Read Sangir MAZMURẸ̌ 141 Bible Online

MAZMURẸ̌ 141 - Sangir bible

MAZMURẸ̌ 141

¹Mazmuri Daud. Iạ e kụkahiorọ si Kau, o MAWU, lighạbe tul᷊ung iạ. Daringihe wue iạ e kereu iạ kumui si Kau.

² Tarimạ bue kakal᷊iomanengku tabidạu sasěmba wuwụ, kụ l᷊imaku e kạtatěde tabidạu sasěmba wawěllo.

³O MAWU, lukade wue mohongku, ringangu tatingane wue wiwihẹ̌ku.

⁴Apakarau wue iạ bọu ěnningu mẹ̌koạ dal᷊akisẹ̌ e. Abe wala iạ e mẹ̌těngkal᷊aụ dingangu taumata duruhaka, kụ kumaěng sěngkakaěng su sal᷊iwang i sire.

⁵Kereu sěngkatau adilẹ̌ měnasa si siạ e, kụ dingangu katul᷊idẹ̌ e maněntiro si siạ e, ute ene mẹ̌sul᷊ungu lana kal᷊enggihange si siạ. Karimạko iạ ren tawe mẹ̌kunsingingu ene, batụu iạ e turusẹ̌be mẹ̌kẹ̌kal᷊iomaneng měnẹ̌nighe karal᷊akisi sire.

⁶Kereu apang měngangawasa si sire itẹ̌tul᷊udẹ̌ bọu manga těndihu manga watu hanibẹ̌, i sire sarung mangaku u waweraku e kahěngang bue.

⁷Duhing kitẹ e sarung i pẹ̌sal᷊iawuhẹ̌ su wiwihu kubul᷊ẹ̌, kere watu sěmbaụ i pakal᷊iapuhẹ̌ sol᷊ong ěntana.

⁸Arawe iạ e tatapẹ̌ mělẹ̌harapẹ̌ si Kau, o MAWU Ruataku, abe wala iạ pakapate, watụ u iạ e kai mẹ̌sẹ̌sirung su al᷊ungʼU.

⁹Lukareko iạ e wọu wal᷊atị nitaing baugu iạ e, wọu sedẹ u kal᷊awọu taumata apan dal᷊akisẹ̌ e.

¹⁰Balạe katatahone su sedẹ i sire hala, arawe iạ e mal᷊owọko reng masal᷊amatẹ̌.