Read Sangir MAZMURẸ̌ 144 Bible Online

MAZMURẸ̌ 144 - Sangir bible

MAZMURẸ̌ 144

¹Bọi Daud. Pẹ̌daloko MAWU e pẹ̌kakěllungangku! I Sie namihing si siạ mẹ̌sekẹ dingangu naněntiro si siạ mẹ̌paraěng.

²Seng i Sie tumatal᷊ěntụ si siạ e ringangu tumatatawangku, měnanal᷊amatẹ̌ku tampạ u pẹ̌sasirungangku. I Sie e pẹ̌kakěllungangku, tampạ u tatal᷊angengku, manga wansa e pinẹ̌samal᷊ẹʼE si siạ.

³ MAWU, kai apạ e tangu taumata e hakịu kawe nẹ̌naungangʼU e i sie? Kai i sai tangu i sie hakịu i Kau e mẹ̌sěmpị si sie?

⁴Taumata e kai mẹ̌sul᷊ungu anging sěngkatiụ, kere kěngkau simahe, kerene pẹ̌bawiahe.

⁵O MAWU, topeko langịʼU kụ timiụ e, kụ senggeheko manga wul᷊ude tadeạu tumipu.

⁶Pěnal᷊iawuhẹ̌kong kilạʼU tadeạu sědụ e mẹ̌kal᷊iaesẹ̌, ěnạko papitịʼU e tadeạu i sire e měmpẹ̌hěkosẹ̌.

⁷Pěngul᷊uhẹ̌kon lima-Nu e wọu sorga, pěliuko si siạ e wọu lěba. Ambangeko iạ e wọu kawasan taumata raghị,

⁸kụ papuluang měmpẹ̌konti ringangu měngakal᷊ẹ̌, dingangu mẹ̌salu konti.

⁹Iạ e sarung mẹ̌kantarịu kakantarị buhu waugi Kau, o Ruataku, dingangu mangobị kěcapi apidu kạkantarịe.

¹⁰I Kau e mạngonggọu watạ su manga ratu, dingangu mělẹ̌liwiri Daud ěllangʼU.

¹¹Liwirẹ̌ko iạ e wọu pedan taumata matingkaị; ambangeko iạ e wọu kawasan tau raghị kụ papuluang mẹ̌konti ringangu měngakal᷊ẹ̌ dingangu mělinga, ringangu mẹ̌salu konti.

¹²Mal᷊owọko manga anạ i kitẹ esẹ e su tempong i sire mangudạ e mẹ̌sul᷊ungu sasuang kụ maapisẹ̌ masaria. Karimạko manga anạ i kitẹ bawine e mẹ̌sul᷊ungu rihi wawuku, kụ nakal᷊ěgahẹ̌ manga wukum bal᷊eng istana.

¹³Karimạko kal᷊awọu manga gudang i kitẹ e masu e mapenẹ u l᷊ohone, ringangu kal᷊awọu haghing gẹ̌siʼm banua e. Karimạko manga domba su manga wimbaeng i kitẹ e, měmpěhite sarang manga pul᷊one hiwu kal᷊awọe.

¹⁴Karimạko manga saping kitẹ e rembeng mal᷊awọ matatiange kụ den tawẹ u mailang arau mate kapẹ̌ngědihu anạ e. Karimạko ren tawe karingihẹ̌ sikin sunsara su manga ral᷊engu soang kitẹ e.

¹⁵Kariangkamang sěngkawanuang kụ kerene e, kariangkamang apang umatẹ̌ kụ Duatane kai MAWU e!