̌kiral᷊a MAWU.

³Kariangkamang taumata apang mẹ̌bẹ̌biahẹ̌ tụtuhụ kapulum MAWU, ringangu tawe mẹ̌kakoạ dal᷊akisẹ̌.

⁴I Kau e něngonggọu tita-Nu o MAWU, tadeạu i kami e mẹ̌koạ ene ringangu satia.

⁵Karimạko iạ e ringangu naung matoghasẹ̌ tumuhụ kal᷊awọu tiaha-Nu.

⁶Kereu iạ mẹ̌sěmpị kal᷊awọu laoro-Nu, tangu iạ e tawe ipakamea.

⁷Kereu iạ e mangěndung putusangʼU adilẹ̌ e, iạ e mẹ̌pudi si Kau ringangu naung matul᷊idẹ̌.

⁸Iạ e mapulu mẹ̌sěmpị patikụ tita-Nu, kumbahang-bahang maněntangu iạ.

⁹Mangangudạ e makatanudẹ̌ pẹ̌bawiahe kụ tawẹ turạ e, kereu i sie mẹ̌bẹ̌biahẹ̌ tụtuhụ tita-Nu.

¹⁰Dingangu kạguwạu naung, iạ e mẹ̌tawakal᷊i mẹ̌kiral᷊a si Kau, abe wala iạ e mělenga wọu tita-Nu.

¹¹Těntiro-Nu e takụ desokang su ral᷊ungu naungku, tadeạu iạ e kumbahangbe mẹ̌dosa su těngo-Nu.

¹²Iạ e mẹ̌pudi si Kau, MAWU, těntiroiko iạ e patikụ tiaha-Nu.

¹³Iạ měhabarẹ̌ pakaihạ kal᷊awọu tita nionggọʼU.

¹⁴Iạ e mal᷊uasẹ̌ tumol᷊e kal᷊awọu laoro-Nu, mạnaghuang kal᷊awọu haghing arětạ.

¹⁵Iạ e mapulu mangěndung kal᷊awọu putusangʼU, ringangu měnẹ̌naungbe kal᷊awọu tatumbal᷊ungʼU.

¹⁶AtorangʼU e nakal᷊iagẹ̌ si siạ e; tentironʼU e tawe takụ kawul᷊enang.

¹⁷Karimạko i Kau e mal᷊ondo wue su ěllangʼU ini e, tadeạu iạ e wiahẹ̌ dingangu rụdaringihẹ̌be těntiro-Nu.

¹⁸Kawekesẹ̌ko mataku e tadeạu iạ makasilo těntiro kụ makạdal᷊inaụ su ral᷊ungu tita-Nu.

¹⁹Kětạembeng pạněntal᷊ang iạ e mạtanạ su dunia, kumbahangbe měmuning tita-Nu e wọu anuku.

²⁰Naungku e masakị u pẹ̌kakarimang, iạ e lụěnningu masingkạ u tita-Nu apan tempo.

²¹I Kau e měnẹ̌nal᷊ěntihọ taumata apang mal᷊aobotẹ̌, dingangu měngẹ̌ngane taumata apang mělẹ̌lenga wọu laoro-Nu.

²²Liwirẹ̌ko iạ bọu lahinakang dingangu sasamedi sire, u iạ e kai mědẹ̌ndal᷊engu tiaha-Nu.

²³Manilaing měngangawasa e měgẹ̌gumpul᷊ẹ̌ měndokạ si siạ e, ěllangʼU ini e sarung mẹ̌sipiru atorangʼU.

²⁴Kal᷊awọu tiaha-Nu e makoạ měnanasaku kụ makạl᷊uasẹ̌ naungku e.

²⁵Iạ e rụdal᷊oka su ral᷊ungu awul᷊ẹ̌; ul᷊ịko kạpia pẹ̌bawiahẹ̌ku e tuhụ kědo-Nu.

²⁶Iạ e měngakung kakanoạku, mase i Kau e sumimbahẹ̌ si siạ; těntiroiko iạ e patikụ atorangʼU.

²⁷Tul᷊ungko iạ e mědeạu makahěngang kal᷊awọu tita-Nu, kal᷊awọu těntiro-Nu[66] makạdal᷊inaụ e takụ sẹ̌sipirang.

