Read Sangir MAZMURẸ̌ 18 Bible Online

MAZMURẸ̌ 18 - Sangir bible

MAZMURẸ̌ 18

¹Baugu měngangahạ kantarị. Mazmuri Daud, ěllangu MAWU. Kẹ̌kantarikang baugu MAWU su tempong i Daud nipěllọ bọi Saul dingangu wọu kal᷊awọu sědụ e.

²Karalọku si Kau e, MAWU seng i Kau e katoghasẹ̌ku.

³MAWU e mẹ̌sul᷊ungu těndạ kụ matoghasẹ̌ tampạku mẹ̌těngkal᷊indung. Duataku e mẹ̌sul᷊ungu wukidẹ̌ batu tampạku mẹ̌těngkaěllung. I Sie mẹ̌sul᷊ungu kěllung mạnirung si siạ, dingangu měndiagạ si siạ tadeạu hanesẹ̌ mal᷊enehẹ̌.

⁴Iạ e kụkahiorọ su MAWU kụ hinong daloěng, i Sie e napakal᷊iwiru iạ e wọu kal᷊awọu sekẹku.

⁵Iạ e nilikutangu hombang papate ringangu nielokangu lẹ̌bang kawawinasa.

⁶Iạ e niliwungangu hombang papate, sedẹu papate e piạ su těngoku.

⁷Su ral᷊ungu kasasěsẹku e iạ e mẹ̌kẹ̌kui MAWU, iạ kụkahiorọ su Mawu Ruataku mẹ̌dẹ̌dorong tul᷊umang. Bọu Wal᷊e-Ne i Sie e rụdaringihẹ̌ tingihẹ̌ku ringangu měnẹ̌naung kakindoạku.

⁸Bọu e wanua e ghimanuẹ̌ dingangu kimiọ, manga wawěntam bul᷊ude kụ kolong dingangu kụkende ual᷊ingu ral᷊angehu Mawu Ruata.

⁹Tipu e simal᷊iwẹ̌budẹ̌ bọu lohangu irungʼE, putung dingangu tětuhẹ̌ e siměbang bọu mohongʼE.

¹⁰Langị e niwěka-Ne, mase limintụ e i Sie ringangu winawa marěndung su al᷊ungu laedʼE.

¹¹I Sie timěllạ kụ kạsakene kerub;[10] i Sie tụtěllạ pěnẹ̌nalangu anging.

¹²I Sie mělẹ̌hěmbung awạʼE ringangu kararěndung; hiwụ mahěbung namikung si Sie.

¹³Bọu kilạ sughati-Ne, siměbangke winawa, tahiti, eisẹ̌ dingangu putung.

¹⁴Bọu e MAWU e něluntingihẹ̌ bọu winangaeng; i Sie Kụ Karangetange napararingihu tingihʼE.[11]

¹⁵I Sie něnarangu manga horom papitịʼE kụ napẹ̌kal᷊iaesu rokạ; i Sie napěnahedu kilạ mědẹ̌dahenesang, dingangu nakakariadin sire nahuntal᷊ang.

¹⁶Běnna e nawingkahẹ̌ dingangu winangunang e naěmpahẹ̌ su tempong MAWU e nẹ̌buheang sědụʼE ringangu ral᷊angehẹ̌.

¹⁷Bọu wowone MAWU e nangul᷊uhu takiahʼE; kụ nihẹ̌go-Ne iạ e dingangu niwol᷊engʼE wọu ral᷊ungu akẹ maral᷊ung.

¹⁸I Sie něngambang si siạ e wọu sědụ kụ mahasa e ringangu wọu kal᷊awọu taumata kụ mẹ̌bẹ̌binsịu iạ, ual᷊ingu i sire tumanịu matoghasẹ̌ baugʼu iạ.

¹⁹I sire němpěngalo si siạ su tempong iạ e nihombangengu silakạ, kaiso MAWU e nakoạ mẹ̌tatul᷊ungʼu iạ.

²⁰I Sie něliwiru iạ e wọu silakạ dingangu něngambang si siạ e ual᷊ingu i Sie e nẹ̌tatal᷊ahino si siạ e.

²¹MAWU e němal᷊isẹ̌ kakanoạku e mapia, i Sie něngal᷊amatẹ̌ si siạ ual᷊ingu iạ e tawẹ sal᷊aku.

²²Iạ e tụtuhụ titam MAWU ringangu tawe mẹ̌bawihu wọu Ruataku.

²³Patikụ titanʼE takụ nẹ̌naungang manga laoronʼE tawe wawalaěngku.

²⁴I Sie masingkạ u iạ tawẹ turạe ringangu mẹ̌tẹ̌těngkaraung batangeng bọu pẹ̌sasal᷊a.

