Read Sangir MAZMURẸ̌ 21 Bible Online

MAZMURẸ̌ 21 - Sangir bible

MAZMURẸ̌ 21

¹Baugu měngangahạ kantarị. Mazmuri Daud.

²O MAWU, datu e mal᷊uasẹ̌ ual᷊ingu i Kau e seng nanoghasẹ̌ si sie; i sie limuasẹ̌ ual᷊ingu kal᷊auntu nạung nionggọu si sie!

³I Kau e seng nakawatụ kapulun naunge, ringangu nangonggọu apang kụ dẹ̌dorongange.

⁴I Kau e riměnta su anun sie ringangu al᷊amatẹ̌ mẹ̌dẹ̌dal᷊embo, ringangu něnakẹ paporong bul᷊aeng su těmbọ e.

⁵I sie mẹ̌gẹ̌gausu mẹ̌biahẹ̌, kụ nighěllirangʼU e si sie, sarang lai umurẹ̌ manandụ baugu sarang marěngụ-děngụ.

⁶Ual᷊ingu tul᷊umangʼU e i sie nakoạbe limembong lẹ̌adateng, I sie pinakariadinʼU e timeleng dingangu nahengkeng.

⁷Nial᷊amatengʼU e i sie sarang katěpasenge; darěnta-Nu e makạdiadin sie napenẹu ral᷊uasẹ̌.

⁸Datu e mělẹ̌harapẹ̌ su MAWU Kụ Karangetange, i sie sidutu měngkai tạ konsange ringangu tatapẹ̌ ikẹ̌kěndagu MAWU.

⁹I Sie sarung makataweng kal᷊awọu sědụ e, ringangu měnamẹ kal᷊awọu taumata kụ mẹ̌bẹ̌binsị i Sie.

¹⁰I Sie rụděnta kere putung kụ dụděllị marehe mapakawinasan sire. I sire sarung ipakasue kahian dal᷊angehʼU Mawu, ringangu kahiang putung kụ makahěngisẹ̌.

¹¹Bọu hiten sire tạu nal᷊embe, ratu e sarung měngěnsue si sire kěbị.

¹²Kamagengu i sire piạ karakine lumawang datu e, tondol᷊ikụ i sire e tawẹ apa kěhase.

¹³I Sie sarung měngěnạu papitịʼE, sarang i sire mẹ̌bal᷊ị tumal᷊ang.

¹⁴I kami mẹ̌dalo si Kau MAWU, u kai masaria kawasa-Nu, i kami e mẹ̌kẹ̌kantarị mẹ̌dalo kahuagatʼU.