Read Sangir MAZMURẸ̌ 147 Bible Online

MAZMURẸ̌ 147 - Sangir bible

MAZMURẸ̌ 147

¹Pẹ̌daloko MAWU! U mapiawe mẹ̌dalo si Sie, ringangu mapakal᷊uasẹ̌ baugu mẹ̌kantarị u raralo waugi Sie!

²MAWU e sarung měngul᷊ị Yerusalem kapia, i sire apang nawembang e sarung i pakapul᷊ẹʼE kạpia.

³I Sie mapakaul᷊eng apan naunge něnsu, ringangu mạměkisẹ̌ manga l᷊esẹ i sire.

⁴I Sie e mạmoěngu kal᷊awọu wituing su winangaeng, kụ sěmbaụ-sěmbaụ e nighěllirangʼE areng.

⁵Mambem masěllahẹ̌ dingangu makawasa tạ sihinge Mawung kitẹ, kapelesa-Ne tawẹ kẹ̌takenge.

⁶I Sie mạnumpilẹ̌ taumata kụ lẹ̌ěpisang, arawe taumata ral᷊akisẹ̌ e lẹ̌humagengʼE su ěntana.

⁷Pẹ̌kantarịkong kakantarị daralo waugu MAWU, pěngobịko kěcapi waugu Ruatang kitẹ.

⁸Seng i Sie e něngěmpahu winawa su l᷊angị; i Sie mẹ̌děndiahi tahiti waugu dunia, ringangu mapạtuwon děmpugẹ̌ su wowom bul᷊ude.

⁹I Sie mapạkaěng u manga binatang, dingangu su manga pěgol᷊u manụ gagakẹ̌ e kereu mạhungkui.

¹⁰Karal᷊ahimpulung MAWU e, wal᷊inewe kawal᷊o kụ matoghasẹ̌ e; wal᷊inewe lai mẹ̌sasekẹ kụ bahani.

¹¹MAWU e puluang su taumata kụ mararingihẹ̌, su taumata kụ tatapẹ̌ mělẹ̌harapẹ̌ kakěndagʼE.

¹²Pẹ̌daloko MAWU e, ei Yerusalem! Pẹ̌daloko Ruatanu e, ei Sion!

¹³U i Sie e mạmal᷊e manga tukadu pasěllangeng dingangu mạngal᷊amatẹ̌ manga tumanạu e.

¹⁴I Sie e mělẹ̌lukadẹ̌ banuanu tadeạu tatapẹ̌be mal᷊enehẹ̌, dingangu makạl᷊ahimpulu si kau ringangu gandung kal᷊ěnggihange.

¹⁵I Sie mapạsěbangu orone su dunia, ringangu hengetangʼE pakal᷊ighạbe kẹ̌koạ.

¹⁶I Sie mạparasehu saldu e kere kapesẹ̌, dingangu mạngaesu namuhẹ̌ nẹ̌kompelẹ̌ kere awu.

¹⁷I Sie e mạparasehu tahiti eisẹ̌, kere kohasẹ̌; tawẹ u makatahang těhone.

¹⁸Mase kahiang hengetangʼE eisẹ̌ ene e nasue nelehẹ̌; i Sie napatiụ u anging, tangu akẹ e nelehẹ̌.

¹⁹I Sie mělẹ̌habaru wawera-Ne su manga umatʼE, kal᷊awọu tiaha-Ne ringangu tinundu-Ne su manga umatẹ̌ pinile-Ne.

²⁰I Sie tawe mẹ̌kakoạ kerene su manga wansa wal᷊ine, i sire tawe makakakiral᷊a manga tinundu-Ne. Pẹ̌daloko MAWU!