²⁸Himukudẹ̌ku e nal᷊ahěmpung kinaěnsakengu kasasusa, apakatoghasẹ̌ko iạ e kere su kědo-Nu.

²⁹Apakagheang bue iạ e wọu ral᷊eng makạpal᷊idẹ̌, ual᷊ingu kapia-Nu e těntiroiko iạ e tita-Nu.

³⁰Iạ e sen němile mědeạu tawe tumuhụ hengetangʼU e kụ sěntiniạ takụ tẹ̌tahěndungang.

³¹Iạ sen timuhụ kal᷊awọu tiaha-Nu, o MAWU, abe wala iạ e apakamea.

³²Dingangu mal᷊uasẹ̌ iạ e sarung dumaringihẹ̌ hengetangʼU, batụu i Kau e nakariadi si siạ limembon nakaěnna.

³³MAWU, těntiroiko iạ mangal᷊ene kal᷊awọu atorangʼU, tadeạu iạ tumuhụ dingangu mẹ̌koạ ene tuhụ kasěllahu ral᷊ungu naung.

³⁴Onggol᷊engkon sipirang iạ e mědeạu makaěnna tita-Nu, tadeạu iạ tumuhụ dingangu mẹ̌koạ ene tuhụ kasěllahu ral᷊ungu naung.

³⁵Karimạko iạ měngumpaedẹ̌ matoghasẹ̌ su hengetangʼU, batụu kai ene i kẹ̌karalọku.

³⁶Onggol᷊eko iạ e kal᷊oko waugu tumuhụ tiaha-Nu, limembo wọu ěnningu makalạ.

³⁷Těntanureko iạ tadeạu kumbahang měnahusu apan sia-sia, onggol᷊eko iạ mẹ̌biahẹ̌ tuhụ kapulu-Nu.

³⁸Apakatatapẹ̌ko kẹ̌do-Nu e su ěllangʼU ini, kụ nionggọʼU su taumata apang matuhụ si Kau.

³⁹Apakarauko lahinakang i kẹ̌katakụku e, ual᷊ingu mamben těngadẹ̌ mapia e tita-Nu.

⁴⁰Onggol᷊eko iạ e pẹ̌bawiahẹ̌ buhu, u i Kau e kai adilẹ̌, iạ e piạ kapuluku mẹ̌daringihẹ̌ kal᷊awọu putusangʼU.

⁴¹O MAWU, lahẹko kai kereapa kakakoạ u i Kau e kuměndagu iạ, ambangeko iạ tuhụ kědo-Nu e.

⁴²Tangú nakasimbahe iạ e su taumata kụ mělẹ̌hinakang si siạ e, watụ u iạ e mạngumbala hengetangʼU.

⁴³Tul᷊ungko iạ e mědeạu hanesẹ̌ maul᷊ị su katul᷊ide, u iạ e mạngumbalawe su putusangʼU.

⁴⁴Iạ e mapulu mẹ̌tumpaedẹ̌ su manga tita-Nu, waugu sarang marěngụ-děngụ.

⁴⁵Tangú iạ e sarungbe mẹ̌biahẹ̌ tạ sungkal᷊ene, ual᷊ingu mẹ̌bẹ̌bangkuadẹ̌ bue tumuhụ těntironʼU.

⁴⁶Tiaha-Nu sarung takụ ipaul᷊ị su manga ratu, dingangu iạ e tawe i pakamea.

⁴⁷Lẹ̌lahimpuluangku e ute kai měndal᷊engu hengetangʼU, u iạ e kụkěndagi sie.

⁴⁸Iạ e měngadatẹ̌ dingangu kụkěndagu hengetangʼU, apam putusangʼU e sarun takụ sipirang.

⁴⁹Tahěndungeko kědo-Nu e su manga ěllangʼU ini, kědo kụ makaonggọu pělaharapẹ̌ si siạ.

⁵⁰Seng ini e makạhiborẹ̌ si siạ su ral᷊ungu sigěsạku e, u kědo-Nu e makạonggọu pẹ̌bawiahẹ̌ku.

⁵¹Taumata maobotẹ̌ e apạ e mělẹ̌hinakang si siạ, arawe iạ e tawe nělenga wọu tita-Nu.

⁵²Iạ e makạtahěndung tita-Nu e, nạung deng kal᷊imona-mona, tangú mạhiborẹ̌ naungku e MAWU.

