Read Sangir MAZMURẸ̌ 145 Bible Online

MAZMURẸ̌ 145 - Sangir bible

MAZMURẸ̌ 145

¹Daralo wọi Daud. Iạ e mapulu mapakawantugi Kau, o Ruataku ringangu Ratuku, ringangu mẹ̌dalo si Kau sarang marěngụ-děngụ.

²Apang kal᷊aěllo iạ mapulu makitarimakasẹ si Kau, ringangu měmantugẹ̌ si Kau sarang marěngụ-děngụ.

³U MAWU e mawantugẹ̌ dingangu apạ e rẹ̌daloěng, kasěllahʼE tawe kaurungang.

⁴Hěnto wělaseng u hěnto taumata mang mẹ̌dẹ̌dalo munara-Nu, ringangu mạmombengu kawasa-Nu.

⁵I sire sarung měhabaru hiansang dingangu kawawantugʼU, karadiahangʼU e makạl᷊ahiansange takụ tẹ̌tiwakeng.

⁶I sire e mẹ̌bẹ̌bal᷊ong kal᷊awọu munara-Nu e makạgěnggiang, kasěllahʼU e sarun takụ i wěke.

⁷Taumata e sarung mẹ̌běkeng kal᷊awọu kapia-Nu ringangu mẹ̌kantarị u kạadilʼU.

⁸MAWU e makěndagẹ̌ dingangu matal᷊ěntụ, marěngụ lumangehẹ̌ dingangu sěntiniạ mang makěndagẹ̌.

⁹I Sie mal᷊ondo suapan taumata, ringangu kụkěndagu kal᷊awọu riadikangʼE.

¹⁰Kal᷊awọu riadikangʼU e sarung mẹ̌dalo si Kau, o MAWU, kal᷊awọu umatʼU e sarung makitarimakasẹ si Kau.

¹¹I sire sarung měmantugẹ̌ kawasa-Nu, kere sěngkatau Ratu, ringangu mẹ̌běkeng kawasa-Nu,

¹²tadeạu patikụ taumata e masingkạ u munara-Nu e masěllahẹ̌, ore lai kararatuangʼU e mawantugẹ̌ dingangu mahiansang.

¹³Kararatu-Nu e tatapẹ̌ su kanandun tempo, kawasa-Nu e mauwuhẹ̌ sol᷊ong hěnto mẹ̌bẹ̌bawěllasẹ̌. MAWU e satia su patikụ diandi-Ne, i Sie napenẹ u kakěndagẹ̌ su ral᷊ungu patikụ kakanoạʼE.

¹⁴MAWU e mẹ̌tul᷊ungu taumata kụ su ral᷊ungu susa, i Sie mạpakatein taumata kụ apang mawawěkung.

¹⁵Patikụ diadikang biahẹ̌ e mělẹ̌harapẹ̌ si Kau; gěllirangʼU kaěnge su tempone i sire.

¹⁶I Kau e mạpakasukụ u kal᷊awọu apang gẹ̌gausang i sire, sarang i sire e tawe kakawusange.

¹⁷MAWU e adilẹ̌ su patikụ i kakoạʼE ringangu maěllugẹ̌ su patikụ kakanoạʼE.

¹⁸I Sie maranin taumata kụ mẹ̌kẹ̌kui si Sie, ringangu kụkahiorọ si Sie ringangu naunge masaria.

¹⁹I Sie makạl᷊uasẹ̌ naungu taumata apang mal᷊aimang; i Sie rụdaringihẹ̌ kakuin sire ringangu měngambang si sire.

²⁰I Sie maněntanudẹ̌ apan taumata kụ tụtal᷊ěntụ i Sie, arawe taumata ral᷊akisẹ̌ e ipakawinasa-Ne.

²¹Iạ mapulu mẹ̌dalo MAWU sěntiniạ, karimạko kal᷊awọu riadikangʼE mẹ̌dalo arengu MAWU sarang marěngụ-děngụ.