Read Sangir MAZMURẸ̌ 22 Bible Online

MAZMURẸ̌ 22 - Sangir bible

MAZMURẸ̌ 22

¹Baugu měngangahạ kantarị. Tumuhụ lagu: Rusa su tempom běmbanaho. Mazmuri Daud.

² Ruataku, o Ruataku, unụ e i Kau naněntangu iạ? Iạ e mẹ̌kẹ̌kui, kaiso i Kau e mang marau ringangu tawe mẹ̌tul᷊ungu iạ.

³O Ruataku, iạ e kụkui su tempong ěllo, kai i Kau e mang marěmasẹ̌. Iạ e mẹ̌kẹ̌kal᷊iomaneng su tempong hěbi, kai naungku e mal᷊ain tawẹ katatapenge.

⁴Kaiso i Kau e kawe Ratu Limembong Kasusiange, kụ sidutu rẹ̌daloěngu tau Israel.

⁵I upung i kami e mělẹ̌harapẹ̌ si Kau Mawu, i sire mělẹ̌harapẹ̌ dingangu i Kau e něngambang si sire.

⁶I sire kụkahiorọ si Kau Mawu kụ nipakal᷊iwirẹ̌; i sire mělẹ̌harapẹ̌ dingangu tawe nipakanawo naung i sire.

⁷Kaiso iạ ini e kawe lěheng bal᷊inewe taumata, lẹ̌heghesang dingangu lẹ̌hinakaneng u taumata l᷊awọ.

⁸ Patikụ apang nakasilo si siạ e, mẹ̌bẹ̌baheaung iạ, mẹ̌kẹ̌kakaweong biwihe ringangu mẹ̌kẹ̌kakilingu těmbọ.

⁹ Angkuěng i sire, ”Balạete i sie pěngumbala su MAWU, tadeạu MAWU e měngambang si sie, kereu MAWU e mal᷊uasẹ̌ naunge si sie!”

¹⁰Seng i Kau e něngědihu iạ e wọu gandongang, dingangu napakapěllọu iạ su hiwan ninangku.

¹¹Dokeng buhu laědihẹ̌ e, biahẹ̌ku e mang su l᷊ima-Nu, dokeng bọu ral᷊ungu gandongang, i Kau e Ruataku.

¹²Kumbahangbe mẹ̌těngkarau, u silakạ seng masandigẹ̌, dingangu tawẹ apa kụ deng mẹ̌tul᷊ung.

¹³Kere ghapaěngu banteng, dokạ e měmpẹ̌tal᷊ipurung si siạ, kere banteng maghaěng bọu Basan měmpěnal᷊iwung si siạ.

¹⁴I sire tụtatěngo si siạ ngụngangam mohong i sire, mẹ̌sul᷊ungu singa mạmunggal᷊ọ dingangu měněmbo.

¹⁵Katoghasẹ̌ku e nasue kere akẹ nạboso, kal᷊awọu ruhiku e natontong bọu lensorange, naungku e nelehẹ̌ kere liling.

¹⁶Tinggol᷊angku e[13] namara kere kodọu kaca, lilaku e riměkạ su langitangu mohongku e. MAWU, nitěntangʼU e iạ su wowong awul᷊ẹ̌ kere taumata kụ seng nate.

¹⁷Iạ e nipẹ̌tatal᷊iwungang u gěrombolangu taumata ral᷊akisẹ̌; kere ghapaěngu asu i sire němpẹ̌tal᷊ipurung si siạ, něněkạ[14] limaku ringangu laedẹ̌ku.

¹⁸Kal᷊awọu ruhiku e takụ karekenang, dokạ mạmanda si siạ e kere wawialaěng.

¹⁹ I sire mẹ̌tẹ̌tintẹu pamamahiạ pakeangku, ringangu měnẹ̌nawụ lotẹ̌ baugu kakingkaengku.

²⁰Arawe i Kau e, kumbahangbe mẹ̌těngkaraung MAWU, děntạe pakarol᷊ạ pẹ̌tul᷊ungu iạ, u kai i Kau e katoghasẹ̌ku.

²¹Liwirẹ̌ko niawaku e wọu peda, ambangeko iạ e wọu sasal᷊ukạu asu.

²²Iạ e tawe makakoạ apa-apa,[15] pěllọe iạ bọu sungem banteng dingangu wọu sasimụu singa.

²³ Kakanoạu e sarung takụ běkeěng su manga anạu sěmbaụku; su ral᷊ungu pẹ̌sasombangu umatʼU, iạ mang mẹ̌dalo si Kau.

²⁴Pẹ̌daloko si Sie, ei taumata mal᷊aagama! Pěmantugẹ̌ko si Sie, patikụ hěnton Yakub! Pẹ̌tumpěkuhẹ̌ko su těngo-Ne, patikụ hiteng Israel!

²⁵Batụu i Sie tawe mapakasanạu taumata ipẹ̌tẹ̌tahuěllang, dingangu tawe tạ padul᷊ine su sunsarane. I sie tawe mẹ̌bawihu wọu taumata ene, kaiso kawe rụdaringihẹ̌ kereu i sie makitul᷊ung si Sie.

²⁶Su tal᷊oarang komol᷊angu umatẹ̌ e, iạ mẹ̌dalo si Kau, ual᷊ingu patikụ apan seng kinoạʼU. Su těngong umatẹ̌ mal᷊aagama e takụ i sarakang sasěmba takụ niriandi.

²⁷Tau kasiang e sarung kumaěng sarang mal᷊aedẹ̌; taumata kụ duměnta sarang anung MAWU e sarung mẹ̌dalo si Sie. Karimạko i kamene mal᷊unsemahẹ̌ sarang marěngụ-děngụ!

²⁸Patikụ bansa e sarung mẹ̌tahěndung su MAWU ringangu mẹ̌sul᷊e su anun Sie, kal᷊awọu ghal᷊ipohom bansa e sarung mẹ̌tumpěkuhẹ̌ maněmba si Sie.

²⁹U seng MAWU e kawasa, i Sie nẹ̌parenta kal᷊awọu wansae.

³⁰Patikụ taumata ghaghuwạ e sarung mẹ̌tumpěkuhẹ̌ su tengonʼE,[16] kěbị taumata tawe kakalẹ̌ e sarung mẹ̌tumpěkuhẹ̌ maněmba si Sie.

³¹Kal᷊awọu angkatan tuhụe sarung měmpẹ̌kal᷊iomaneng su MAWU, i Sie sarung i paul᷊ị su hěnto mẹ̌bẹ̌bawelasẹ̌.

³²Baugu wansa kụ piněhěnding samuri e tangu sarung i paul᷊ị u MAWU e seng něngambang umatʼE.