⁵³Iạ e limangehẹ̌ marasai su taumata ral᷊akisẹ̌ e, u i sire kai naněntangu tita-Nu.

⁵⁴Karěngụ u pẹ̌bawiahẹ̌ku e manimbụ su dunia, putusangʼU e takụ koateng manga kakantarị daralo.

⁵⁵Su tempong hěbi e, makạtahěndung si Kau MAWU, tita-Nu e tatapẹ̌ takụ lẹ̌umpaedang.

⁵⁶Iạ e makạhombang karal᷊unsemahẹ̌ su ral᷊ungu tumuhụ manga hengetangʼU.

⁵⁷I Kau e samatang takụ ilẹ̌ěnning MAWU, iạ e mẹ̌kědo sarung měndal᷊engu těntiro-Nu.

⁵⁸Dingangu kasěllahu ral᷊ungu naung iạ e mělẹ̌harapẹ̌ kakěndagʼU, tal᷊ěntụkong iạ e tuhụ diandi-Nu.

⁵⁹Iạ e seng mẹ̌sẹ̌sipiru lulunu, ringangu mẹ̌diandi sarung tumuhụ atorangʼU.

⁶⁰Iạ e mẹ̌bẹ̌bal᷊ikěkasẹ̌ dingangu tawe mal᷊ahẹ̌do waugu maparal᷊engu laoro-Nu.

⁶¹Taumata ral᷊akisẹ̌ e mẹ̌taingu somạ si siạ, kaiso iạ e tawe miwul᷊en tita-Nu.

⁶²Kẹ̌kal᷊oarane iạ e mẹ̌bẹ̌bangung kụ mẹ̌pudi si Kau, watụ u kal᷊awọu putusangʼU e adilẹ̌.

⁶³Iạ e mẹ̌dẹ̌dal᷊ahapị u kěbị taumata apang mạngimang, kěbị taumata kụ mẹ̌děndal᷊engu těntiro-Nu.

⁶⁴Banua e napenẹ u kakěndagʼU, o Mawu, těntiroiko iạ e kal᷊awọu tiaha-Nu.

⁶⁵I Kau e seng napakasěhụ u riandi-Nu MAWU, ringangu nẹ̌koạ mapia su manga ěllangʼU.

⁶⁶Gěllirengkong kapelesa ringangu kasingkạ, batụu iạ mangimang su kal᷊awọu tita-Nu.

⁶⁷Den tawe nilẹ̌hukung, iạ e nělenga, kụ ini e iạ mẹ̌tẹ̌tumpaedẹ̌ su hengetangʼU.

⁶⁸U i Kau e mapia ringangu mẹ̌kẹ̌koạ mapia, těntiroiko iạ e kal᷊awọu tiaha-Nu.

⁶⁹Taumata maobotẹ̌ e měnẹ̌nelorẹ̌ si siạ, kaiso iạ e ringangu kạguwạ u naung tụtuhụ putusangʼU.

⁷⁰I sire e tawe makal᷊aěnna, kai arawe si siạ e tita-Nu e makạl᷊uasẹ̌ naung.

⁷¹Mambeng kerene, mapiawe i Kau e měhukungu iạ, tadeạu iạ e makakiral᷊a kal᷊awọu tiaha-Nu.

⁷²Si siạ e tita-Nu e limembong maarěga wọu kal᷊awọu wul᷊aeng dingangu sal᷊aka e su dunia.

⁷³I Kau e něndiadi ringangu něluhudẹ̌ si siạ, těntiroiko iạ e kal᷊awọu manga tiaha-Nu.

⁷⁴Taumata mạngimang e sarung mal᷊uasẹ̌ kereu makasilo si siạ, batụu iạ e mạngumbala su kědo-Nu.

⁷⁵Iạ e masingkạ u putusangʼU e adilẹ̌ MAWU, i Kau e seng něhukung u iạ ual᷊ingu satianʼU.

⁷⁶Mal᷊owọko kakěndagʼU e makoạ lahiborẹ̌ku, tuhụewe riandi-Nu su ěllangʼU.

⁷⁷Tal᷊ěntụkong iạ, kụ iạ e tatapẹ̌be wiahẹ̌, ual᷊ingu tita-Nu e makạl᷊ahimpulu naungku.

