Read Sangir MAZMURẸ̌ 139 Bible Online

MAZMURẸ̌ 139 - Sangir bible

MAZMURẸ̌ 139

¹Baugu měngangahạ kantarị. Mazmuri Daud. O MAWU, i Kau e nakasěsidẹ̌ si siạ e ringangu masingkạ u iạ.

²I Kau e masingkạ u kal᷊awọu kakanoạku; bọu raune i Kau e nakahěngang tiněnnaku.

³I Kau e nakasilo si siạ, baẹ iạ kapẹ̌munarane arau kạpẹ̌ngirul᷊ene, i Kau e masingkạu kal᷊awọu apan takụ nikoạ.

⁴Mundangu reng iạ tawe něbẹ̌bera e, i Kau e masingkạ u apang hinon takụ i wera.

⁵I Kau e něliwung si siạ e, wọu apan těngo, ringangu nịsasirungʼU iạ e ual᷊ingu kawasa-Nu.

⁶Tumanị u maral᷊ung si siạ e, kasingkạʼU ene, hakịu tawe karatingangu tiněnnaku.

⁷Kai makoạ sol᷊ong apa tangú iạ e, mědeạ u mal᷊iwirẹ̌ bọu kawasa-Nu? Kai tumal᷊ang sol᷊ong apa mẹ̌těngkarau wọu anu-Nu tangu?

⁸Kereu iạ e mawị sol᷊ong langị, i Kau e ene paị sene, kereu iạ e rụdal᷊oka su winangunang e i Kau e mal᷊aing ene sene.

⁹Kereu iạ tuměllạ bọu sěmběkan daki arau mẹ̌tanạ su pondol᷊u sěmběkam bahẹ kụ karauange,

¹⁰paị sene i Kau e mal᷊aing mẹ̌tul᷊ungu iạ; paị sene lai l᷊ima-Nu e mẹ̌nata si siạ.

¹¹Kereu iạ mẹ̌dorong tadeạu kararěndung e tawe mělakubẹ̌ si siạ, dingangu tualagẹ̌ e mạngělikụ si siạ e nakoạ hěbi,

¹²tangu kararěndung e mal᷊aing tawe marěndung baugi Kau, hěbi ene e matualagẹ̌ kere ěllo, dingangu kararěndung e makoạ matualagẹ̌.

¹³I Kau e napakariading apang bahageangu wadangku e, ringangu něluhudẹ̌ si siạ e su ral᷊ungu gandongang i ninangku e.

¹⁴Iạ e mẹ̌dalo si Kau batụu iạ e mambeng makạnaniang! Kal᷊awọu munara-Nu e makạdal᷊inaụ dingangu makạl᷊aherang, kụ iạ e mamben těngadẹ̌ masingkạu ene.

¹⁵Supiạ nạung manga ruhiku e pinakariadi, tangu nipẹ̌kakante pinakaudupẹ̌ su ral᷊ungu gandongang i ninangku, arawe iạ e simombọ paịsene sukapapěnisang, iạ e wal᷊inewe kạbawuni si Kau.

¹⁶I Kau e nakasilo si siạ piạ naung bẹ̌dang su ral᷊ungu gandongang; kụ kěbị e mang kạbawohẹ su ral᷊ungu bukẹ̌ u; kal᷊awọu ěllone sen tinantu tental᷊ang den tawẹu sěmbaụ nitětạ.

¹⁷Apạ e kasusane[71] tiněnna-Nu si siạ, e Mawu, ringangu apạ e kal᷊awọe pinẹ̌tambaěnge!

¹⁸Kereu takụ dekenang, limembong kal᷊awọ e ěnne; kereu iạ mẹ̌bangung, bědang lai takụ tẹ̌tiněnnaěng i Kau e.

¹⁹Karimạko taumata ral᷊akisẹ̌ e rem pateěngʼU Mawu! apakarauko apang měnanědọu raha e wọu anuku.

²⁰I sire mạul᷊ịu karal᷊akisʼU mẹ̌sẹ̌salu konti waugu manga soa-Nu.

²¹O MAWU, iạ mạběnsingu taumata kụ mạběnsing i Kau, naungku e mạsahen taumata kụ dụdokạ si Kau!

²²I sire e takụ i pẹ̌bẹ̌binsị marasai, kụ takụ i kẹ̌koạ kere sědụ.

²³Sěsuieko iạ e Mawu, kụ parịkěsaiko naungku e, banikateko iạ dingangu kasingkạkon tiněnnaku e.

²⁴Kakěllaiko karal᷊akisẹ̌ měnsang piạ su ral᷊ungu watangengku, ringangu ahạko iạ su ral᷊engu kụ kakalẹ̌ e.[72]