²⁵Tangu MAWU e měmal᷊isẹ̌ kakanoạku nẹ̌tatal᷊ahino e batụu i Sie e masingkạ u iạ e tawẹ sal᷊aku.

²⁶MAWU, i Kau e satia su taumata kụ satia ringangu mapia su taumata kụ mapia.

²⁷Baugu taumata kụ susi e nilahẹʼU watangengʼU e susi, arawe taumata kụ dal᷊akisẹ̌ e nisědukangʼU e.

²⁸Taumata kụ naunge masanạ e niapakasal᷊amatʼU, arawe taumata kụ maobotẹ̌ e niapẹ̌samal᷊ẹʼU.

²⁹I Kau e naparěllịu sol᷊oku; MAWU Ruataku e něnualagẹ̌ kararěndungku.

³⁰I Kau e nanoghasẹ̌ si siạ baugu mapakawatạu rokạ; dingangu laontol᷊u Ruataku takụbe těnehang pẹ̌bawukirang i sire.

³¹Pẹ̌kakoạ u Ruata e nasukụ diandim MAWU e kapangimangeng. I Sie kai mẹ̌sul᷊ungu kěllung baugu patikụ apang mapulu mẹ̌těngkal᷊indung si Sie.

³²Batụu kětạeng MAWU e Ruata; samatang Duata tụtatawang si kitẹ.

³³Seng i Sie e Ruata kụ napakatoghasu iạ dingangu napakariadin dal᷊engku e tạ konsange.

³⁴ I Sie e napakatoghasu laedẹ̌ku e kere laedu rusa, ringangu mẹ̌děndiagạ kasasal᷊amatẹ̌ku e su wawul᷊urange.

³⁵I Sie napakawal᷊insahu iạ e waugu mẹ̌sekẹ, hakịu iạ e wotongewe makapangětingu naěnakeng kụ katoghasenge.

³⁶MAWU, i Kau e něnirung dingangu napakasal᷊amatu iạ, dingangu něnuilẹ̌ si siạ dingangu kawasa-Nu; iạ e nakoạ mapia e ual᷊ingu tindakangʼU.

³⁷NiriagatengʼU e iạ tadeạu iạ tawe i kataweng, dingangu iạ e tawe waharia manawo.

³⁸Takụ sahusuang dokạku e ringangu takụ ipakawatạ i sire, ringangu wěgawen sumohọ sarang i sire mawinasa.

³⁹Takụ lenggeěng i sire e sarang tawe saụ makapětị kapia, i sire makararěmmạ ta makakoạ apa su těngon laedẹ̌ku.

⁴⁰NionggotangʼU katoghasẹ̌ iạ e waugu mẹ̌sekẹ, dingangu pěmamatạ su manga rokạku.

⁴¹I Kau e napakatal᷊angu rokạku wọu anuku; apan taumata kụ mẹ̌bẹ̌binsịu iạ e, takụ i pakawihua.

⁴²I sire makịtul᷊ung, kaiso tawẹu němpẹ̌tul᷊ung, i sire měmpẹ̌kẹ̌kui MAWU e, kaiso i Sie tawe simimbang.

⁴³I sire e takụ hěmpungang kere awul᷊ẹ̌ kụ mẹ̌sal᷊iawuhẹ̌, dingangu takụ sapuang kere onasẹ̌ su ral᷊eng.

⁴⁴I Kau e něliwiru iạ bọu ghal᷊ipohon taumata duruhaka, dingangu napakariading iạ měngangawasa kal᷊awọu bansa; bansa e su kawěgaku nakoạ ěllangku.

⁴⁵Apan taumata raghị e mẹ̌sẹ̌samal᷊ẹ si siạ dingangu tụtuhụ kereu makaringihẹ̌ laoroku.

⁴⁶Kawawahanin sire e seng nailang; i sire mạhungkende kụ němpahunsěbang bọu pẹ̌bawukirang i sire.

⁴⁷MAWU e wiahẹ̌! Karaloko tumatatawangku e! Bantugeko kasěllahu Ruata měnanal᷊amatẹ̌ku e!

⁴⁸I Sie nangonggọu kal᷊auntu si siạ e wọu rokạku; manga wansa e nipẹ̌samal᷊ẹʼE su těngoku,

⁴⁹niambangʼE iạ e wọu manga sědụku e. MAWU, nionggotangʼU iạ e kal᷊auntu wọu rokạku, nisirungʼU e iạ bọu taumata matatingkaị.

⁵⁰ Tangu takụ bantugang i Kau su tal᷊oarang kal᷊awọu wansa, dingangu takụ kantarikangu raralo waugi Kau.

⁵¹Mawu Ruata e něngonggọu kal᷊auntu masaria su ratu-Ne, i Sie tatapẹ̌ kụ kěndagu taumata pinile-Ne, kụ kai i Daud dingangu manga hitene sarang marěngụ-děngụ.