⁷⁸Balạete taumata maobotẹ̌ e pakamea ual᷊ingu seng nanelorẹ̌ si siạ, kaiso iạ e sarung mẹ̌sipiru kal᷊awọu hengetangʼU.

⁷⁹Karimạko taumata mạngimang e ruměnta su anuku, patikụ apang masingkạu manga tiaha-Nu.

⁸⁰Karimạko naungku e tawe mělenga wọu manga laoro-Nu, tadeạu iạ tawe mamea.

⁸¹Naungku e mẹ̌kẹ̌karalọu kasasal᷊amatẹ̌ e wọu anu-Nu; iạ e mělẹ̌harapẹ̌ diandi-Nu.

⁸²Mataku e narul᷊ěpeng pělahědo si Kau maněhụ kědo-Nu, iạ e mẹ̌bera, ”Angerẹ i Kau e měhiborẹ̌ si siạ?”

⁸³Pisiku e nẹ̌kahungị kere wakuhu anggorẹ̌ kụ sen těbe, arawe apan laoro-Nu e tawe takụ kawul᷊enang.

⁸⁴Sarang kạnge ěllangu e hinong mẹ̌sabarẹ̌ e tangu? Ange i Kau e sarung měhukungu taumata apang měmpạnahusu si siạ?

⁸⁵Taumata kụ tawe tumatuhụ tita-Nu e, seng němangka lohangu pahěba pěnamekang si siạ.

⁸⁶Patikụ toratʼU e botonge kapangumbalaěng, tul᷊ungko iạ, u iạ e sẹ̌sahusuang tawẹ apawe sěbapẹ̌ e.

⁸⁷Kate kạdodọ e i sire makapate si siạ, kaiso iạ e tawe mapakawalang tita-Nu.

⁸⁸Ambangeko iạ e watụ u i Kau e tatapẹ̌be kụkěndagẹ̌, tadeạu iạ e makatuhụbe tita-Nu.

⁸⁹MAWU, hengetangʼU e mauwuhẹ̌ sarang marěngụ-děngụ, kakalẹ̌ tawẹ kahẹ̌pusange su sorga.

⁹⁰SatianʼU e nauwuhẹ̌ kanandun tempo, i Kau e napakateng banua hakịu tatapẹ̌ ene.

⁹¹Patikụ apang ene orasẹ̌ ini e, ene ual᷊ingu tita-Nu i sire kěbị e kai manga ěllangʼU e.

⁹²Andene toratʼU e wal᷊inewe simbul᷊u ral᷊uasẹ̌ku e, nal᷊ahẹu iạ e seng nate su ral᷊ungu sunsaraku.

⁹³Sarang karěngụ e iạ tawe mapakawalang laoro-Nu, batụu ringangu ene i Kau e napakawiahu iạ.

⁹⁴Ambangeko iạ, batụu iạ ini e kai tataghuanengʼU, iạ e seng nẹ̌tawakal᷊i timuhụ putusangʼU.

⁹⁵Taumata ral᷊akisẹ̌ e měngampal᷊ẹ̌ hẹ̌do měmate si siạ, arawe iạ e mapulu měnaung toratʼU e.

⁹⁶Kakěllaěngku e apang nasukụ e mal᷊aing piạ kětakenge, kětạembeng laoro-Nu e masukụ.

⁹⁷Apạ e takụ i kẹ̌karalọ toratʼU e; iạ mẹ̌sẹ̌sipiru ene kanandung ěllo.

⁹⁸Iạ sěntiniạ makạtahěndung apang laoro-Nu, makạkadiadi si siạ něngalembom pelesa wọu manga sědụku e.

⁹⁹Katatahuěnnaku e něngalembo wọu katatahuěnnang manga měnaněntiroku e, ual᷊ingu iạ e mẹ̌sẹ̌sipiru manga tita-Nu.

¹⁰⁰Iạ e limembong makạěnna wọu apang maghaghurang, batụu iạ e měngẹ̌ngumpaedẹ̌ kal᷊awọu putusangʼU.

¹⁰¹Takụ i pakal᷊iu kal᷊awọu lulu ral᷊akisẹ̌ e, tadeạu iạ matuhụ su kal᷊awọu těntiro-Nu e.

¹⁰²Iạ e tawe mapakawalan toratʼU, batụu seng i Kau e mạněntiro si siạ.

