Read Sangir MAZMURẸ̌ 19 Bible Online

MAZMURẸ̌ 19 - Sangir bible

MAZMURẸ̌ 19

¹Baugu měngangahạ kantarị. Mazmuri Daud.

²Langị e mělẹ̌lahẹu kawawantugu Ruata, ringangu sarul᷊uange mělẹ̌habaru munara-Ne.

³Ěllo sěhěllo e maul᷊ị su ěllo tuhụ e; hěbi sěmbaụ e měhabaru wẹ̌kene su hěbi kụ tuhụ e.

⁴Tawẹ apa kụ mẹ̌bẹ̌bisara arau měbẹ̌bera, tawẹ apa tingihẹ̌ kụ ikẹ̌karingihẹ̌.

⁵ Arawe kakuine piạ bal᷊ěmbenge su kasěllahu dunia, tatanata ene e nahumpạu patikụ pondol᷊u dunia. MAWU e nělanging bal᷊e su langị baugu matangěllo,

⁶deng mal᷊uka-l᷊ukadẹ̌ i sie mạnětạ mạtualagẹ̌ kere boroitẹ̌ esẹ nasěbang bọu kamare, kere mẹ̌sasekẹ kụ mal᷊uasẹ̌ manětạu raral᷊enge.

⁷I sie mạněsui langị bọu pondol᷊e sarang pondol᷊e; tawẹu makatihọ bọu tětị e.

⁸Titaʼm MAWU e nasukụ, makạhuweka himukudẹ̌. Titaʼm MAWU e kapangimangeng, makạonggọu kapelesa su taumata kụ masanạ.

⁹Tiahaʼm MAWU e nẹ̌kětạ, makạl᷊uasẹ̌ naung. Pělatorangu MAWU ene e wurěsi, makạdiadi taumata e makạhěngang.

¹⁰Mẹ̌kal᷊iomeng su MAWU ene e mapia, kụ maral᷊eng sarang marěngụ-děngụ. Titaʼm MAWU ene e kahěngang dingangu adilẹ̌be kěbị.

¹¹Titam MAWU e limembong maarěga wọu wul᷊aeng sahị, limembong karěngange wọu madu tutune.

¹²ĚllangʼU e nipaul᷊ikangu patikụ ene; tatendenge masaria kạsasadia waugu tumatuhụe.

¹³Tawẹ apa kụ deng makahěngang kapapal᷊ide; MAWU, liwirẹ̌ko iạ e wọu pẹ̌sasal᷊a kạbawuni.

¹⁴Apakarauko iạ e wọu rosa kụ ipẹ̌tẹ̌tatudẹ, abe wala iạ e pẹ̌kawasaěng i sie. Tangu iạ e makoạ tawẹ turạ e, ringangu nakatal᷊ang bọu pělal᷊ampa mawawěhạ.

¹⁵Karimạko kal᷊awọu wawera ringangu tiněnnaku e mẹ̌tatal᷊ahino si Kau, e MAWU, měnanirung dingangu měnanubusẹ̌ku.