Read Sangir MAZMURẸ̌ 17 Bible Online

MAZMURẸ̌ 17 - Sangir bible

MAZMURẸ̌ 17

¹Kakal᷊iomaneng i Daud. Daringihẹ̌ko kakahiorọku mẹ̌gẹ̌gausẹ̌ kạadilẹ̌, naungeko kakal᷊iomanengku e wurẹ̌si, MAWU.

²Karimạko reng tumatawang pěrkaraku u i Kau e masingkạu apang kụ kahěngang.

³Kereu i Kau e mamanikạ naungku e ringangu ruměnta manẹ̌sui si siạ su tempong hẹ̌bi, sarung kaěbakengʼU u iạ e wurẹ̌si wue; baweraku e sětarawen tiněnnaku e.

⁴Iạ e mẹ̌kẹ̌koạ apang kụ pẹ̌parentaěngʼU e tawe rumaral᷊engu katatingkaị.

⁵Iạ e sidutu mẹ̌bẹ̌biahẹ̌ tụtol᷊e ahạʼU ringangu tawe měndal᷊enga wọi sie.

⁶Iạ e mẹ̌kẹ̌kui si Kau, o Ruata, u i Kau e sụsimbang si siạ, kụ tatinganeko iạ dingangu raringiheko kal᷊awọu waweraku.

⁷Todẹko kakěndagʼU e makạdal᷊inaụ batụu kai ipakasal᷊amatʼU e taumata kụ mẹ̌těngkal᷊indung si Kau, su sěndihangʼU e i sire mal᷊ěmpị bọu pěngangalon sekẹ.

⁸Padul᷊ieko iạ e kere anạu mata-Nu, buniko iạ e su ral᷊ungu ěllungu panidu

⁹bọu along taumata ral᷊akisẹ̌ e. Iạ e niliwungangu sekẹ kụ mapulu měmate si siạ;

¹⁰i sire wěgawe makakiral᷊a kakěndagẹ̌ dingangu mahumbisara e mal᷊aobotẹ̌.

¹¹I sire e ramahi rumokạ si siạ dingangu timal᷊ipurung si siạ mẹ̌deạ lěsabu měmanting si siạ.

¹²I sire e kai mẹ̌sul᷊ungu singa kụ mapulu měnembo kinaěnge, singa kawuhuang kụ mẹ̌tẹ̌gạ su tampạ mạbawuni.

¹³Pẹ̌bangungke MAWU, dokateko sekẹku e dingangu watakeko i sire. Ambangeko iạ e ringangu peda-Nu wọu alon taumata ral᷊akisẹ̌ e.

¹⁴Pěllọko iạ e wọu kal᷊awọu taumata kụ mapẹ̌bilowoing arětạ su dunia. Hukungko i sire ringangu hombang masaria e kụ seng niriahi-Nu e waugi sire. Balạete anạ pulung i sire e pakihukung lai.

¹⁵Arawe iạ e sarung kumakělla si Kau, u iạ e tawẹ sal᷊aku. Su tempong iạ mẹ̌bangung, darěnta-Nu e makạl᷊uasẹ̌ naungku e.