¹⁰³Apạ e karěngange wawera-Nu, temange něngalembong karěngange wọu madu.

¹⁰⁴Manga toratʼU e mạngonggọu katatahuěnna, hakịu iạ e mẹ̌bẹ̌binsị u lulu tawẹ katul᷊ide.

¹⁰⁵HengetangʼU e kai utụ baugu ral᷊empangku, tualagẹ̌ i panualagẹ̌ dal᷊engku.

¹⁰⁶Apan takụ nikědo piạ salune sarun takụ i pakasěhụ, mẹ̌deạu mẹ̌tumpaedẹ̌ su putusangʼU kụ adilẹ̌ e.

¹⁰⁷Iạ e enẹ e masunsara MAWU, těntanureko pẹ̌bawiahẹ̌ku e tuhụewe kẹ̌do-Nu.

¹⁰⁸Tarimạko kakal᷊iomanengku tatarimakasẹku e MAWU, mase těntiroiko iạ e manga toratʼU.

¹⁰⁹Iạ e sěntiniạ mạnarakangu niawaku, kaiso iạ e[67] tawe miwul᷊en toratʼU.

¹¹⁰Taumata ral᷊akisẹ̌ e mẹ̌tẹ̌taingu sedẹ baugu iạ, kaiso iạ e tawe mělenga wọu putusangʼU.

¹¹¹Tita-Nu e kai pusakạku sarang karěngụ e, kụ napakariadin naungku e mal᷊uasẹ̌.

¹¹²Iạ e mẹ̌kẹ̌karaki rumaringihẹ̌ tiaha-Nu e sarang pěngěnsueěngu pẹ̌bawiahẹ̌ku.

¹¹³Iạ e rụdul᷊ong manga toratʼU, iạ e mạběnsingu taumata kụ tawe matinalung satiane si Kau.

¹¹⁴I Kau e tumatatawang dingangu mananěntanudẹ̌ku e, iạ e mělẹ̌harapẹ̌ kědo-Nu.

¹¹⁵Ei taumata ral᷊akisẹ̌ e, pakarauko wọu anuku! Iạ e mapulu tumuhụ titan Duataku.

¹¹⁶Apakatoghasẹ̌ko iạ e tuhụ diandi-Nu tadeạu iạ e wiahẹ̌, abe wala iạ e apakakakondọ su ral᷊ungu pělaharapẹ̌ku.

¹¹⁷Tuileko iạ tadeạu masal᷊amatẹ̌, dingangu sěntiniạ měnẹ̌naungbe tita-Nu.

¹¹⁸I Kau e tụtal᷊ikudu taumata kụ mělẹ̌lenga wọu tiaha-Nu, watụ u samatang sia-sia tondoal᷊ị i sire e.

¹¹⁹Patikụ taumata ral᷊akisẹ̌ e i kẹ̌koạʼU kere onasẹ̌, hakịu ene iạ e rụdul᷊ong manga tiaha-Nu.

¹²⁰Iạ e mạbintogẹ̌ kahian takụ si Kau, naungku e ghụgěguhu putusangʼU e.

¹²¹Iạ e seng nẹ̌koạ apang kụ adilẹ̌ dingangu su hinone, kumbahang měnarakang u iạ su l᷊iman sekẹ.

¹²²Pẹ̌kědọ e u i Kau e sarung mẹ̌tul᷊ungu iạ, abe wala iạ tahidangu taumata mal᷊aobotẹ̌ e.

¹²³Mataku e měngkai mẹ̌kẹ̌karalọu tul᷊umangʼU makasal᷊amatẹ̌ e, takụ lẹ̌ampal᷊eng karal᷊iwirẹ̌ nạung seng nikědo-Nu.

¹²⁴Pẹ̌koạ e si siạ tuhụ kakěndagʼU, dingangu těntiroiko iạ e tingirangʼU.

¹²⁵Iạ e kai ěllangʼU těntiroiko iạ e sarang makaěnna, tadeạu makahěngang tita-Nu.

¹²⁶MAWU, seng nịdating tempone i Kau e kumanoạ, batụu taumata e kai lumawang toratʼU.

¹²⁷Kal᷊awọu tita-Nu e ipẹ̌kẹ̌karalọku limembo wọu wul᷊aeng, limembo wọu wul᷊aeng sahị.

