Read Sangir MAZMURẸ̌ 129 Bible Online

MAZMURẸ̌ 129 - Sangir bible

MAZMURẸ̌ 129

¹Kakantarị baugu rumaral᷊eng. Israel pẹ̌běkeko, kereapa i kau e tẹ̌tumbiagengu sekẹ den dokeng i kau e mangudạ.

²”Iạ e tẹ̌tumbiagengu sekẹ den dokeng iạ mangudạ, kaiso i sire tawe nakawatạ si siạ;

³i sire napakal᷊esẹu tal᷊ětugẹ̌ku e kere měmamungkalang ěntana e mẹ̌kẹ̌koạ manga sal᷊uhe mananandụ su pělahěnsinuangeng.

⁴Arawe MAWU e kai adilẹ̌ kụ seng napakal᷊iwiru iạ e wọu pẹ̌tatahamawuang.”

⁵Balạekere apan taumata kụ mẹ̌bẹ̌binsịu Sion kụ i kawatạ dingangu sarung sahẹ̌sekang pakasohọ.

⁶I sire e sarung kere rěmpugẹ̌ su wowong atụ kụ mahěgu ren tawe timẹ̌tuwo.

⁷Tawẹ u měngangambesẹ̌, arau měngangikị e su ral᷊ungu wawěkise.

⁸Taumata apang su mahe e tawe mẹ̌bera u, ”Karimạko i kau e al᷊amatengu MAWU, i kami e měngal᷊amatẹ̌ si kau su ral᷊ungu arengu MAWU.”