Read Sangir MAZMURẸ̌ 140 Bible Online

MAZMURẸ̌ 140 - Sangir bible

MAZMURẸ̌ 140

¹Baugu měngangahạ kantarị. Mazmuri Daud.

²Ambangeko iạ bọu taumata ral᷊akisẹ̌ e MAWU, těntanureko iạ e wọu taumata tahapěngaloaị.

³I sire měmpẹ̌dẹ̌dal᷊ahingidu hal᷊ẹ̌ dal᷊akị su naung i sire, kụ ěllo-ěllo e makạbahěta pẹ̌bawul᷊o.

⁴ Lilan sire mẹ̌sul᷊ungu těmpu mawisa, kal᷊awọu waweran sire e mẹ̌sul᷊ungu wisan těmpu ul᷊ahẹ̌.

⁵MAWU těntanureko iạ bọu taumata ral᷊akisẹ̌, lukadeko iạ bọu taumata kụ mẹ̌tẹ̌tingkaị piạ ol᷊ange mapakanawong iạ.

⁶Mal᷊aobotẹ̌ e mělẹ̌likosẹ̌ měmpẹ̌taingu sedẹ si siạ, dingangu něngatedẹ̌ sasaung i pěnaung si siạ. Kanandun dal᷊eng i sire měmpẹ̌tẹ̌taingu wal᷊atị i pěhěgạ si siạ.

⁷O MAWU, iạ mẹ̌bera: I Kau e Ruataku, daringiheko tingihu kakal᷊iomanengku.

⁸MAWU, Ruataku, měngangambangku matoghasẹ̌, i Kau e seng naněntanudẹ̌ si siạ e su ral᷊ungu pẹ̌seketang.

⁹Abe tuhuke kapulun taumata ral᷊akisẹ̌ e MAWU, abe pakawala karakin sire e mariadi.

¹⁰Abe pakawala sekẹku e makauntu; mal᷊owọko manga waweran sire ral᷊akisẹ̌ e tumuhung si sire apang měmpělẹ̌hinakang si siạ e.

¹¹Ore i sire rasehengkon tětuhẹ̌, dingangu i rěmmẹ su l᷊ohangu papate, kụ semben tawe lai makakasěbang.

¹²Mal᷊owọko apan tahapangusạ e kaambungangu hombang masasaria e, kụ mambeng kumbahang mělahinakang e makapẹ̌banua.

¹³Iạ e masingkạ u i Kau e mẹ̌gẹ̌gěllịu kạadilẹ̌ e su taumata apang lẹ̌ěpisang, dingangu tụtatawang katul᷊idu taumata kasiang e.

¹⁴Taumata matul᷊idẹ̌ e sarung mẹ̌dalo si Kau, i sire sarung matanạ sěngkapẹ̌tanạ dingangʼU.