¹²⁸Ual᷊ingu ene iạ e mẹ̌biahẹ̌ tuhụewe kal᷊awọu laahạʼU e; lulu ral᷊akisẹ̌ kẹ̌kawěnsingku.

¹²⁹Kal᷊awọu tiaha-Nu e apạ e makạdal᷊inaụ, kụ takụ dẹ̌daringihangu kạguwạu ral᷊ungu naung.

¹³⁰Kereu tualageng, těntiro-Nu e mẹ̌gẹ̌gěllịu tualagẹ̌, makạonggọu sipirang suapan taumata wiasa.

¹³¹Singongoku e sụsaenga, ual᷊ingu mẹ̌kẹ̌karalọ u tita-Nu.

¹³²Pẹ̌bihuko si siạ ore tal᷊ěntukeko iạ e, kerẹewe i Kau e kuměndagu taumata kụkěndagi Kau e.

¹³³Apakatatapẹ̌ko ral᷊empangku e tuhụewe kědo-Nu, abe wala iạ pẹ̌kawasaěngu karal᷊akisẹ̌ e.

¹³⁴Pakal᷊iuko iạ e wọu taumata apang měmpělẹ̌linda si siạ e, tadeạu iạ e makatuhụbe tiaha-Nu.

¹³⁵Al᷊amateko iạ ual᷊ingu rarěnta-Nu, ringangu těntiroiko iạ e tiaha-Nu.

¹³⁶Akẹ u mataku e nelehẹ̌ kere sal᷊ụ, ual᷊ingu toratʼU e tawe rararingihang.

¹³⁷I Kau e adilẹ̌ MAWU, kal᷊awọu toratʼU e matul᷊idẹ̌.

¹³⁸Kal᷊awọu tita kụ nionggọu e adilẹ̌ kụ botonge kapangumbalaěng.

¹³⁹Dal᷊angehẹ̌-Ku e nẹ̌tětuhẹ̌ su ral᷊ungu watangengku, ual᷊ingu sědụku e nẹ̌timbul᷊eng těntiro-Nu.

¹⁴⁰Riandi-Nu e masěgadẹ̌ kụ kapěngumbalaěng, iạ e mambeng mẹ̌kẹ̌karalọ u ene.

¹⁴¹Iạ ini e kadodọ dingangu mahina, kaiso iạ e tawe nẹ̌timbul᷊eng těntiro-Nu.

¹⁴²KạadilʼU e nẹ̌daragẹ̌ sarang marěngụ-děngụ, dingangu toratʼU e mamben sěntiniạ matul᷊idẹ̌.

¹⁴³Iạ e kinaěnsakengu kasasěsẹ dingangu kasasusa, arawe tiaha-Nu e makạl᷊uasẹ̌ naungku.

¹⁴⁴Tiaha-Nu e mamben sěntiniạ adilẹ̌; gělirengkong katatahuěnna iạ e tadeạu iạ mẹ̌biahẹ̌.

¹⁴⁵Dingangu kạguwạu naung iạ kumahiorọ si Kau; simbaheko iạ MAWU, iạ mapulu tumuhụ tita-Nu.

¹⁴⁶Iạ mẹ̌kui si Kau; ambangeko iạ, iạ mapulu mẹ̌tumpaedẹ̌ su tiaha-Nu.

¹⁴⁷Deng bědang kaěllonge iạ mẹ̌bangung dingangu mẹ̌kui makitul᷊ung, iạ e mělẹ̌harapẹ̌ su riandi-Nu.

¹⁴⁸Kanandung hěbi iạ e mělẹ̌lukadẹ̌, baugu makapěnipirẹ̌ těntiro-Nu.

¹⁴⁹Daringihẹ̌ko tingihẹ̌ku tuhụ kakěndagʼU MAWU, lukadeko pẹ̌bawiahẹ̌ku e tuhụ kạadilʼU.

¹⁵⁰Taumata měnẹ̌nahusu si siạ e seng masandigẹ̌, i sire piạ timonane ral᷊akisẹ̌ dingangu tawe měndarekengu toratʼU.

¹⁵¹Arawe i Kau e marěduhẹ̌ MAWU, kal᷊awọu tita-Nu e matul᷊idẹ̌.

¹⁵²Deng nạung-nạung iạ e nasingkạ bọu kal᷊awọu těntiro-Nu, u i Kau e napakawěntang ene waugu sarang marěngụ-děngụ.

