Read Sangir MAZMURẸ̌ 132 Bible Online

MAZMURẸ̌ 132 - Sangir bible

MAZMURẸ̌ 132

¹Kakantarịu rumaral᷊eng. O MAWU, tahěndungeko i Daud, dingangu kal᷊awọu sigěsạ e.

²Kumbahang miwul᷊e mẹ̌suba su MAWU Ruatanu, su pěngangakune si Kau su Limembong Kakuatenge, Duatan Yakub.

³Angkuěnge, ”Iạ e tawe sumuẹ̌ su wal᷊eku arau mẹ̌tikị su katatikilangku,

⁵kụ den tawe něndiahiʼm bal᷊e waugu Ruatan Yakub, tampạ katatanakeng baugu MAWU Limembong Kawasa.”

⁶ Su Betlehem i kitẹ nakaringihẹ̌ mạanuʼm Petiʼm Pẹ̌dariandi, kụ bọu ene kinareạ su waelu Yaar.

⁷Bọete i kitẹ tamai mahunsuẹ̌ su katatanakengu MAWU, kụ mẹ̌subako si Sie su těngong kal᷊aianengʼE.

⁸Děntạ e kụ katanạ e su Wal᷊e-Nu, o MAWU Ruata, dingangkewelai Petiʼm Pẹ̌dariandi, peting kawasa-Nu.

⁹Karimạko umatʼU e mahul᷊uasẹ̌ dingangu mahul᷊iagẹ̌, dingangu manga imangʼU e sěntiniạ mang mẹ̌bẹ̌biahẹ̌ tụtuhụ kapulu-Nu.

¹⁰Baugʼi Daud, ěllangʼU, kumbahangbe měnalaku ratu nipile-Nu e.

¹¹ MAWU e seng nẹ̌salu si Daud, i Sie tawe sarung mẹ̌sunial᷊u riandi-Ne. AngkuěngʼE, ”Anạ u sěngkatau ene sarun Takụ i pakaratu mẹ̌deạu pẹ̌parenta pěngaweng si kau.

¹²Kereu manga anạu e satia su riandi-Ku e ringangu tụtuhụbe kal᷊awọu tita-Ku e tangu sarang karěngụ e pal᷊ahiten sire e měngaweng si kau e makoạ datu.”

¹³Batụu MAWU e sen němile Sion; i Sie lụěnningu ene waugu tampạu katatanakengʼE.

¹⁴AngkuěngʼE, ”Seng sini e katatanakeng-Ku sarang karěngụ e, Iạ e lụěnningu mẹ̌parenta su tampạ ini.

¹⁵Kal᷊awọu pandungange sarun Takụ gěllirang i pẹ̌dal᷊embo, taumatane kụ kasiang e Takụ iapakaěng sarang pakal᷊aedẹ̌.

¹⁶Manga imang e měmpạnodẹ u kasasal᷊amatẹ̌ e wọu anu-Ku; umate sarung měmpẹ̌kantarị dingangu měmpahul᷊uasẹ̌ ore lai měmpahul᷊iagẹ̌ e.

¹⁷ Sini e sěngkatau hěnton Daud Takụ i pakakoạ datu, kararatuange sarun Takụ pakarehọ.

¹⁸Kararatuange sěntiniạ sarung tạkonsange apa arawe manga sekẹ e sarung i pakasamedẹ̌.”