¹⁵³Kakěllạ e sigěsạku ringangu ambangeko iạ, batụu iạ e tawe mẹ̌timbul᷊en toratʼU.

¹⁵⁴Tatawange wue pěrkaraku ringangu apakal᷊iu wue iạ; ambange wue iạ tuhụ diandi-Nu.

¹⁵⁵Taumata ral᷊akisẹ̌ e tawe sarung ipakasal᷊amatẹ̌, ual᷊ingu tawe tumatuhụ atorʼU.

¹⁵⁶Apạ e masaria kakěndagʼU e MAWU, ambange wue iạ tuhụ kạadilʼU.

¹⁵⁷Lawọ taumata měnědụ dingangu měnẹ̌nahusu si siạ, kaiso iạ e tawe mẹ̌timbul᷊eng tiahanʼU.

¹⁵⁸Iạ e mạběnsing makasilo taumata apang mẹ̌tatatul᷊a e, batụu i sire e tawe tumatatuhụ těntiro-Nu.

¹⁵⁹Kakěllạ e, kereapa iạ mẹ̌karalọ u tita-Nu MAWU, ambangeko iạ ual᷊ingu kakěndagʼU.

¹⁶⁰Patikụ hengetangʼU e matul᷊idẹ̌, kal᷊awọu toratʼU e adilẹ̌, těbe sarang marěngụ-děngụ.

¹⁶¹Kal᷊awọu apam piạ kawasane e měnẹ̌nahusu si siạ tawẹ pungene, kai tumbạen toratʼU e kẹ̌katakụku.

¹⁶²Riandi-Nu e makạl᷊uasẹ̌ si siạ, kere taumata kụ nakaěbạ arětạ.

¹⁶³Kal᷊awọu konti e kẹ̌kawěnsingku, arawe tita-Nu e i kẹ̌karalọku.

¹⁶⁴Iạ e sěntiniạ tatapẹ̌ makịtarimakasẹ si Kau, ual᷊ingu tita-Nu e adilẹ̌.

¹⁶⁵Taumata kụ mẹ̌kẹ̌karalọ u toratʼU e mal᷊enehẹ̌ dingangu marěmasẹ̌, tawẹu makasahaghe si sire.

¹⁶⁶Iạ e mạngampal᷊ẹ̌ kasasal᷊amatẹ̌ bọu anu-Nu e MAWU, kal᷊awọu tita-Nu e kẹ̌koatengku.

¹⁶⁷Iạ e tụtuhụ kal᷊awọu tiaha-Nu ringangu mẹ̌kẹ̌karalọu ene ringangu kạguwạu naung.

¹⁶⁸Iạ e tụtuhụ tita ringangu laahạʼU, batụu i Kau e makạsilo kal᷊awọu kakanoạku.

¹⁶⁹Karimạko kakahiorọku e mahumpạu anu-Nu MAWU, gěllirengkong katatahuěnna iạ e tuhụewe riandi-Nu.

¹⁷⁰Kakindoạku e apakahumpạko sol᷊ong anu-Nu, ambangeko iạ e tuhụ diandi-Nu.

¹⁷¹Iạ mapulu mẹ̌dalo si Kau sidutu, u i Kau e mạněntirong atorʼU e si siạ.

¹⁷²Iạ e lụěnningu mẹ̌kantarị mạanun diandi-Nu, u kal᷊awọu tita-Nu e adilẹ̌.

¹⁷³Karimạko i Kau e sidutu sadia mẹ̌tul᷊ungu iạ, batụu iạ e němile waugu tumuhụ tiaha-Nu e.

¹⁷⁴Naungku e mẹ̌kẹ̌karalọ u kasasal᷊amatẹ̌ e wọu anu-Nu, tita-Nu e makạl᷊ahimpulu naungku.

¹⁷⁵Apẹ̌biahẹ̌ko iạ e, tadeạu iạ makapẹ̌dalo si Kau, mal᷊owọko kal᷊awọu tiaha-Nu e mẹ̌tul᷊ungu iạ.

¹⁷⁶Iạ e nipal᷊idẹ̌ kere domba kụ nailang tangu rěntako kụ deake ěllangʼU ini e, u iạ e tawe mẹ̌timbul᷊eng kal᷊awọu manga tita-Nu.